ရခိုင်မြို့နယ် ၅ ခုကို စစ်တပ်ဗုံးကြဲ၊သေဆုံးထိခိုက်သူများပြား
ယူဂရင်း/BVJ_စက်တင်ဘာ ၂၈၊ ၂၀၂၆
ဒီနေ့ စက်တင်ဘာ ၂၈ရက်၊နေ့လယ် ၁၂နာရီကျော်အချိန်မှာ ရခိုင်ပြည်နယ်၊ကျောက်တော်မြို့ ကစ္ဆပနဒီတံတားနားနဲ့အိန္ဒိယစျေးဝန်းကျင်ကို စစ်တပ်က ဂျက်တိုက်လေယာဉ်တစ်စင်းနဲ့လေကြောင်းဗုံးကြဲခဲ့တာကြောင့် အရပ်သားပြည်သူတွေနဲ့စျေးသည်တွေ သေဆုံးထိခိုက်ဒဏ်ရာရခဲ့တယ်လို့ အာရက္ခတပ်တော်-AAက သတင်းထုတ်ပြန်လာပါတယ်။
အလားတူပဲ ဒီနေ့ နေ့လယ် ၁၂နာရီ၃၅မိနစ်အချိန်ခန့်မှာလည်း ရခိုင်ပြည်နယ်၊သံတွဲမြို့နယ် ငပလီကို ဂျက်တိုက်လေယာဉ် (၁)စီးနဲ့ဗုံး(၂)လုံးကြဲချတိုက်ခိုက်ခဲ့သလို ပုဏ္ဏားကျွန်း၊ ရသေ့တောင်၊မင်းပြားမြို့နယ်တွေကိုလည်း လေကြောင်းကနေဗုံးကြဲတိုက်ခိုက်ခဲ့ပါတယ်။
မင်းပြားဒေသခံတစ်ဦးက"ပေါက်တောနဲ့မင်းပြားအစပ်ကိုကြဲချသွားတာ။ လေယာဉ်က ၇နာရီကျော်လောက်ကသွားတာ။ ဗုံးချတာလည်းကြားလိုက်တယ်။ ဒီနေ့က ၁၀တန်းစာမေးပွဲတွေလည်း စစစ်နေတယ်"လို့ Burma VJကိုပြောပါတယ်။
ဒီနေ့မနက်ပိုင်းမှာပဲ စစ်တပ်ကမြို့နယ်ငါးခုကိုဗုံးကြဲတိုက်ခိုက်ခဲ့တာဖြစ်ပြီး ကျောက်တော့မြို့နယ်ဗုံးကြဲတိုက်ခိုက်မှုအတွင်းမှာတော့ ထိခိုက်သေဆုံးသူများပြားခဲ့ပါတယ်။
လက်ရှိမှာ အာရက္ခတပ်တော်ဘက်ကတော့ ထိခိုက်သေဆုံးသူအရေအတွက်ကိုအတိအကျထုတ်ပြန်တာမရှိသေးပါဘူး။
Comments