NUGမြေအောက်ဆေးရုံတွေ လုံခြုံဘေးကင်းစွာရှိနေတယ်လို့ ဒေါက်တာဇော်ဝေစိုးအသိပေး

မိုနာ/BVJ_ မတ် ၁၀၊ ၂၀၂၆

ဒေါက်တာဇော်ဝေစိုး

အမျိုးသားညီညွတ်ရေးအစိုးရ-NUGကတည်ဆောက်နေတဲ့ Undergroundပရော့ဂျက်ထဲက မြေ‌အောက်ဆေးရုံ၊ဆေးခန်းတွေ ဘေးကင်းလုံခြုံစွာရှိနေတယ်လို့ အဲ့ဒီပရော့ဂျက်ကိုဦးဆောင်နေသူ NUGဝန်ကြီးချုပ်ရုံးဝန်ကြီး ‌ဒေါက်တာဇော်ဝေစိုးကပြောပါတယ်။

ပြီးခဲ့တဲ့လ ဖေဖော်ဝါရီ တတိယပတ်က မန္တလေးတိုင်း၊ နွားထိုးကြီးမြို့နယ်အတွင်းက NUGရဲ့မြေအောက်ဆေးရုံတခုကို စစ်အုပ်စုဘက်ကမိုင်းခွဲဖျက်ဆီးခဲ့ပါတယ်။ ဒါပေမယ့် အဲ့ဒီမိုင်းခွဲခံခဲ့ရတဲ့မြေအောက်ဆေးရုံဟာ အခုလုပ်နေတဲ့ Safe hospital, Safe healthcareပရော့ဂျက်နဲ့တည်ဆောက်ထားတာမဟုတ်ဘဲ အရင်ထဲကတည်ဆောက်ထားပြီးတဲ့ ဆေးရုံဖြစ်တယ်လို့ ဒေါက်တာဇော်ဝေစိုးကပြောပါတယ်။

“safe hospital, safe healthcareပရော့ဂျက်နဲ့ ပြည်သူမှပြည်သူသို့နဲ့ဆောက်နေတဲ့ဆေးရုံတွေက အခုအားလုံး ဘယ်ဆေးရုံမှမပျက်မဆီးဘဲနဲ့ ပြည်သူလူထုကို၊ ဒီတိုက်ပွဲဝင်နေတဲ့ရဲဘော်တွေကို ကျန်းမာရေးစောင့်ရှောက်မှုပေးနေပါတယ်လို့ ဆရာကပြည်သူလူထုကိုအသိပေးချင်တယ်။ ဟိုတလောကဖြစ်သွားတဲ့ဆေးရုံဟာ အဲ့ဒီပရော့ဂျက်ထဲက ဆေးရုံမဟုတ်ဘူး။ ဒီဟာက အဲ့ပရော့ဂျက်မတိုင်ခင်ထဲကလုပ်နေတဲ့ ဆေးရုံတရုံဖြစ်တယ်။ ဒီဟာက ဆရာတို့အနေနဲ့ဆိုရင် အဲ့ဒီနေရာကိုဦးစားပေးပြီးရွေးထားတာမဟုတ်ဘူး။ ဘာလို့လဲဆို‌တော့ ရန်သူစစ်ကြောင်းတွေရောက်နိုင်တဲ့နေရာ၊ လက်နက်ကြီးတွေထိနိုင်တဲ့နေရာဖြစ်နေတော့ ဆရာတို့အဲ့ဒီနေရာမျိုးကိုရွေးပြီး undergroundဆေးရုံ၊ စောစောကဗုံးကြဲခံနိုင်တဲ့ဆေးရုံမဆောက်ထားဘူးလို့ ဒါအသိပေးချင်တယ်”လို့ ဒေါက်တာဇော်ဝေစိုးက အခု မတ်လ ၈ရက်က ပြည်သူမှပြည်သူသို့ ဖြေကြားခြင်းအစီအစဉ်မှာပြောထားတာဖြစ်ပါတယ်။

ဒါ့အပြင် အခုလုပ်နေတဲ့မြေအောက်ဆေးရုံပရော့ဂျက်မှာ နိုင်ငံတကာအကူအညီမပါဝင်ဘဲ တော်လှန်ပြည်သူလူထုအားနဲ့ ဒေါ်လာ၈သိန်းရခဲ့တာရှိပြီး အဲ့ဒါနဲ့တည်ဆောက်နေတာဖြစ်ကြောင်းနဲ့ တည်ဆောက်တဲ့နေရာတွေမှာလည်း ရန်သူစစ်ကြောင်းထိုးနိုင်တဲ့နေရာမပါဝင်ဘူးလို့ပြောပါတယ်။

“Undergroundဆေးရုံတွေ အခုကျနော်တို့ဆောက်နေတယ်။ Undergroundဆေးရုံတွေဆောက်တဲ့ထဲမှာ သတ်မှတ်ထားတဲ့ထဲမှာ ရန်သူစစ်ကြောင်းထိုးနိုင်တဲ့နေရာတွေမပါပါဘူး။ အဲ့ဒါတွေအစထဲက ဖယ်ထားပြီးသားဖြစ်ပါတယ်။ ဒါကြောင့်အခုပြည်သူ့ရဲ့အားနဲ့တည်ဆောက်နေတဲ့ ဆေးရုံတွေထဲမှာ safe hospital, safe healthcareတွေဟာ အခုထက်ထိလုံခြုံစွာနဲ့ရှိနေတယ်။ ရှေ့ဆက်ပြီးတော့ တည်ဆောက်မှုတွေနဲ့လုံခြုံစွာနဲ့ကျန်းမာရေးစောင့်ရှောက်မှုကိုပေးနေတယ်လို့ ပြည်သူကိုအသိပေးချင်ပါတယ် ”

ဒါပေမယ့် ဘယ်နေရာမှာပဲဖြစ်ဖြစ် တော်လှန်ရေးထဲမှာကျန်းမာရေးစောင့်ရှောက်မှုပေးနေတဲ့ တော်လှန်ရေးဆေးရုံ၊ ဆေးခန်းတွေရဲ့လုံခြုံရေးကိုတော့ အထူးဦးစားပေးဆောင်ရွက်နေတယ်လို့လည်း ဒေါက်တာဇော်ဝေစိုးကပြောပါတယ်။

ဖေဖော်ဝါရီ ၁၉ရက်မှာမိုင်းခွဲဖျက်ဆီးခံလိုက်ရတဲ့ နွားထိုးကြီးမြို့နယ်ရှိNUGမြေအောက်ဆေးရုံဟာ ၂၀၂၄ခုနှစ်ကုန်ပိုင်းမှာစတင်လည်ပတ်ခဲ့တဲ့ ကုတင်တစ်ရာဆန့်ဆေးရုံဖြစ်ပါတယ်။ ထိခိုက်ဒဏ်ရာရလို့ ဆေးရုံ၊ဆေးခန်းသွားရခက်ခဲတဲ့ဒေသကလူတွေ၊ PDFတွေ၊စစ်ဘေးရှောင်တွေ အများအပြားကို အဲ့ဒီဆေးရုံမှာကုသကယ်ဆယ်ပေးနိုင်ခဲ့တယ်လို့ ဆေးရုံမှာတာဝန်ထမ်းဆောင်ခဲ့တဲ့ ဆရာဝန်တစ်ဦးကလည်း သူ့ရဲ့လူမှုကွန်ရက်မှာရေးသားထားတာကို တွေ့ရပါတယ်။

စစ်အုပ်စုဟာ ဆေးရုံ၊ဆေးခန်းနဲ့ ဆရာဝန်၊သူနာပြုတွေကို ရည်ရွယ်ချက်ရှိရှိနဲ့ပစ်မှတ်ထား ဗုံးကြဲတိုက်ခိုက်နေတဲ့အတွက် လုံခြုံစေဖို့နဲ့ဗုံးကြဲဒဏ်ခံနိုင်မယ့် မြေအောက်ဆေးရုံ၊ဆေးခန်းတွေတည်ဆောက်သွားမှာဖြစ်ကြောင်းကို ၂၀၂၅၊ မေလမှာ ဒေါက်တာဇော်ဝေစိုးကအသိပေးခဲ့တာဖြစ်ပါတယ်။