ကမ္ဘောဒီးယားနဲ့ငြိမ်းချမ်းရေးသဘောတူညီချက်ကို ထိုင်းဘက်က ယာယီရပ်ဆိုင်း

အေတီ/BVJ_နိုဝင်ဘာ ၁၀၊ ၂၀၂၅

၂၀၂၅ ခုနှစ်၊ နိုဝင်ဘာလ ၁၀ ရက်နေ့က ထိုင်း-ကမ္ဘောဒီးယားနယ်စပ်အနီးကင်းလှည့်နေစဉ် မြေမြှုပ်မိုင်းကြောင့်ဒဏ်ရာရရှိခဲ့သော ထိုင်းစစ်သားနှစ်ဦးကို ထိုင်းနိုင်ငံ၊ ဆီစကက်ပြည်နယ်ရှိ ဆေးရုံသို့ လွှဲပြောင်းပေးခြင်းမပြုမီ ကုသပေးနေစဉ်။

ကမ္ဘောဒီးယားနိုင်ငံနဲ့သဘောတူထားတဲ့ “ငြိမ်းချမ်းရေး သဘောတူညီချက်” အကောင်အထည်ဖော်မှုကို ယာယီရပ်ဆိုင်းလိုက်ကြောင်း ထိုင်းနိုင်ငံက ဒီနေ့ ထုတ်ပြန်ပါတယ်။ကမ္ဘောဒီးယားနယ်စပ် ဆီစကက်ပြည်နယ်မှာ မြေမြှပ်မိုင်းပေါက်ကွဲမှုဖြစ်ပွားခဲ့ပြီး ထိုင်းစစ်သားအချို့ဒဏ်ရာရခဲ့ပြီးနောက် ဒီရပ်ဆိုင်းတဲ့ အမိန့်ထွက်ပေါ်လာတာပါ။

နှစ်နိုင်ငံငြိမ်းချမ်းရေးသဘောတူညီချက်စာချုပ် လက်မှတ်ထိုးပွဲကို အောက်တိုဘာ လ၂၆ရက်နေ့မှာ မလေးရှားနိုင်ငံမှာကျင်းပခဲ့ပြီး အမေရိကန်သမ္မတ ဒေါ်နယ်ထရမ့်ကိုယ်တိုင်အသိသက်သေအဖြစ် ပါဝင်လက်မှတ်ရေးထိုးခဲ့ပါတယ်။

လူ ၄၀ ကျော်အထိသေဆုံးခဲ့တဲ့ နယ်စပ်ပဋိပက္ခအဆုံးသတ်ရေးအတွက်ရည်ရွယ်ထားတဲ့ငြိမ်းချမ်းရေးသဘောတူညီချက်ကို သူတို့အနေနဲ့ဆက်ပြီးလိုက်နာသွားမယ်လို့ ကမ္ဘောဒီးယားအစိုးရဘက်က ပြောပါတယ်။

ကင်းလှည့်တဲ့အချိန်မှာမြေမြှုပ်မိုင်းပေါက်ကွဲခဲ့တဲ့အတွက် ထိုင်းစစ်သားအချို့ဒဏ်ရာရပြီး၊ တစ်ယောက်ခြေထောက်ပြတ်သွားတယ်လို့ ဘန်ကောက်ပို့စ်သတင်းမှာဖော်ပြထားပြီး ထိုင်းဝန်ကြီးချုပ် အနုထင်ကိုယ်တိုင် ဒဏ်ရာရထားတဲ့စစ်သားတွေကို မနက်ဖြန်သွားကြည့်မယ်လို့ သိရပါတယ်။

ဇူလိုင်လမှာဖြစ်ပွားခဲ့တဲ့ ထိုင်းနဲ့ကမ္ဘောဒီးယားနှစ်နိုင်ငံကြား နယ်စပ်အငြင်းပွားမှုကနေ လူ ၄၃ဦးအနည်းဆုံးသေဆုံးခဲ့ပြီး လူ၃သိန်းကျော်အိုးအိမ်စွန့် ထွက်ပြေးခဲ့ရပါတယ်။

မလေးရှားမှာလက်မှတ်ထိုးခဲ့တဲ့ အပစ်အခတ်ရပ်စဲရေး သဘောတူစာချုပ်အရ ထိုင်းက ကမ္ဘောဒီးယားစစ်သား ၁၈ဦးကိုပြန်လွှတ်ပေးရမှာဖြစ်ပြီး နှစ်ဖက်လုံးက နယ်စပ်ဒေသမှာချထားတဲ့ လက်နက်ကြီးတွေနဲ့မြေမြှပ်မှိုင်းတွေကို ဖယ်ရှားပေးရမှာဖြစ်ပါတယ်။