NUGအောက်က ကျောက်ဆည်ခရိုင်အမှတ်-၂ တပ်ရင်း နုတ်ထွက်
- BVJ
- Apr 24
- 1 min read
BVJ/မိုနာ_ ဧပြီ ၂၂၊ ၂၀၂၅
အမျိုးသားညီညွတ်ရေးအစိုးရ-NUG ၊ကာကွယ်ရေးဝန်ကြီးဌာန-MOD လက်အောက်ကနေ နုတ်ထွက်ကြောင်း ထွက်စာတင်ထားတယ်လို့ ကျောက်ဆည်ခရိုင်အမှတ်-၂တပ်ရင်းက ထုတ်ပြန်ပါတယ်။
NUG MODအောက်မှာ တာဝန်ထမ်းဆောင်လိုခြင်းဆန္ဒမရှိတော့တာကြောင့် တရားဝင်နုတ်ထွက်ပြီး တော်လှန်ရေးကို ကျသင့်နေရာကနေ သင့်ရာအဖွဲ့အစည်းနဲ့ စစ်ကောင်စီပြုတ်ကျတဲ့အထိ တိုက်ပွဲဝင်သွားမယ်လို့လည်း ပြည်သူလူထုကို အသိပေးထားပါတယ်။
နုတ်ထွက်စာကို NUG ကာကွယ်ရေးဝန်ကြီးဆီ အခုလ ၂၁ရက်စွဲနဲ့တင်ပြထားတယ်လို့လည်း သိရပါတယ်။
ကျောက်ဆည်ခရိုင်အမှတ်-၂တပ်ရင်းအနေနဲ့ NUGအောက်ကနုတ်ထွက်ရတာနဲ့ပတ်သက်ပြီး ကာကွယ်ရေးဝန်ကြီးဌာန ဒုတိယအတွင်းဝန် ဦးမောင်မောင်ဆွေနဲ့ ကျောက်ဆည်ခရိုင်အမှတ်-၂တပ်ရင်းကို Burma VJက ဆက်သွယ်မေးမြန်းထားဆဲဖြစ်ပါတယ်။
၂၀၂၃ခုနှစ် ဖေဖော်ဝါရီ ၂၈ရက်မှာ NUG MODက ကျောက်ဆည်ခရိုင်အမှတ်-၂တပ်ရင်းကို အတည်ပြုဖွဲ့စည်းပေးခဲ့တာဖြစ်ပြီး ပြီးခဲ့တဲ့ ၁၀၂၇ဒုတိယလှိုင်းဖြစ်တဲ့ ရှမ်း-မန်းစစ်ဆင်ရေးမှာ မန္တလေးပြည်သူ့ကာကွယ်ရေးတပ်မတော်၊ TNLAတို့နဲ့အတူ တစ်နှစ်နီးပါးတိုက်ပွဲတွေ ဖော်ဆောင်ခဲ့ပါတယ်။
ကျောက်ဆည်ခရိုင်အမှတ်-၂တပ်ရင်းဟာ ရှမ်း-မန်းစစ်ဆင်ရေးအပြီးမှာလည်း ရှမ်းတောင်စစ်ဆင်ရေးအဖြစ် ဓနုပြည်သူ့လွတ်မြောက်ရေးတပ်တော်DPLF/DPLAနဲ့အတူ တိုက်ပွဲဝင်နေတယ်လို့လည်း သိရပါတယ်။
NUG MODအောက်ကနေ လက်ရှိမှာ ရှမ်း၊ ကရင်နီနယ်စပ်က ရှမ်းတောင်တပ်ရင်းနှစ်ခုဖြစ်တဲ့ အမှတ် (၁၀၀၅) တပ်ရင်း (SSPDF)နဲ့ အမှတ် (၁၀၀၈) တပ်ရင်း (SSRY)၊ ဂဠုန်စစ်ကြောင်း၊ ကျားဖြူစစ်ကြောင်း၊ ဂန့်ဂေါ PDF(ပြည်သူ့ကာကွယ်ရေးတပ်ဖွဲ့-ဂန့်ဂေါတပ်ရင်း(ယောဒေသ)က) တို့လည်း နုတ်ထွက်ထားပြီး နုတ်ထွက်ခဲ့တဲ့တပ်ရင်းတွေဟာ MODမှာ (၂)နှစ်ကျော် သုံးနှစ် တာဝန်ထမ်းဆောင်ခဲ့တဲ့ တပ်ရင်းတွေဖြစ်ကြပါတယ်။
MODဝန်ကြီး ဦးရည်မွန်ကတော့ လက်နက် လုံလောက်အောင်တပ်ဆင်မပေးနိုင်တာရယ်၊ တပ်နေရာရွှေ့ပြောင်းရတာတွေမှာ မလိုက်ပါ(မပြောင်းရွှေ့)ချင်ကြတာကြောင့် MODကနေ နုတ်ထွက်တဲ့တပ်ရင်းတပ်ဖွဲ့တွေရှိနေတယ်လို့ အခုနှစ် ဖေဖော်ဝါရီ ၂ရက်နေ့မှာ ထုတ်ပြောထားပါတယ်။
ဒါ့အပြင် MODအောက်ကနုတ်ထွက်တဲ့ တပ်ရင်း၊တပ်ဖွဲ့တွေအနေနဲ့ လက်နက်တွေပြန်အပ်ရမယ်လို့လည်း ဝန်ကြီးဦးရည်မွန်က ပြောထားပါတယ်။
Comments