စစ်အုပ်စုလက်နက်ကြီးထိပြီး အမွှာကိုယ်ဝန်ဆောင်အမျိုးသမီးနဲ့ ၁၁ နှစ်မိန်းကလေး သေဆုံး

BVJ_ဇွန် ၂၅၊ ၂၀၂၆

လက်နက်ကြီးထိမှန်သေဆုံးသွားသူ အမွှာကိုယ်ဝန်ဆောင် ဒေါ်ဇင်မာစိုး

မွန်ပြည်နယ်၊ သထုံမြို့နယ်ကိုစစ်အုပ်စုက ဇွန် ၂၂ရက်၊ ညနေငါးနာရီအချိန်မှာလက်နက်ကြီးနဲ့ပစ်ခတ်ခဲ့တာကြောင့် ကိုယ်ဝန်ဆောင်အမျိုးသမီးနဲ့၁၁နှစ်မိန်းကလေးငယ်တို့သေဆုံးသွားခဲ့တယ်လို့ ကရင်အမျိုးသားအစည်းအရုံး-KNUက ဒီနေ့ ဇွန် ၂၅ရက်မှာထုတ်ပြန်ပါတယ်။

စစ်အုပ်စုရဲ့ အမှတ် (၄၄) ခြေမြန်တပ်မဌာနချုပ် လက်အောက်ခံ ခမရ (၃)ကနေ အရပ်သားပြည်သူနေထိုင်တဲ့ကျေးရွာကိုပစ်မှတ်ထားကာ လက်နက်ကြီး (၂)လုံးနဲ့ပစ်ခတ်ခဲ့တာဖြစ်ပြီး သထုံမြို့နယ်၊ ကဒီပုကျေးရွာအုပ်စု၊ ပဏ္ဍိကုန်းကျေးရွာအတွင်းကိုကျရောက်ပေါက်ကွဲခဲ့တာဖြစ်ပါတယ်။

လက်နက်ကြီးပေါက်ကွဲမှုကြောင်သေဆုံးသွားသူတွေဟာ အမွှာကလေးနှစ်ဦးကိုကိုယ်ဝန်ဆောင်ထားတဲ့ ကိုယ်ဝန် (၇)လနဲ့ဒေါ်ဇင်မာစိုးနဲ့ မိစနေ (အသက် ၁၁ နှစ်)တို့ဖြစ်ပြီး အသက် ၅နှစ်ကလေးနဲ့ ၃၂အရွယ်အမျိုးသားတစ်ဦးတို့လည်းထိခိုက်ဒဏ်ရာရခဲ့ပါတယ်။

လက်နက်ကြီးကျဟာ ဒေါ်ဇင်မာစိုးတို့နေအိမ်ကိုကျ‌ရောက်ပြီး အိမ်လည်းမီးလောင်ပျက်ဆီးသွားသလို ဒေါ်ဇင်မာစိုးလည်းလက်နက်ကြီးထိမှန်သေဆုံးသွားတာလို့ သိရပါတယ်။

စစ်အုပ်စုဟာတိုက်ပွဲဖြစ်ပွားမှုမရှိတဲ့အချိန်တွေမှာ အရပ်သားပြည်သူတွေနေထိုင်ရာကျေးရွာတွေကိုလက်နက်ကြီးနဲ့ ပစ်ခတ်တိုက်ခိုက်လျက်ရှိပြီး အပြစ်မဲ့ အရပ်သားပြည်သူတွေရဲ့ အသက်အိုးအိမ်စည်းစိမ်တွေ ထိခိုက်ဆုံးရှုံးမှုတွေဖြစ်ပေါ်နေတယ်လို့ KNUက ပြောထားပါတယ်။