ပေါင်းတည်မြို့နယ်က စစ်ကောင်စီ သိမ်ကုန်းတာဝါတိုင်စခန်းကို PDF တပ်ဖွဲ့ သိမ်းယူ
- BVJ
- May 21
- 1 min read
BVJ/အိုင်းရစ် _ မေ ၂၁ ၊ ၂၀၂၅
ပဲခူးတိုင်း ပေါင်းတည်မြို့နယ်က စစ်ကောင်စီ သိမ်ကုန်းတာဝါတိုင်စခန်းကို ပြည်သူ့ကာကွယ်ရေးတပ်မတော် (PDF) တောင်ပိုင်းတိုင်းစစ်ဒေသ၊ စစ်ဒေသခွဲ(၂) ပဲခူးတိုင်းစစ်ဌာန၊ ဗျူဟာ(၂၁) လက်အောက်ခံတပ်ဖွဲ့က အခု မေလ ၁၉ ရက်မှာ အပြီးသတ်သိမ်းယူနိုင်ခဲ့တယ်လို့ ပြည်ခရိုင်တပ်ရင်း ၃၆၀၂ က ထုတ်ပြန်ထားပါတယ်။
စစ်ကောင်စီအထိုင်ချတပ်စွဲထားတဲ့ သိမ်ကုန်းတာဝါတိုင်စခန်းကို အင်အားဖြည့်တင်းဖို့အတွက် ပေါင်းတည်မြို့နယ် ဝဲကြီးဆည်ဘောင်ကနေ အင်အား ၇၀ ဝန်းကျင်နဲ့ စစ်ကူလာတဲ့စစ်ကြောင်းကို ပြည်ခရိုင် ၃၆၀၂ တပ်ရင်း၊ ၃၆၀၁ တပ်ရင်းနဲ့ ပြည်ခရိုင် ပြည်သူ့ကာကွယ်ရေးအဖွဲ့ (ပကဖ) တို့က အခု မေလ ၁၈ ရက်မှာ ကြားဖြတ်တိုက်ခိုက်ခဲ့တာလည်း ဖြစ်ပါတယ်။
ပြည်ခရိုင် ကာကွယ်ရေးတပ်ဖွဲ့တွေရဲ့ ကြားဖြတ်တိုက်ခိုက်မှုအတွင်း စစ်ကောင်စီတပ်ဖွဲ့ဝင် ၃ ဦး သေဆုံးခဲ့သလို ထိခိုက်ဒဏ်ရာရတဲ့ စစ်ကောင်စီတပ်သားအချို့ သိမ်ကုန်းတာဝါတိုင်စခန်းထဲကို ထွက်ပြေးဝင်ရောက်သွားချိန် ကာကွယ်ရေးတပ်ဖွဲ့တွေက ဆက်လက်ပိတ်ဆို့တိုက်ခိုက်ခဲ့တာလည်း ဖြစ်ပါတယ်။
နှစ်ဖက်ထိတွေ့ပစ်ခတ်မှုအတွင်း စစ်ကောင်စီဘက်က လက်နက်ကြီး၊ လက်နက်ငယ်တွေနဲ့ ခုခံပစ်ခတ်ခဲ့ပေမဲ့ မေလ ၁၉ ရက်မှာ ပြည်ခရိုင် ကာကွယ်ရေးတပ်ဖွဲ့တွေက အပြီးသတ်သိမ်းယူနိုင်ခဲ့တာလည်း ဖြစ်ပါတယ်။
ပေါင်းတည်မြို့နယ်က စစ်ကောင်စီ သိမ်ကုန်းတာဝါတိုင်စခန်းကို ကာကွယ်ရေးတပ်ဖွဲ့တွေ ထိုးစစ်ဆင်သိမ်းယူခဲ့မှုနဲ့ပတ်သက်ပြီး တောင်ပိုင်းစစ်ဒေသ အမှတ် ၂ စစ်ဒေသခွဲ ပြောရေးဆိုခွင့်ရှိသူ စောဒိုရှင်းကို Burma VJ က ဆက်သွယ်မေးမြန်းထားဆဲ ဖြစ်ပါတယ်။
Comments