မိန်းကလေးငယ်ကို အဓမ္မပြုကျင့်သတ်ဖြတ်ခဲ့သူကို ပြည်သူ့ရှေ့မှာတင်သေဒဏ်ပေးဖို့ ဒေသခံတွေတောင်းဆို
- BVJ
- Oct 27
- 1 min read
မိုနာ/BVJ_အောက်တိုဘာ ၂၇၊ ၂၀၂၅
မကွေးတိုင်း၊ဆောမြို့မှာ ၁၃နှစ်အရွယ်မိန်းကလေးငယ်တစ်ဦး အဓမ္မပြုကျင့်ခံရပြီး သတ်ဖြတ်အလောင်းဖျောက်ဖျက်ခံရမှုအတွက် ကျူးလွန်သူတရားခံကို ပြည်သူတွေရှေ့မှာတင်သေဒဏ်ပေးဖို့ ဒေသခံတွေက မနေ့က အောက်တိုဘာ ၂၇ရက်မှာဆန္ဒပြတောင်းဆိုခဲ့ကြပါတယ်။
ဆောမြို့နယ်၊ ရတနာသီရိရပ်ကွက်မှာနေထိုင်တဲ့ မိန်းကလေးငယ်ကို ၂၁နှစ်အရွယ်ကိုမင်းမင်းစိုးဆိုသူက အောက်တိုဘာ ၂၁ရက်မှာအိမ်ကနေလာခေါ်သွားကာ မုဒိမ်းကျင့်၊သတ်ဖြတ်ခဲ့တာဖြစ်ပြီး အောက်တိုဘာ ၂၅ရက်မှာမှ မိန်းကလေးငယ်ရဲ့အလောင်းကို ပြည်သူ့ဆေးရုံဝန်းအတွင်းက အခန်းတခုအတွင်းမှာ ပုတ်ပွနေတဲ့အနေအထားနဲ့ ပြန်လည်တွေ့ရှိခဲ့တာဖြစ်ပါတယ်။
"သူနဲ့ကလေးမိသားစုနဲ့ကအရင်ထဲကရင်းနီးကြတော့ ကလေးကလည်းလိုက်သွားတာ။ ကျူးလွန်ပြီးတော့လည်း ကလေးအလောင်းကိုကုတင်အောက်မှာမိုးကာစနဲ့ဖုံးပြီးထားခဲ့တာ။ လိုက်ရှာကြရင်း အနံ့ထွက်လာမှသိကြတာ"လို့ ဆောဒေသခံတစ်ဦးက Burma VJ ကိုပြောပါတယ်။
ကျူးလွန်သူ ကိုမင်းမင်းစိုးကို အောက်တိုဘာ ၂၅ရက်ညနေမှာ ဒေသကာကွယ်ရေးတပ်ဖွဲ့တွေကဖမ်းဆီးမိခဲ့ပြီး ကျူးလွန်ခဲ့ကြောင်းကိုဝန်ခံထားတယ်လို့လည်းသိရပါတယ်။
အဲ့ဒီနောက် ကျူးလွန်သူကိုသေဒဏ်ပေးဖို့ ဒေသခံတွေက ဆန္ဒပြတောင်းဆိုခဲ့ကြတာပါ။
"ပြည်သူ့ယုံကြည်မှုရရှိရေး၊ ပြည်သူ့ရှေ့မှာချက်ခြင်းသတ်၊ တရားခံဖမ်းပြီး ဟိုပြောင်း၊ဒီပြောင်းလုပ်နေတာကို ဥပဒေလို့ခေါ်တာလား၊ သက်ငယ်မုဒိမ်း သေဒဏ်ပေး"ဆိုပြီး ဒေသခံတွေက ကြွေးကြော်ဆန္ဒပြတောင်းဆိုခဲ့ကြတာပါ။
အခုကျူးလွန်ခဲ့သူတရားခံဟာ အရင်ကလည်းမုဒိမ်းမှုတခုကိုကျူးလွန်ထားဖူးသူဖြစ်တယ်လို့လည်း ဒေသတွင်းသတင်းတွေမှာ ဖော်ပြထားကြပါတယ်။
လက်ရှိမှာ ကျူးလွန်သူကိုဖမ်းဆီးထားတဲ့အခြေအနေနဲ့ပတ်သက်ပြီး ဒေသတပ်ရင်း၊တပ်ဖွဲ့တွေဆီက သတင်းထုတ်ပြန်တာမျိုး မတွေ့ရသေးပါဘူး။
Comments