ပေါ်တာဆွဲပြီး အဓမ္မစစ်မှုထမ်းခေါ်ဆောင်ခံရတဲ့ စစ်ကောင်စီတပ်သားနှစ်ဦး သာယာဝတီ PDFတပ်ဖွဲ့ နဲ့ ပူးပေါင်း
- BVJ
- May 23
- 1 min read
BVJ/ဇော် - မေ ၂၃ ၊ ၂၀၂၅
ပဲခူးတိုင်း၊ သာယာဝတီခရိုင်၊ နတ်တလင်းမြို့နယ် ပျဉ်ပုံရွာမှာ ရောက်ရှိနေတဲ့ စစ်ကောင်စီစစ် ကြောင်းက တပ်သား ၂ ဦး သာယာဝတီခရိုင် အမှတ် - ၁ ပြည်သူ့ကာကွယ်ရေးတပ်မတော် (PDF) တပ်ရင်း (၃၈၀၁) ထံ ပူးပေါင်းလာတယ်လို့ ဒီနေ့ မေလ ၂၃ ရက်နေ့မှာ ထုတ်ပြန်ပါတယ်။
အခုလ ၁၉ ရက်နေ့က တပ်သား နိုင်ဝေလင်းနှင့် တပ်သား ရာဇာမင်းတို့ ၂ ဦးဟာ MA 1 သေနတ် (၂) လက်၊ လက်ပစ်ဗုံး (၁) လုံး၊ စကားပြောစက် (၁) လုံး၊ ကျည်ဘောက် (၆) ခုတို့ကို ယူဆောင်ပြီး သာယာဝတီခရိုင် အမှတ် - ၁ တပ်ရင်း (၃၈၀၁)ထံ ပူးပေါင်းလာပါတယ်။ သူတို့ရဲ့စစ်ကောင်စီတပ်ရင်းက အရပ်သားပြည်သူတွေကို အကြမ်းဖက်လုပ်ရပ်တွေ လုပ်ဆောင်ခိုင်းတာကြောင့် ထွက်ပြေးအလင်းဝင်ခဲ့တာလို့ ထုတ်ပြန်ချက်ထဲ ဖော်ပြထားပါတယ်။
အလင်းဝင်လာတဲ့သူ ၂ ဦးဟာ ဧရာဝတီတိုင်းမှာ ပေါ်တာဆွဲခံရပြီး အဓမ္မစစ်မှုထမ်းအဖြစ် ဖမ်းဆီးခံရတဲ့သူတွေဖြစ်ပါတယ်။ စစ်မှုထမ်းခေါ်ဆောင်ခံခဲ့ရပြီးနောက် တပ်တွင်းလုံခြုံရေးနဲ့ သက်သာချောင်ချိရေးလုပ်ငန်းတွေမှာ ကနဦးခိုင်းစေခံခဲ့ရတယ်လို့ ဆိုပါတယ်။
အဲဒီနောက်ပိုင်း နတ်တလင်းမြို့နယ် ပျဉ်ပုံ(ပျူစောထီး)ရွာကို စစ်ကောင်စီစစ်ကြောင်းနဲ့အတူ လိုက်ပါလာခဲ့ရပြီး အရပ်သားပြည်သူတွေရဲ့ နေအိမ်တွေမီးရှို့ဖျက်ဆီးတာ ၊ ဒေသခံတွေကို ဖမ်းဆီးနှိပ်စက်တာတွေ လုပ်ဆောင်ခဲ့ရတယ်လို့ သိရပါတယ်။ တော်လှန်ရေးတပ်တွေနဲ့ ပူးပေါင်းပြီး စစ်အာဏာရှင်တော်လှန်ရေးမှာ ပြန်လည်တိုက်ပွဲဝင်မည်လို့ စီစဥ်ထားကြောင်း အလင်းဝင်လာတဲ့သူနှစ်ဦးက ပြောပါတယ်။
Comments