ကယားနဲ့ရခိုင်ပဋိပက္ခဒေသက အမျိုးသမီးတွေ ဖယ်ကျဉ်ခံရမှုအမြင့်ဆုံးဖြစ်နေ
- BVJ
- Oct 8
- 1 min read
မိုနာ/BVJ_ စက်တင်ဘာ ၈၊ ၂၀၂၅
မြန်မာလူငယ် ၅ဦးမှာ တစ်ဦးဟာ NEETလို့ခေါ်တဲ့ ကျောင်းလည်းမတက်၊အလုပ်လည်းမလုပ်တဲ့ အခြေအနေမှာရှိနေပြီး ဒါဟာခန့်မှန်းခြေအရေအတွက်အရ လူဦးရေ ၃ သန်းခန့်ရှိတယ်လို့ UNDPမြန်မာ ကုလသမဂ္ဂအစီရင်ခံစာက ဖော်ပြပါတယ်။
ဒီထဲမှာမှ အမျိုးသမီးတွေက ၂၅ရာခိုင်နှုန်းပါဝင်နေပြီး အဲ့ဒီမှာ ကရင်နီ(ကယား)က ၄၂ရာခိုင်နှုန်း၊ ရခိုင်က ၃၂ရာခိုင်နှုန်းနဲ့ ဖယ်ကျဉ်ခံရမှုနှုန်း အမြင့်ဆုံးထဲမှာပါဝင်တယ်လို့ အစီရင်ခံစာအရသိရပါတယ်။
အခုလိုလူငယ်တွေက အလုပ်အကိုင်း၊ ပညာရေးစတာတွေကို ပါဝင်လုပ်ကိုင်ခြင်းမရှိတာရဲ့ နောက်ဆက်တွဲအကျိုးဆက်တွေက ဆိုးရွားပြီး လုပ်ငန်းကျွမ်းကျင်မှု၊ ဝင်ငွေရရှိနိုင်မှုသာမက လူမှုအဆင့်အတန်းမြင့်မားနိုင်မယ့် အခွင့်အလမ်းတွေကိုပါဆုံးရှုံးကြရတယ်လို့လည်း ဆိုထားပါတယ်။
ရခိုင်ဒေသခံအမျိုးသမီးတစ်ဦးက”အလုပ်ကတော့ အရင်စစ်မဖြစ်တုန်းကဆိုအရမ်းလုပ်ရတာ။ စစ်ဖြစ်တော့ ဒီမှာအလုပ်အကိုင်မကောင်းတော့ရန်ကုန်မှာလုပ်မယ်ဆိုပြီး တက်သွားတာ ရှိတာရောင်းချစားပြီးပဲ ရခိုင်ကိုပြန်လာရတယ်။ ရန်ကုန်မှာလည်း အရင်လိုမဟုတ်ဘူး။ လုပ်ငန်းရှာဖွေရတာအရမ်းခက်တယ်။ ဒီကြားထဲတော့ ကလေးတွေကျောင်းထားဖို့ ကြိုးစားနေရတယ်”လို့ Burma VJကို ပြောပါတယ်။
“ကျား-မ ကွာခြားမှုနှင့်မသန်စွမ်းမှုတို့သည်လည်း ကွာဟမှုကိုပိုမိုနက်ရှိုင်းစေပြီး၊ ရန်ကုန်ကဲ့သို့သော မြို့ပြဒေသကပင် ကြီးမားသောမျှော်မှန်းချက်များကြားမှ အခွင့်အလမ်းများနည်းပါးနေသည့် မြို့ပြပဟေဠိတစ်ခုအဖြစ် တည်ရှိနေသည်”လို့ အစီရင်ခံစာမှာဖော်ပြပါတယ်။
ဒီအခြေအနေတွေကိုအရေးယူကိုင်တွယ်ခြင်းမပြုရင် မြန်မာနိုင်ငံ ရေရှည်ဆင်းရဲနွမ်းပါးမှု၊ ဖယ်ကျဉ်ခံရမှုနဲ့ လူသားအရင်းအမြစ်တွေ အလဟဿဖြစ်မှု စတဲ့ အန္တရာယ်တွေကို ရင်ဆိုင်လာရနိုင်တယ်လို့လည်း ကုလသမဂ္ဂအစီရင်ခံစာကထောက်ပြထားပါတယ်။
Comments