ချင်းဒေသတွင်းတိုက်ပွဲမှာ စစ်အုပ်စုအထိနာနေ

BVJ/ဂျိုး_နိုဝင်ဘာ ၂၈၊ ၂၀၂၅

၂၀၂၅၊ နိုဝင်ဘာ ၂၇ရက်က တီးတိန်အဝင်ဂိတ်ကိုတိုက်ခိုက်ပြီးနောက် ချင်းတပ်ဖွဲ့ကဖမ်းမိခဲ့တဲ့ စစ်ကောင်စီတပ်သားနှစ်ဦး။

ချင်းပြည်နယ်မြောက်ပိုင်းက တီးတိန်နဲ့ဖလမ်းမြို့နယ်တွေကို စစ်အုပ်စုဘက်ကအင်အားအလုံးအရင်းနဲ့ ထိုးစစ်ဆင်တိုက်ခိုက်နေတာကြောင့် ဆက်တိုက်ဆိုသလိုနှစ်ဘက်တိုက်ပွဲတွေပြင်းထန်နေပြီး စစ်အုပ်စုဘက်ကအထိနာနေကြောင်းကို ချင်းတော်လှန်ရေးအင်အားစုတွေဘက်က ပြောကြပါတယ်။

အခုလိုတိုက်ပွဲပြင်းထန်နေတဲ့တီးတိန်မြို့အဝင်နားမှာ ဂိတ်ချတပ်စွဲထားတဲ့ စစ်ကောင်စီတပ်စခန်းတစ်ခုကို ချင်းညီနောင်တပ်ဖွဲ့တွေက မနေ့ကသိမ်းပိုက်နိုင်ခဲ့တယ်လို့ PDF Zolandတာဝန်ရှိသူတစ်ဦးက Burma VJကိုပြောပါတယ်။

“တီးတိန်မြို့အဝင် မုဒ်ဦးအနီးရှိ အင်အား ၆၀လောက်ရှိတဲ့ စကမ တပ်ခွဲ ၁ ခုစာလောက် တပ်စွဲထားတဲ့နေရာကို ချင်းညီနောင်တပ်ဖွဲ့ကဝင်သိမ်းတာပါ။ တိုက်ပွဲအတွင်း စကမတပ်သား ကျဆုံးတာရှိတယ်။ အရေအတွက်တိကျပြောလို့မရဘူး”

အခုသိမ်းယူလိုက်တဲ့ဂိတ်ကနေ စစ်အုပ်စုဟာ တီးတိန်မြို့လူအဝင်အထွက်ကိုထိန်းချုပ်ဖို့ ကြိုးစားနေတာကြောင့် ဂိတ်ကိုပြန်လည်သိမ်းယူနိုင်ရေးတိုက်ခိုက်ခဲ့တာဖြစ်တယ်လို့သိရပါတယ်။

ဒါ့အပြင်စခန်းသိမ်းတိုက်ပွဲအတွင်း လက်နက်ခဲယမ်းတွေနဲ့ စစ်သုံ့ပန်းတချို့ဖမ်းမိခဲ့ပြီး ဖမ်းဆီးထားတဲ့ စစ်သုံ့ပန်းတွေကိုစစ်ဆေးမေးမြန်းပြီးတော့ အရေးယူဆောင်ရွက်တာတွေ လုပ်ဆောင်သွားမယ်လို့လည်း ပြောပါတယ်။

“RPG ဗုံးသီးအပါအဝင် လက်နက်ခဲယမ်း သိမ်းဆည်းရမိ၊ စစ်သုံ့ပန်းဖမ်းဆီးရမိတာလည်းရှိပါတယ်။ စစ်သုံ့ပန်းတွေကို သက်ဆိုင်ရာဌာနကိုလွှဲပြောင်းပြီး ထိန်းသိမ်းမယ်။ စစ်ဆေးမေးမြန်းမှုနှင့် အရေးယူဆောင်ရွက်မှု ဆက်လက်လုပ်ဆောင်ဖို့ရှိပါတယ်”လို့ PDF Zolandတာဝန်ရှိသူက ပြောပါတတယ်။

PDF Zolandတပ်ဖွဲ့ဝင်များ(ပုံဟောင်း)။

စစ်အုပ်စုဟာ စစ်ကိုင်းတိုင်း၊ ကလေးမြို့ဘက်ကနေအင်အားအလုံးအရင်းနဲ့ စစ်ကြောင်းနှစ်ခုခွဲပြီးတော့ ချင်းပြည်နယ်က တီးတိန်နဲ့ဖလမ်းမြို့နယ်ဘက်ကို မြေပြင်ထိုးစစ်ဆင်တိုက်ခိုက်လာတာဖြစ်ပါတယ်။ အင်းအား(၅၀၀)ကျော်ပါတဲ့ စစ်အုပ်စု စစ်ကြောင်းတစ်ခုကတော့ ကလေး-တီးတိန်လမ်းကနေ သိုင်းငင်ကျေးရွာကိုဖြတ်ပြီး ဖလမ်းဘက်သို့ ဦးတည်ချီတက်လာနေတာပါ။

ကျန်တဲ့စစ်ကြောင်းတခုကတော့ ကလေး-ဂန့်ဂေါလမ်းကနေတစ်ဆင့် ဝေဘူလမြို့ကို သိမ်းယူပြီးတော့ ဖလမ်းဘက်ကို ဦးတည်တက်လာနေတယ်လို့ တော်လှန်ရေးတပ်တွေကပြောဆိုထားပါတယ်။

စစ်အုပ်စုရဲ့ထိုးစစ်တွေကို ချင်းဒေသတွင်းတော်လှန်ရေးတပ်တွေက ဟန့်တားတိုက်ခိုက်နေကြပြီး တိုက်ပွဲတွေလည်း နေ့တိုင်းနီးပါးပြင်းထန်နေတယ်လို့ သိရပါတယ်။

တိုက်ပွဲတွေအတွင်း စစ်ကောင်စီဘက်ကထိခိုက်ကျဆုံးမှုတွေများနေတာကြောင့် လေကြောင်း တိုက်ခိုက်မှုတွေကို အရှိန်မြင့်လုပ်ဆောင်လာနေတယ်လို့လည်း ချင်းတော်လှန်ရေး အင်အားစုတွေဘက်ကပြောဆိုထားကြပါတယ်။

အခုလိုတိုက်ပွဲတွေ တောက်လျောက်ပြင်းထန်နေတာကြောင့် ဖလမ်းနဲ့ တီးတိန်မြို့နယ်အနီးတဝိုက်က ထောင်နဲ့ချီတဲ့ဒေသခံတွေ ဘေးလွတ်ကိုထွက်ပြေးတိမ်းရှောင်နေရပြီး ဆေးဝါးနဲ့ စားနပ်ရိက္ခာ အရေးပေါ်လိုအပ်နေတယ်လို့ စစ်ဘေးဒုက္ခသည်အရေးကူညီဆောင်ရွက်နေသူတွေကလည်း ပြောပါတယ်။