နမ္မတူကိုလေ‌ကြောင်းဗုံးကြဲတာကြောင့် စစ်‌ဘေးရှောင် သုံးဦးသေဆုံး

ယူဂရင်း/BVJ_ အောက်တိုဘာ ၂၊ ၂၀၂၅

နမ္မတူကို လေကြောင်းဗုံးကြဲပြီးနောက် မြင်တွေ့ရပုံ။(ဓါတ်ပုံ-TNLA)

စစ်ကောင်စီတပ်က ဒီနေ့မနက် ၇နာရီကျော်အချိန်လောက်မှာ တအာင်းတပ်မတော်-TNLAထိန်းချုပ်ထားတဲ့ နမ္မတူမြို့ကိုလေကြောင်းဗုံးကြဲခဲ့တာကြောင့် စစ်ဘေးရှောင်သုံးဦးသေဆုံးပြီး ကလေးငယ်တွေအပါအဝင် ၆ ဦးထိခိုက်ဒဏ်ရာရခဲ့ပါတယ်။

သေဆုံးသူတွေဟာ အမျိုးသမီးနှစ်ဦးနဲ့ အမျိုးသားတစ်ဦးဖြစ်ပြီး ကျောက်မဲကနေစစ်ရှောင်လာသူတွေလို့ သိရပါတယ်။

စစ်ကောင်စီဟာ နမ္မတူမြို့ကို (၁)လုံး၊ မန်တုံမြို့ကို (၄)လုံး ဗုံးကြဲချတိုက်ခိုက်ခဲ့တာကြောင့် ဗုံးပေါက်ကွဲပြီး နမ္မတူမြို့ရှိ ပြည်သူလူထု (၃)ဦးသေဆုံးခဲ့ကာ ကလေးအပါအဝင် (၆)ဦး ထိခိုက်ဒဏ်ရာရရှိခဲ့ကြောင်းနဲ့ နေအိမ် (၈)အိမ်လည်းထိခိုက်ပျက်စီးသွားခဲ့တယ်လို့ TNLAကလည်း ထုတ်ပြန်ပါတယ်။

နမ္မတူကို လေကြောင်းဗုံးကြဲပြီးနောက် မြင်တွေ့ရပုံ။(ဓါတ်ပုံ-TNLA)

ပြည်သူတွေအနေနဲ့ စစ်ရေးသတိရှိကြဖို့နဲ့ လေကြောင်းရန်ကာကွယ်ရေးနည်းလမ်းတွေကိုလည်း လိုက်နာကြဖို့ TNLAကသတိပေးထားပါတယ်။

စစ်ကောင်စီတပ်ဟာ TNLAသိမ်းပိုက်ထိန်းချုပ်ထားတဲ့ နောင်ချိုမြို့ကို သြဂုတ်လအတွင်း၊ ကျောက်မဲမြို့ကို အခု အောက်တိုဘာ ၁ရက် ညနေပိုင်းတို့မှာ ပြန်လည်သိမ်းယူနိုင်ခဲ့ပြီး ကျောက်မဲ-နောင်ချို-ပြင်ဦးလွင် ပြည်ထောင်စုကားလမ်းပိုင်းကိုပြန်လည်စိုးမိုးထိန်းချုပ်နိုင်ခဲ့ပြီလို့ ဒီနေ့ထုတ်သတင်းစာတွေမှာ ကြေညာပါတယ်။