တော်လှန်ရေးတပ်ဖွဲ့တွေလုပ်မယ့်ရွှေမျောစီမံကိန်းအပေါ် ကန့်ကွက်ဆန္ဒပြသူတွေ ဖမ်းဆီးခံရမှုကနေမလွတ်မြောက်လာသေး
- BVJ
- Nov 13
- 1 min read
မိုနာ/BVJ_နိုဝင်ဘာ ၁၃၊ ၂၀၂၅
စစ်ကိုင်းတိုင်း၊ ကလေးခရိုင်၊ မင်းကင်းမြို့နယ်ထဲက တော်လှန်ရေးတပ်ဖွဲ့တွေဦးစီးလုပ်ကိုင်မယ့် လောင်းပြည့်ကျွန်းရွှေမျောစီမံကိန်းကို ဒေသခံတွေက အခုလ ၈ရက်မှာ ဆန့်ကျင်ကန့်ကွက်ဆန္ဒပြခဲ့တာကြောင့် အဲ့ဒီထဲကဦးဆောင်သူတချို့ကို ဒေသတွင်းPDFတွေက ဖမ်းဆီးထားပါတယ်။
ရွှေမျောတိုက်ဖို့ပြင်ဆင်နေတာကိုရပ်တန့်ဖို့နဲ့ ဒေသပကဖ၊ ပအဖတာဝန်ခံတွေကို တာဝန်ကနေရပ်နားဖို့ ဒေသခံတွေကန့်ကွက်ဆန့်ကျင်ဆန္ဒပြခဲ့ကြတာဖြစ်ပြီး အောက်တိုဘာ ၂ရက်နဲ့ ၅ရက်နေ့တို့မှာလည်း ဆန္ဒထုတ်ဖော်ခဲ့ကြပေမယ့် ဆက်လက်လုပ်ကိုင်နေတာကြောင့် အခုတတိယအကြိမ်အဖြစ် ထပ်မံဆန္ဒပြတာလို့ သိရပါတယ်။
အခုတခေါက်ဆန္ဒပြအပြီးမှာတော့ ဆန္ဒပြရာမှာဦးဆောင်ပါဝင်သူတွေဆိုပြီး တိုက်နယ် ၂ ပကဖခေါင်းဆောင် ဦးဇော်ဝမ်း၊ တိုက်နယ် ၂ ပအဖခေါင်းဆောင် ဦးကျော်စိုးလင်း၊ အုန္နဲဘုတ်ကျေးရွာကကိုဉာဏ်လင်းတို့ဟာ သူတို့နေအိမ်တွေမှာ နိုဝင်ဘာ ၁၁ ရက်မနက်အစောပိုင်းမှာ ဖမ်းဆီးခံလိုက်ရပါတယ်။
“မေးစရာရှိလို့ဆိုပြီး သူတို့အိမ်တွေမှာဝင်ဖမ်းသွားတာ။ PDF ကလေး ခရိုင်တပ်ရင်း ၇နဲ့၁၀ ( မင်းကင်းမြို့နယ်တပ်ရင်း ၁နဲ့၄)က အင်အားတစ်ရာကျော်လောက်နဲ့ မနက်နှစ်နာရီလောက်မှာဝင်ဖမ်းသွားတာ။ အခုထိပြန်မလွတ်လာသေးဘူး။ ညှိနေတုန်းလို့ပြောတယ်။ အခုဆန္ဒပြပွဲမှာပါတဲ့တခြားသူတွေကလည်း သူတို့လည်းဖမ်းခံရမှာကြောက်နေကြတော့ ညဆိုကောင်းကောင်းမအိပ်ရဲကြဘူးဖြစ်နေတာ”လို့ လုံခြုံရေးအရအမည်မဖော်လိုတဲ့ ဒေသခံတစ်ဦးက Burma VJကိုပြောပါတယ်။
ဆန္ဒပြပွဲမှာပါဝင်သူတွေဟာ မင်းကင်းမြို့နယ် သင်တောကျေးရွာ၊ ညောင်ပင်သာကျေးရွာ၊ အုန္နဲဘုတ်ကျေးရွာ၊ ဘင်ကျေးရွာ၊ကျောက်ခံတက်ရွာ၊ အနောက်တောကျေးရွာစတဲ့ရွာတွေက ဒေသခံတွေဖြစ်ကြပြီး အင်အားထောင်နဲ့ချီပါဝင်တယ်လို့ သိရပါတယ်။
ဒါနဲ့ပတ်သက်ပြီး ဖမ်းဆီးတယ်ဆိုတဲ့PDFတပ်ဖွဲ့တွေကို Burma VJက ဆက်သွယ်ဖို့ကြိုးစားနေဆဲဖြစ်ပါတယ်။
မင်းကင်းမြို့နယ် ပကဖတာဝန်ခံကတော့ မင်းကင်းမြို့နယ်၊ လောင်းပြည့်ကျွန်းရွှေမျောကို တော်လှန်ရေးရန်ပုံငွေအတွက်ဆိုပြီး တော်လှန်ရေးတပ်တချို့က NUGသယံဇာတဝန်ကြီးဆီစာတင်ကာ ပြုလုပ်ခဲ့တာဖြစ်တယ်လို့ မြေလတ်အသံသတင်းဌာနကိုဖြေထားတာတွေ့ရပါတယ်။
Comments