သံတောင်ကြီးက စစ်ကောင်စီ သပြေညွန့်တပ်စခန်းကို KNLA ပူးပေါင်းတပ်တွေ သိမ်းယူ

BVJ/အိုင်းရစ် _ မတ် ၉ ၊ ၂၀၂၅

စစ်ကောင်စီ သပြေညွန့်တပ်စခန်းကနေ သိမ်းဆည်းရရှိခဲ့တဲ့ လက်နက်ခဲယမ်းများ (Photo: KNLA GHQ)

ကရင်ပြည်နယ် သံတောင်ကြီးမြို့နယ် သပြေညွန့်ရွာမှာ တပ်စွဲထားတဲ့ စစ်ကောင်စီ သပြေညွန့်တပ်စခန်းကို ကရင်အမျိုးသားလွတ်မြောက်ရေးတပ်မတော် (KNLA) ပူးပေါင်းတပ်တွေက သိမ်းယူနိုင်ခဲ့တယ်လို့ KNLA ဗဟိုဌာနချုပ်က ဒီနေ့ မတ်လ ၉ ရက်မှာ ထုတ်ပြန်လာပါတယ်။

စစ်ကောင်စီ အရှေ့တောင်တိုင်းစစ်ဌာနချုပ်လက်အောက်ခံ အမှတ် ၇၃ ခြေလျင်တပ်ရင်း (ခလရ) က အင်အား ၃၀ ဝန်းကျင်နဲ့ တပ်စွဲထားတဲ့ သပြေညွန့်စခန်းကို KNLA ပူးပေါင်းတပ်တွေက မနေ့ မတ်လ ၈ ရက်မှာ သိမ်းယူနိုင်ခဲ့တာဖြစ်ပြီး စစ်ကောင်စီထံက လက်နက်ခဲယမ်းအချို့ စစ်ဘက်အသုံးအဆောင်တွေ သိမ်းဆည်းရရှိခဲ့တယ်လို့လည်း သိရပါတယ်။

တိုက်ပွဲအတွင်း စစ်ကောင်စီဘက်က ၈ ဦးထက်မနည်း သေဆုံးခဲ့တယ်လို့ ကရင်ဒေသတွင်းသတင်းဌာနတွေက ဖော်ပြထားသလို တိုက်ပွဲအခြေအနေနဲ့ပတ်သက်ပြီး အသေးစိတ်မသိရသေးဘူးလို့ ကရင်အမျိုးသားအစည်းအရုံး (KNU) ပြောရေးဆိုခွင့်ရှိသူ ပဒိုစောတောနီးကိုလည်း Burma VJ ကို ပြောပါတယ်။

"အ​သေးစိတ် မသိနိုင်ပါဘူးခင်ဗျ။ သ​ပြေညွန့်တပ် စခန်း KNLA ပူး​ပေါင်းတပ်​တွေလက်ထဲ ကျသွားတာကို​တော့အတည်ပြုလို့ရပါတယ်" လို့ ပြောပါတယ်။

သပြေညွန့်စခန်းသိမ်းတိုက်ပွဲအတွင်း စစ်ကောင်စီက ဂျက်ဖိုက်တာလေယာဉ်နဲ့ လေကြောင်းပစ်ကူပေးခဲ့သလို အနီးဝန်းကျင်ကျေးရွာတွေကို ဗုံးကြဲတိုက်ခိုက်မှုလုပ်ဆောင်ခဲ့တာကြောင့် ဒေသခံပြည်သူအများအပြား နေရပ်စွန့်ခွာ ထွက်ပြေးတိမ်းရှောင်နေရတယ်လို့လည်း သိရပါတယ်။