ဘားအံခရိုင်ထဲက တခေါ်ဘီခွီးတပ်စခန်းကို KNLA နဲ့KNDO ပူးပေါင်းတပ် တိုက်ခိုက်သိမ်းယူ
- BVJ
- 5 days ago
- 1 min read
BVJ/ဇော် - မေ ၉ ၊ ၂၀၂၅
ကရင်ပြည်နယ်၊ ဘားအံခရိုင်၊ ပိုင်ကျုံမြို့နယ်မှာရှိတဲ့ စစ်ကောင်စီ တခေါ်ဘီခွီးတပ်စခန်းကို တိုက်ခိုက်သိမ်းယူရရှိခဲ့တယ်လို့ ကရင်အမျိုးသားအစည်းအရုံး (KNU) က ဒီနေ့ မေလ ၉ ရက်မှာ ထုတ်ပြန်ခဲ့ပါတယ်။
ကော်သူးလေအုပ်ချုပ်နယ်မြေ၊ ဖားအံခရိုင်၊ ပိုင်ကျုံ (တာကရယ်) မြို့နယ်မှာရှိတဲ့ စစ်ကောင်စီတပ် ခလရ - ၂၄ အခြေချတပ်စွဲထားတဲ့ လေးပနာဒီ (ခေါ်) တခေါ်ဘီခွီးတပ်စခန်းကို ကရင်အမျိုးသားလွတ်မြောက်ရေးတပ်မတော် (KNLA) နဲ့ ကရင်အမျိုးသား ကာကွယ်ရေးတပ်ဖွဲ့(KNDO) ပူးပေါင်းတပ်တို့က ဒီနေ့မနက် ၉ နာရီမှာ အပြီးသတ် သိမ်းယူနိုင်ခဲ့တာဖြစ်တယ်လို့ ဖော်ပြထားပါတယ်။
တခေါ်ဘီခွီးတပ်စခန်းတိုက်ခိုက်သိမ်းယူနိုင်မှုအခြေအနေနဲ့ပတ်သက်ပြီး KNU သတင်းနဲ့ပြန်ကြားရေးဌာန ပြောရေးဆိုခွင့်ရှိသူ စောတောနီးကို Burma VJ က ဆက်သွယ်မေးမြန်းထားဆဲဖြစ်ပါတယ်။
တခေါ်ဘီခွီးစခန်းကို သိမ်းယူနိုင်မှုနဲ့အတူ မြိတ်-ထားဝယ်ခရိုင်၊ ထီးခီးဒေသအတွင်းက စစ်ကောင်စီခြေလျင်တပ်ရင်း ခလရ -၂၅ တပ်စွဲထားတဲ့ ထီးခီးဗျူဟာစခန်းကိုလည်း KNLA နဲ့ KNDO ဦးဆောင်မှုနဲ့အတူ တော်လှန်ရေးပူးပေါင်းတပ်တို့က ဒီနေ့မေလ ၉ ရက်နေ့မှာပဲ သိမ်းယူနိုင်ခဲ့ပါတယ်။
Comments