တရားမဝင်ခိုးဝင်မှုနဲ့ဖမ်းခံထားရတဲ့မြန်မာတွေက ထိုင်းရဲမွေးနေ့အတွက် Happy Birthdayဆိုပေးခဲ့လို့ အံ့သြနေ
- BVJ
- Jan 20
- 1 min read
အယ်နာ/BVJ_ဇန်နဝါရီ ၂၀၊ ၂၀၂၆
ထိုင်းနိုင်ငံ၊အန်ထောင်ပြည်နယ်ထဲက အဝေးပြေးလမ်းမကြီးပေါ်မှာတွေ့ရှိတဲ့ မြန်မာနိုင်ငံသားတွေကို နိုင်ငံအတွင်းတရားမဝင်ခိုးဝင်မှုနဲ့ မနေ့က ဇန်နဝါရီ ၁၉ ရက် ည၁၁နာရီခွဲအချိန်မှာ ထိုင်းရဲတပ်ဖွဲ့နဲ့လူဝင်မှုကြီးကြပ်ရေးက ဖမ်းဆီးလိုက်ပါတယ်။
မြန်မာ ၂၂ ဦးနဲ့ ပို့ဆောင်ပေးသူ ၃ ဦးကို ချိုင်ယိုးခရိုင်အတွင်းရှိ ချိုင်းယာရစ်အုပ်စု ကီလိုမီတာအမှတ် ၅၈ + ၁၀၀ အနီးရှိ ဘန်ကောက်ကိုဦးတည်နေတဲ့ အဝေးပြေးလမ်းမကြီးပေါ်မှာမောင်းနှင်လာတဲ့ ပစ်ကပ် ထရပ်ကား နှစ်စီးပေါ်ကနေဖမ်းမိခဲ့တာဖြစ်ပါတယ်။
အဲ့ဒီကားနှစ်စီးဟာ အရှိန်ပြင်းပြင်းမောင်းနှင်တဲ့အပြင် ရုတ်တရတ်လမ်းကြောင်းပြောင်းမောင်းနှင်ခြင်း၊ ပြတင်းမှန်တွေကို အမဲရောင်ဖုံးထားခြင်း ၊ အနောက်ဘက်မှာတာလပတ်တွေဖုံးအုပ်ထားခြင်း စတာတွေကြောင့် ရဲတပ်ဖွဲ့ကသံသယဖြစ် ဖမ်းဆီးခဲ့တာလို့ ထိုင်းသတင်းတွေမှာဖော်ပြပါတယ်။
ဖမ်းမိတဲ့ကားနှစ်စီးကိုစစ်ဆေးလိုက်ရာမှာ နိုင်ငံကူးလက်မှတ် ဒါမှမဟုတ် တရားဝင်ခရီးသွား စာရွက်စာတမ်းတွေမရှိတဲ့ မြန်မာ ၂၂ ဦးကိုတွေ့ခဲ့ရတာဖြစ်ပြီး သူတို့ဟာ မြန်မာနိုင်ငံဘက်ကနေ ထိုင်းနိုင်ငံ ၊ချင်းရိုင်ပြည်နယ် မယ်ဆိုင်ခရိုင်ကိုလှေနဲ့ကူးဝင်ရောက်ခဲ့ပြီး ဘန်ကောက်ကို အလုပ်လုပ်ဖို့သွားကြမှာဖြစ်တယ်လို့ သိရပါတယ်။
ထိုင်းမှာအလုပ်လုပ်ဖို့အတွက်ကိုလည်း မြန်မာတစ်ယောက်ကို ဘတ် ၁၃၀၀၀နှုန်းနဲ့ ပွဲစားတွေကိုပေးခဲ့ရတာဖြစ်ပါတယ်။
လက်ရှိမှာတော့ မှောင်ခိုပို့ဆောင်တယ်လို့စွပ်စွဲခံထားရသူ ၃ ဦးကိုလည်း တရားမဝင် ဝင်ရောက်လာသူတွေကိုခိုလှုံခွင့်ပေးပြီးကူညီခဲ့ပေးခဲ့တဲ့အတွက် တရားစွဲဆိုထားပြီး ဖမ်းဆီးမိတဲ့ မြန်မာ ၂၂ ဦးကိုလည်း ခွင့်ပြုချက်မရှိဘဲ နိုင်ငံအတွင်းဝင်ရောက်နေထိုင်မှုနဲ့ တရားစွဲဖို့အတွက် ဖမ်းမိတဲ့ကားတွေနဲ့အတူ ချိုင်ရိုးရဲစခန်းကိုခေါ်ဆောင်သွားတယ်လို့ ထိုင်း Khaosodသတင်းမှာ ဖော်ပြထားပါတယ်။
ဒါပေမယ့် အဲ့ဒီဖြစ်စဉ်မှာထူးထူးခြားခြားအနေနဲ့ စစ်ဆေးနေချိန်အတွင်းမှာ ထိုင်းရဲတပ်ဖွဲ့ထဲက ရဲတပ်ကြပ်ကြီး ဝီချိုင်းတမ်ဆာမိုင်ရဲ့မွေးနေ့ဖြစ်တဲ့အတွက် ကျန်ရဲတပ်ဖွဲ့ဝင်တွေက မွေးနေ့ကိတ်ခွဲပေးနေချိန်မှာ ဖမ်းဆီးထိန်းသိမ်းခံထားရတဲ့မြန်မာနိုင်ငံသားတွေကလည်း လက်ခုပ်တီးပြီး မွေးနေ့သီချင်း Happy Birthdayကိုအတူသီဆိုပေးခဲ့ကြတယ်လို့ ထိုင်းရဲတပ်ဖွဲ့က သတင်းဌာနတွေကိုပြောခဲ့ပါတယ်။
Comments