ရသေ့တောင်မြို့နယ် ထွန်းရဝေရွာဟောင်းကို စစ်ကောင်စီဗုံးကြဲတိုက်ခိုက်၊ ကလေးအပါအဝင် ဒေသခံ ၁၀ ဦး သေဆုံး

BVJ/ထက်အောင် _ မေ ၁၃ ၊ ၂၀၂၅

ရခိုင်ပြည်နယ် ရသေ့တောင်မြို့နယ် ထွန်းရဝေရွာဟောင်းကို စစ်ကောင်စီက လေကြောင်းဗုံးကြဲတိုက်ခိုက်ခဲ့တာကြောင့် ဒေသခံပြည်သူ ၁၀ ဦး သေဆုံးခဲ့ပြီး ၂၀ ထက်မနည်း ထိခိုက်ဒဏ်ရာရရှိခဲ့တယ်လို့ Arakan Princess Media က ဖော်ပြထားပါတယ်။

ဒီနေ့ မေလ ၁၃ ရက် မနက် ၁၀ နာရီဝန်းကျင်က ထွန်းရဝေရွာဟောင်းနေရာကို စစ်ကောင်စီက ဂျက်ဖိုက်တာလေယာဉ်နဲ့ ပေါင် ၅၀၀ ဗုံး ၂ လုံး ကြဲချတိုက်ခိုက်ခဲ့တာကြောင့် ၂ နှစ်အရွယ် ကလေးတစ်ဦးအပါအဝင် ၁၀ ဦး သေဆုံးခဲ့တာလည်း ဖြစ်ပါတယ်။

ဗုံးကြဲတိုက်ခိုက်ခံရမှုကြောင့် ထိခိုက်ဒဏ်ရာရရှိသူတွေကို အရေးပေါ်ဆေးဝါးကုသမှုတွေ လုပ်ဆောင်ပေးနေပြီး ၅ ဦးဟာ စိုးရိမ်ရတဲ့အခြေအနေမှာရှိနေတယ်လို့လည်း သိရပါတယ်။

ရသေ့တောင်မြို့နယ် ထွန်းရဝေရွာ လေကြောင်းဗုံးကြဲတိုက်ခိုက်မှုအခြေအနေနဲ့ပတ်သက်ပြီး အာရက္ခတပ်တော် (AA) သတင်းပြန်ကြားရေးတာဝန်ခံ ဦးခိုင်သုခကို Burma VJ က ဆက်သွယ်မေးမြန်းထားဆဲ ဖြစ်ပါတယ်။

ဒါ့အပြင် ဒီနေ့မနက်အစောပိုင်း ၄ နာရီဝန်းကျင်ကလည်း ကျောက်ဖြူမြို့နယ် လိပ်ခမော်ရွာဟောင်းကို စစ်ကောင်စီက ဒရုန်းနဲ့ ဗုံးကြဲတိုက်ခိုက်ခဲ့တာကြောင့် လိပ်ခမော်ရွာဘုန်းကြီးကျောင်း ကျောင်းဆောင်တစ်ခု ထိခိုက်ပျက်စီးခဲ့တယ်လို့လည်း သိရပါတယ်။

Photo: Arakan ArmyArakan@Princess Media