ကျောက်ဖြူလေကြောင်းဗုံးကြဲခံရမှုအတွင်း ဒဏ်ရာရထားသူအဘွားအိုတစ်ဦး ထပ်မံသေဆုံး
- BVJ
- Jan 20
- 1 min read
BVJ/ဂျိုး_ဇန်နဝါရီ ၂၀၊ ၂၀၂၆
ရခိုင်ပြည်နယ်တောင်ပိုင်း ကျောက်ဖြူမြို့နယ်အတွင်းက ကျောက်ကလေကျေးရွာတွေကို စစ်အုပ်စုက အခုလ ဇန်နဝါရီလ ၁၈ရက်ကလေကြောင်းဗုံးကြဲတိုက်ခိုက်ခဲ့တာကြောင့် စစ်ဘေးရှောင်အမျိုးသမီးနှစ်ဦးပွဲချင်းပြီး သေဆုံးခဲ့သလို နောက်ထပ်နှစ်ဦးလည်းထိခိုက်ဒဏ်ရာရခဲ့ပါတယ်။
ထိခိုက်ဒဏ်ရာရရှိသွားသူထဲကတစ်ဦးဖြစ်တဲ့ အသက် ၉၅နှစ်အရွယ် ဒေါ်အောင်မြနုဟာ ဆေးကုသမှုခံယူနေချိန်အတွင်း မနေ့က မနက်ပိုင်းမှာထပ်မံသေဆုံးသွားတာကြောင့် သေဆုံးသူ ၃ ဦး အထိ ရှိလာနေတာပါ။
ဒေါ်အောင်မြနုဟာ ကျောက်ဖြူမြိုနယ်၊ ရေနံတောင်ကျေးရွာကနေ ကျောက်ကလေကျေးရွာကို စစ်ဘေးရှောင်လာတဲ့စစ်ဘေးဒုက္ခသည်တစ်ဦးလည်း ဖြစ်ပါတယ်။
ဒါ့အပြင် မနေ့ကလည်း ကျောက်ကလေကျေးရွာကို စစ်အုပ်စုကဒရုန်းတွေနဲ့ လာရောက်ဗုံးကြဲခဲ့ပြီး နေအိမ်တချို့ မီးလောင်ပျက်စီးသွားတာလည်းဖြစ်ပါတယ်။ အခုလို လေကြောင်းတိုက်ခိုက်မှုတွေကြောင့် ကျောက်ကလေးကျေးရွာမှာနေထိုင်ကြတဲ့ စစ်ဘေးဒုက္ခသည်တွေအပြင် ရွာခံတွေပါဘေးလွတ်ရာကို ထွက်ပြေးတိမ်းရှောင်နေကြရတယ်လို့ ဒေသခံတွေကပြောပါတယ်။
စစ်အုပ်စုနဲ့ အာရက္ခတပ်တော်-AAကြားတိုက်ပွဲတွေရှိနေတဲ့ ကျောက်ဖြူမြို့နယ်အတွင်းက ကျေးရွာတော်တော်များများကို စစ်အုပ်စု လေကြောင်းဗုံးကြဲတာတွေ၊ ရေတပ်ကနေ လက်နက်ကြီးတွေနဲ့ ပစ်ခတ်တာတွေကိုရှိနေတာကြောင့် အရပ်သားထိခိုက်သေဆုံးမှုတွေလည်းရှိနေပါတယ်။
ဒါ့အပြင် သိန်းနဲ့ချီတဲ့ ကျောက်ဖြူဒေသခံတွေဟာလည်း စစ်အုပ်စုလေကြောင်းတိုက်ခိုက်မှုတွေကြောင့် နေရာအတည်တကျမရှိထွက်ပြေးနေကြရသလို စားဝတ်နေရေးနဲ့ ကျန်းမာရေးဆိုင်ရာအခက်အခဲတွေနဲ့ ရင်ဆိုင်နေကြရတယ်လို့ စစ်ဘေးဒုက္ခသည်အရေး ဆောင်ရွက်နေသူတွေက ပြောဆိုထားကြပါတယ်။
Comments