အလွတ်တန်းသတင်းထောက် မထက်ထက်ခိုင်အပါအဝင် နိုင်ကျဥ်း ၈၃ ဦး သာယာဝတီထောင်က ဒီနေ့လွတ်မြောက်လာ
- BVJ
- Dec 2, 2025
- 1 min read
အေတီ/BVJ_ ဒီဇင်ဘာ ၁၊ ၂၀၂၅
သာယာဝတီထောင်က နိုင်ငံရေးအကျဥ်းသား (၈၃)ဦးဟာ ဒီနေ့ဒီဇင်ဘာ ၁ရက်နေ့မှာ ပြန်လွတ်လာပြီလို့သိရပါတယ်။
လွတ်လာတဲ့နိုင်ငံရေးအကျဥ်းသား (၈၃)ဦးဟာ အမျိုးသား(၇၇)ဦးနဲ့ အမျိုးသမီး(၆)ဦးတို့ဖြစ်ပြီး အဲ့ဒီထဲမှာ BBC Media Actionရဲ့ “ခံစားကြည့်” အစီအစဉ်တင်ဆက်သူ မထက်ထက်ခိုင်လည်းပါဝင်လာပါတယ်။
အလွတ်သတင်းထောက် မထက်ထက်ခိုင်ဟာ ပုဒ်မ၅၀၅(က)အပြင် ပုဒ်မ ၁၇/၁နဲ့ စုစုပေါင်း ထောင်ဒဏ်၆နှစ်ချခံထားရတဲ့သူဖြစ်ပြီး သူနဲ့အတူ ၁၇/၁ ပုဒ်မနဲ့ထောင်ချခံထားတဲ့အမျိုးသမီးနှစ်ဦးလည်း ဒီနေ့လွတ်မြောက်လာတဲ့သူတွေထဲ ပါဝင်တယ်လို့ သာယာဝတီထောင်ကလွတ်မြောက်လာတဲ့သူတွေနဲ့ နီးစပ်သူတစ်ဦးက Burma VJကိုအတည်ပြုပါတယ်။
“သာယာဝတီထောင်က မသဥ္ဇာဇော်၊ မမြမဒီ၊ မလွင်လွင်ညွန့်တို့နဲ့ အတူ ၅၀၅(က)အပြင် ၁၇/၁ပုဒ်မပါတွဲခံထားရတဲ့ ပေါက်စီ ခေါ် မဝေဝေအောင်၊မထက်ထက်ခိုင်၊ မထက်ထက်အောင်တို့လည်းဒီနေ့လွတ်တယ်”လို့ နီးစပ်သူက ပြောပါတယ်။
သာယာဝတီထောင်က ဒီနေ့လွတ်မြောက်လာတဲ့သူတွေထဲမှာ ၅၀၅(က)အပြင် ၁၇/၁ပုဒ်မလိုပုဒ်မနဲ့တရားစွဲခံရတဲ့သူ ဘယ်လောက်ပါဝင်နေလဲဆိုတာသိနိုင်ဖို့ ဆက်လက်စုံစမ်းနေဆဲဖြစ်ပါတယ်။
အာဏာသိမ်းစစ်အုပ်စုက အလွတ်သတင်းထောက်မထက်ထက်ခိုင်ကို ဝါရင့်သတင်းစာဆရာဦးစည်သူအောင်မြင့်နဲ့အတူ သြဂုတ်လ ၁၅ ရက်နေ့ကဖမ်းဆီးခဲ့ပြီး ၅၀၅(က)ပုဒ်မနဲ့ ထောင် ၃ နှစ်၊ ၁၇/၁ပုဒ်မနဲ့ ထောင် ၃ှ နှစ် စုစုပေါင်းထောင် ၆ နှစ်ချမှတ်ခဲ့တာဖြစ်ပါတယ်။
ဒီနေ့လွတ်မြောက်တဲ့သူတွေထဲမှာ မထက်ထက်ခိုင်နဲ့အမှုတွဲဖြစ်တဲ့ သတင်းစာဆရာဦးစည်သူအောင်မြင့်လည်း ရန်ကုန်၊အင်းစိန်ထောင်ကလွတ်လာတဲ့အထဲပါဝင်တယ်လို့ သိရပါတယ်။
Comments