စစ်အုပ်စုရွေးကောက်ပွဲ ယုံကြည်စရာမရှိဘူးလို့ပြောခဲ့ပြီး ဒေါ်အောင်ဆန်းစုကြည်ကိုအမြန်ပြန်လွှတ်ပေးဖို့ ထိုင်းနိုင်ငံခြားရေးဝန်ကြီးတောင်းဆို
- BVJ
- 2 days ago
- 1 min read
အီးကေ/BVJ_ နိုဝင်ဘာ ၂၆၊ ၂၀၂၅
လာမယ့် ဒီဇင်ဘာလထဲမှာ အာဏာသိမ်းစစ်ကောင်စီကဦးဆောင်ကျင်းပမယ့် ရွေးကောက်ပွဲဟာလွတ်လပ်မှုမရှိသလို ယုံကြည်နိုင်တဲ့အနေအထားမရှိဘူးလို့ ထိုင်းနိုင်ငံခြားရေးဝန်ကြီး ဆီဟာဆက်ခ် ဖူအန်ကက်ခွိုင်းကပြောလိုက်ပြီး၊လူထုခေါင်းဆောင်ဒေါ်အောင်ဆန်းစုကြည်ကို အမြန်ပြန်လွှတ်ပေးဖို့တောင်းဆိုလိုက်ပါတယ်။
"လွတ်လပ်ပြီးယုံကြည်စိတ်ချရတဲ့ရွေးကောက်ပွဲတစ်ခု ကျွန်တော်တို့ကဖြစ်စေချင်တယ်။ ဒါပေမယ့် အဲဒီလိုဖြစ်လာမှာမဟုတ်ဘူးဆိုတာလဲ ကျွန်တော်တို့သိပြီးသားပါ။ ဒီရွေးကောက်ပွဲကိုအသိအမှတ်ပြုနိုင်တဲ့အနေအထား ကျွန်တော်တို့မှာမရှိဘူး” လို့ ထိုင်းနိုင်ငံခြားရေးဝန်ကြီး ဆီဟာဆက်ခ် ဖူအန်ကက်ခွိုင်း က နိုဝင်ဘာ ၂၅ရက်မှာပြုလုပ်တဲ့ နိုင်ငံခြားသတင်းထောက်များအသင်းရဲ့ အခမ်းအနားတခုမှာပြောခဲ့ပါတယ်။
စစ်အုပ်စုအနေနဲ နိုင်ငံတကာအသိအမှတ်ပြုလိုချင်တယ်ဆိုရင် လူထုခေါင်း ဆောင်ဒေါ် အောင်ဆန်းစုကြည်ကို အမြန်လွှတ်ပေးဖို့လိုကြောင်း ထိုင်းနိုင်ငံခြားရေးဝန်ကြီးက ဖြည့်စွက်ပြောခဲ့ပါတယ်။
"ကျွန်တော်တို့အနေနဲ့ ပြောသင့်ပြောထိုက်တာကိုပြောရမယ်ဆိုရင်တော့ ဒေါ်အောင်ဆန်းစုကြည်ကိုလွှတ်ပေးဖို့ အချိန်တန်ပါပြီ။ သူ့ကိုချုပ်ထားတာလဲကြာပြီ။ အသက်အရွယ်အရ သူ့ကျန်းမာရေးအခြေအနေအရ ဒေါ်အောင်ဆန်းစုကြည်ကိုလွှတ်ပေးဖို့ကိစ္စကို အရင်ဆုံးလုပ်သင့်ပါတယ်”
အာဏာသိမ်းစစ်ကောင်စီက လာမယ့်ရွေးကောက်ပွဲ ပထမအဆင့်ကို ဒီဇင်ဘာလ ၂၈ရက်နေ့မှာစတင်ကျင်းပမှာဖြစ်ပြီး ဒုတိယအဆင့်ကို ဇန်နဝါရီလ ၁၁ ရက်နေ့မှာကျင်းပဖို့စီစဉ်ထားပေမယ့် နောက်ဆက်တွဲမဲပေးမှုတွေနဲ့ ရလဒ်ရက်စွဲကိုတော့ မကြေညာသေးပါဘူး။
Comments