၁၃နှစ်မိန်းကလေးကိုအဓမ္မပြုကျင့်သတ်ဖြတ်ခဲ့တဲ့သူကို NUGရဲချုပ်ဦးဆောင်ပြီး စစ်ဆေးနေ
- BVJ
- Oct 31
- 1 min read
မိုနာ/BVJ_အောက်တိုဘာ ၃၁၊ ၂၀၂၅
မကွေးတိုင်း၊ဆောမြို့မှာ ၁၃နှစ်အရွယ်မိန်းကလေးငယ်ကို အဓမ္မပြုကျင့်သတ်ဖြတ်မှု ကျူးလွန်သူ မင်းမင်းစိုးကို ထိရောက်တဲ့အရေးယူမှုပြုလုပ်နိုင်ရေး အမှုစစ်လုပ်ငန်းတွေဆောင်ရွက်နေပြီလို့ ဆောမြို့နယ်ပြည်သူ့အုပ်ချုပ်ရေးအဖွဲ့က အသိပေးလာပါတယ်။
လက်ရှိမှာ ကျူးလွန်သူမင်းမင်းစိုးကို NUGပြည်ထဲရေးနဲ့လူဝင်မှုကြီးကြပ်ရေးဌာနက ရဲချုပ်ဦးဆောင်ကြီးကြပ်မှုနဲ့ အမှုစစ်လုပ်ငန်းတွေဆောင်ရွက်နေတာဖြစ်ပြီး အမှုစစ်ဆေးပြီးအမှုတွဲတင်ရေး၊ တရားရုံးထုတ်စစ်ဆေးရေး၊ ထိရောက်တဲ့အရေးယူမှုပြုလုပ်ရေးတို့ကို အမြန်ဆုံးလုပ်ဆောင်နိုင်ရေးတို့ကို ကြပ်ကြပ်မတ်မတ်ဆောင်ရွက်နေတယ်လို့ မနေ့က အောက်တိုဘာ ၃၀ရက်ညပိုင်းမှာ ပြည်သူကိုအသိပေးထုတ်ပြန်လာတာပါ။
ဆောမြို့နယ်၊ ရတနာသီရိရပ်ကွက်မှာနေထိုင်တဲ့ မိန်းကလေးငယ်ကို ၂၁နှစ်အရွယ်ကိုမင်းမင်းစိုးဆိုသူက အောက်တိုဘာ ၂၁ရက်မှာအိမ်ကနေလာခေါ်သွားကာ မုဒိမ်းကျင့်၊သတ်ဖြတ်ခဲ့တာဖြစ်ပြီး အောက်တိုဘာ ၂၅ရက်မှာမှ မိန်းကလေးငယ်ရဲ့အလောင်းကို ပြည်သူ့ဆေးရုံဝန်းအတွင်းက အခန်းတခုအတွင်းမှာ ပုတ်ပွနေတဲ့အနေအထားနဲ့ ရှာဖွေတွေ့ရှိခဲ့ပါတယ်။
ဒါကြောင့်ကျူးလွန်သူကို ပြည်သူတွေရှေ့မှာတင်သေဒဏ်ပေးဖို့ဆိုပြီး ဒေသခံတွေက အောက်တိုဘာ ၂၆ရက်မှာဆန္ဒပြတောင်းဆိုခဲ့ကြပါတယ်။
ကျူးလွန်သူဟာ ဒေသကာကွယ်ရေးတပ်ဖွဲ့ဝင်တစ်ဦးဖြစ်တယ်ဆိုတဲ့ သတင်းတွေလည်းထွက်ပေါ်နေတာကြောင့် ဒီပေါ်မှာအတည်ပြုနိုင်ဖို့အတွက် ဆောမြို့နယ်ပြည်သူ့အုပ်ချုပ်ရေးအဖွဲ့ကို Burma VJကဆက်သွယ်မေးမြန်းထားဆဲဖြစ်ပါတယ်။
Comments