သေနတ်လုပြီးထွက်ပြေးဖို့ကြိုးစားတဲ့ဗိုလ်မှူးကြီးတစ်ဦးကို ပစ်ခတ်ရှင်းလင်းလိုက်ကြောင်း လင်းယုန်ညီနောင်ပြောက်ကျားတပ်ဖွဲ့ ထုတ်ပြန်
အီးကေ/BVJ_အောက်တိုဘာ ၂၂၊ ၂၀၂၆
တာဝန်ကျရဲဘော်ဆီကနေ သေနတ်လုပြီးထွက်ပြေးဖို့ကြိုးစားတဲ့ စစ်အုပ်စုလက်အောက်ခံသံချပ်ကာတပ်က ဗိုလ်မှူးကြီးဇော်မျိုးတင့်ကို ပစ်ခတ်ရှင်းလင်းလိုက်တယ်လို့ လင်းယုန်ညီနောင်ပြောက်ကျားတပ်ဖွဲ့က ဒီနေ့သတင်းထုတ်ပြန်ပါတယ်။
ဗိုလ်မှူးကြီးဇော်မျိုးတင့်ဟာ အောက်တိုဘာ ၁၈ ရက်နေ့က စစ်ကိုင်းမြို့ ကံတလူတိုးဂိတ်အနီးမှာ အရပ်ဝတ်နဲ့တစ်ယောက်ထဲကားမောင်းလာချိန်ဖမ်းဆီးရမိခဲ့တာဖြစ်ပါတယ်။ အဲဒီနောက် အောက်တိုဘာ ၁၉ ရက်နေ့မှာ အထက်ဌာနကိုပို့ဆောင်ဖို့ပြင်ဆင်နေချိန်မှာ တာဝန်ကျရဲဘော်တွေဆီက သေနတ်ကိုလုယူပြီးထွက်ပြေးဖို့ကြိုးစားခဲ့တာကြောင့် ပစ်ခတ်ရှင်းလင်းလိုက်ရတာလို့ ထုတ်ပြန်ချက်မှာဖော်ပြထားပါတယ်။
လက်ရှိမှာ ဗိုလ်မှူးကြီးဇော်မျိုးတင့်ရဲ့ စစ်မှုထမ်းကတ်ပြားဓာတ်ပုံလည်း အွန်လိုင်းပေါ်မှာပျံ့နှံ့နေတာကိုတွေ့ရပါတယ်။
ခရီးသွားတွေကို မကြာခဏဖမ်းဆီးငွေညှစ်လေ့ရှိတဲ့ အဲဒီကံတလူတိုးဂိတ်ဟာ စစ်ကိုင်းတိုင်းအထက်ပိုင်း၊ မကွေးတိုင်းနဲ့ ကချင်ပြည်နယ်တို့ကို သွားရာလမ်းဆုံမှာရှိတာဖြစ်ပြီး လွန်ခဲ့တဲ့ ဇန်နဝါရီ ၁၅ ရက်နေ့က လင်းယုန်ညီနောင် ပြောက်ကျားတပ်ဖွဲ့ကဝင်ရောက်တိုက်ခိုက်သိမ်းပိုက်ကာ ဂိတ်ကိုဖောက်ခွဲဖျက်ဆီးခဲ့တဲ့နေရာဖြစ်ပါတယ်။
လင်းယုန်ညီနောင်ပြောက်ကျားတပ်ဖွဲ့ဟာ စစ်ကိုင်းတိုင်းဒေသကြီးအတွင်းအခြေစိုက်လှုပ်ရှားနေတဲ့ ပြည်သူ့ကာကွယ်ရေး ပြောက်ကျားတပ်ဖွဲ့တစ်ခု ဖြစ်ပါတယ်။
Comments