မြောက်ဦး ပြည်သူ့ဆေးရုံဗုံးကြဲခံရမှုအတွင်း အမျိုးသမီး ၁၇ယောက်အပါအဝင် ၃၀ ကျော်အထိ သေဆုံးမှုရှိလာ

ယူဂရင်း/BVJ_ဒီဇင်ဘာ ၁၁၊ ၂၀၂၅

မြောက်ဦးပြည်သူ့ဆေးရုံကြီးကို ဒီဇင်ဘာ ၁၀ရက်ညပိုင်းက လေကြောင်းဗုံးကြဲပြီးနောက်မြင်တွေ့ရပုံ (ဓါတ်ပုံ-APM)

မနေ့က အပြည်ပြည်ဆိုင်ရာလူ့အခွင့်အရေးနေ့ဖြစ်တဲ့ ဒီဇင်ဘာ ၁၀ရက်နေ့ ည၉နာရီကျော်အချိန်မှာ ရခိုင်ပြည်နယ်၊မြောက်ဦးမြို့ ပြည်သူ့ဆေးရုံကြီးကို စစ်အုပ်စုကဂျက်ဖိုက်တာနဲ့ဗုံးကြဲခဲ့တာကြောင့် သေဆုံးသူ ၃၀ကျော်အထိရှိခဲ့တယ်လို့ ရခိုင်ဒေသခံတွင်းသတင်းရင်းမြစ်တွေဆီကသိရပါတယ်။

ရခိုင်ဒေသတွင်းအခြေအနေတွေကိုဖော်ပြနေတဲ့ အာရက္ခမင်းသမီးမီဒီယာမှာတော့ သေဆုံးသူ ၃၃ယောက်ထဲမှာ အမျိုးသမီး ၁၇ယောက်နဲ့ အမျိုးသား ၁၆ယောက်ပါဝင်ပြီး ပြင်းထန်ဒဏ်ရာရရှိထားတဲ့သူ ၂၇ယောက်ရှိတယ်လို့ ဖော်ပြပါတယ်။

မြောက်ဦးပြည်သူ့ဆေးရုံကြီးကို ဒီဇင်ဘာ ၁၀ရက်ညပိုင်းက လေကြောင်းဗုံးကြဲပြီးနောက်မြင်တွေ့ရပုံ (ဓါတ်ပုံ-APM)

စစ်အုပ်စုဟာ အရပ်သားပြည်သူတွေဆေးကုသမှုခံယူနေတဲ့ ဆေးရုံကြီးကို ပေါင်၅၀၀ ဗုံးနှစ်လုံးနဲ့ကြဲချသွားတာဖြစ်ပါတယ်။

ရှေးဟောင်းမြို့တော်ဖြစ်တဲ့ မြောက်ဦးကို အာရက္ခတပ်တော်-AAက ပြီးခဲ့တဲ့ ၂၀၂၄ခုနှစ်အတွင်းမှာ သိမ်းပိုက်ထိန်းချုပ်ထားတာဖြစ်ပြီး စစ်အုပ်စုက လက်နက်ကြီးနဲ့ပစ်ခတ်တာတွေ၊ လေကြောင်းဗုံးကြဲတာတွေကို လုပ်ဆောင်နေတာဖြစ်ပါတယ်။