ရာထူးငယ်ငယ်နဲ့ တပ်ချုပ်မင်းအောင်လှိုင်ရဲ့ အနီးကပ် လူယုံဖြစ်လာသူ

■ အေတီ/မိုနာ

လက်ရှိအချိန်မှာ ဘယ်သူ့ကိုမှအပြည့်အဝယုံလို့မရတဲ့ အခြေအနေနဲ့ကြုံတွေ့နေရတဲ့ အာဏာသိမ်း စစ်ခေါင်းဆောင်ဖြစ်သူ ဗိုလ်ချုပ်မှူးကြီးမင်းအောင်လှိုင်ဟာ သူ့အနားကို တော်ရုံလူကပ်ခွင့် မပေးတော့ပါဘူး။ ဒါပေမဲ့ လူကြီးသားလည်းမဟုတ်၊ ရာထူးအရလည်းငယ်သေးပေမဲ့ တပ်ချုပ်အနား အနီးကပ် ကပ်ခွင့်ရနေတဲ့သူတစ်ဦးကတော့ ရုရှားပြန် ဗိုလ်မှူးကျော်ဇောရဲဖြစ်ပါတယ်။ 

ဗိုလ်မှူးကျော်ဇောရဲဟာ စစ်ကောင်စီအတွက် ဒီဇယ်အပါအဝင် လောင်စာဆီတွေ မှောင်ခိုတင်သွင်းတဲ့ ကွန်ရက်မှာအခရာကျသလို တပ်ချုပ်မင်းအောင်လှိုင်ရဲ့ဝါဒဖြန့်ချိရေး လုပ်ငန်းတွေ၊ နိုင်ငံရေး အကောင်အထည်ဖော်မှုတွေ၊ လုံခြုံရေးဆိုင်ရာလုပ်ငန်းနဲ့ စစ်လက်နက်ပစ္စည်းဝယ်ယူမှုတွေမှာ ပါဝင်နေပါတယ်။ 

စုံစမ်းထောက်လှမ်းဖော်ပြထားတဲ့ ဗိုလ်မှူးကျော်ဇောရဲအကြောင်း ယခုသတင်းဆောင်းပါးကို သူနဲ့ခေတ်ပြိုင် ရုရှားပြန်စစ်တပ်အရာရှိတွေကို မေးမြန်းတင်ဆက်ထားတာဖြစ်ပါတယ်။

ကျော်ဇော်ရဲက ဘယ်သူလဲ

ဒုမှူးကြီး/မှူးကျော်ဇော်ရဲဟာ စစ်တက္ကသိုလ် DSA အပတ်စဉ်(၄၇) ကနေ ၂၀၀၄ ခုနှစ် ဒီဇင်ဘာလမှာ ကျောင်းဆင်းလာတဲ့သူဖြစ်ပါတယ်။ 

အဲ့ဒီနောက် စာပေ၂ ဘာသာစကားအမှတ်စဉ်(၇) ပြင်ဦးလွင်မှာ တစ်နှစ်ကြာ တက်ရောက်ခဲ့ပါတယ်။ ၂၀၀၆ခုနှစ် စက်တင်ဘာလမှာ ရုရှားနိုင်ငံ National research university of electronic technology (MIET) ကိုတက်ရောက်ခဲ့ပြီး MICSC ဘွဲ့ ကို ၂၀၀၉ ခုနှစ်မှာ ရရှိခဲ့ပါတယ်။ Ph.D ဘွဲ့ကိုတော့ ၂၀၁၂ ခုနှစ် မှာရရှိခဲ့ပြီး D.Sc ဘွဲ့ကို ၂၀၁၆ ခုနှစ်မှာရခဲ့ပါတယ်။ 

ကျော်ဇောရဲ ရဲ့ တပ်ဝင်ရက်စွဲက ၁၅-၂-၂၀၀၂၊ ဒုဗိုလ်ဖြစ်တာက ၁၇-၁၂-၂၀၀၄၊ ဗိုလ်ဖြစ်တာက ၁၇--၁၂-၂၀၀၅၊ ဗိုလ်ကြီးက ၁၇-၁၂-၂ ၀၀၅ဖြစ်ခဲ့ပါတယ်။

တပ်ချုပ်နား ချဥ်းကပ်ပုံ

ရာထူးကငယ်၊ နောက်ခံဆွေမျိုးဘက်ဂရောင်းမရှိပေမဲ့ တပ်ချုပ်မင်းအောင်လှိုင်နားကို ရောက်အောင် ဗိုလ်မှူးကျော်ဇောရဲ့ အသုံးချသွားတဲ့လမ်းကြောင်းက တပ်ချုပ်ကတော် ဒေါ်ကြူကြူလှ လမ်းကြောင်းပါ။ ရုရုားမှာ ပါရဂူဘွဲ့အတွက် ကျောင်းတက်နေတဲ့အချိန် သူက MIETကျောင်းရဲ့ မြန်မာကျောင်းသားခေါင်းဆောင်တစ်ဦးဖြစ်တဲ့အတွက် စစ်တပ်ကလူကြီးတွေနားကို ကပ်ခွင့်ရခဲ့ပါတယ်။ 

မြန်မာနိုင်ငံက စစ်ဘက်ဆိုင်ရာအရာရှိကြီးတွေ ရုရှားကိုလာရင် ကျောင်းသားခေါင်းဆောင်တွေထဲကပဲ စကားပြန်တာဝန်ယူရပါတယ်။ မော်စကိုမြို့က မြန်မာသံရုံးမှာလူစုပြီး ဘယ်ကျောင်းက ဘယ်လူကြီးကို စကားပြန်အဖြစ် တာဝန်ယူရမယ်ဆိုပြီး ခွဲတမ်းချ စီစဉ်ကြပါတယ်။

တပ်ချုပ် ဗိုလ်ချုပ်မှူးကြီးမင်းအောင်လှိုင်နဲ့သူ့ဇနီး ရုရှားလာတဲ့အချိန်တွေမှာဆိုရင် စကားပြန်အဖြစ် ကျော်ဇောရဲ တာဝန်ယူခွင့်ရခဲ့ပါတယ်။

အဲ့ဒီနောက်ပိုင်းမှာ မင်းအောင်လှိုင်တို့ဇနီးမောင်နှံ မြန်မာပြည်မပြန်သေးရင် ကျော်ဇောရဲလည်း ကျောင်းကိုလုံးဝပြန်မလာဘဲ သူတို့နားမှာနေ၊ လိုတာလုပ်ပေးပြီး ရင်းနှီးမှု တည်ဆောက်ရယူခဲ့ပါတယ်။

တပ်ချုပ်ကတော်နဲ့ အမေနဲ့သား ဆက်ဆံ‌ရေး

စကားပြန်လုပ်ပေးပြီး ရင်းနှီးမှုရယူနေရာကနေ တပ်ချုပ်မင်းအောင်လှိုင်တို့စုံတွဲ မြန်မာပြည်ပြန်ခါနီး လေယာဉ်ကွင်းလိုက်ပို့တဲ့အချိန် ဒေါ်ကြူကြူလှ အသုံးပြုနေတဲ့ပုဝါကို အဆောင်သဘောမျိုး ဆောင်ထားချင်တယ်ဆိုပြီး ကျော်ဇော်ရဲက တောင်းယူခဲ့တယ်လို့ ရုရှားပြန်တပ်အရာရှိတစ်ဦးက အခုလို ပြောပါတယ်။

“မအလဇနီးကို အမေမရှိတဲ့အခါ အမေ့အမှတ်တရအနေနဲ့ ကိုးကွယ်ဖို့ အမေ့တဘက်လေး ပေးထားခဲ့ပါဆိုပြီးတောင်းတော့ ဟိုဘွားတော်က လုံးဝခိုက်သွားတယ်။ အဲ့ဒီကနေစပြီးတော့ ဘွားတော်က သူ့ကို သား,သား ဆိုပြီးခေါ်တော့တာကနေ မအလနားကိုရောက်သွားတော့တာပဲ”

သူတို့ MIETကျောင်းမှာ မြန်မာကျောင်းသားက Ph.D ပြန်တက်ချင်ရင် ကျော်ဇောရဲနဲ့ အဆင်ပြေအောင်နေပြီး ကျော်ဇောရဲကိုပြောလိုက်ရင်တက်လို့ရတဲ့ အခြေအနေထိတောင် နောက်ပိုင်းမှာ ဖြစ်လာခဲ့ပါတယ်။

“ဘွားတော်နဲ့ ပိုင်တော့ သံရုံးနဲ့အေးဆေးဖြစ်တာပေါ့။ သံရုံးနဲ့အေးဆေးဖြစ်တော့ MIET ကျောင်းက မြန်မာကျောင်းသား ဘယ်နှစ်ယောက်လိုချင်သလဲ သူ့ကိုသာပြောလိုက်။ သူရောက်အောင် လုပ်ပေးနိုင်တော့ ကျောင်းမှာလည်း သူကတော်တော်ပေါက်ရောက်တယ်။ အဲ့ဒါမလို့လည်း သူတို့ ကျောင်းမှာ Ph.D တက်ချင်ရင် သူ့ကိုပြောလို့ပြောတာ၊ တကယ်လည်း အဲ့ဒီအတိုင်းဖြစ်ခဲ့တယ်”

ဒါ့အပြင် ကျော်ဇောရဲလက်ထပ်ယူရမယ့်အမျိုးသမီးကိုလည်း ဒေါ်ကြူကြူလှကပဲ ရွေးချယ် ပေးခဲ့တယ်လို့ သိရပါတယ်။ 

“သူ့မိန်းမကလည်း ဘွားတော်ကိုယ်တိုင်ရွေးပေးထားတာ။ သူတို့မင်္ဂလာပွဲတုန်းက မအလရော ဘွားတော်ရောတက်ပြီး ပန်းကုန်းစွပ်, လက်စွပ်, စွပ်တယ်လေ။ တိုင်းမှူး ဗခက လယ်ဗယ်လောက်အထိ သူကခပ်တန်းတန်းပဲ ဗိုလ်မှူးအဆင့်နဲ့စကားပြောတာသူပဲရှိတယ်။ မအလဆီ ဝင်ချင်ရင်လည်း သူ့ပဲကပ်ရတာ”

ကျော်ဇောရဲနဲ့ အိမ်ထောင်ပြုခဲ့တဲ့အမျိုးသမီးက အာဏာသိမ်းစစ်ကောင်စီရဲ့ အလုပ်သမားဝန်ကြီး ဌာန ဝန်ကြီး ဦးမြင့်ကြိုင်ရဲ့သမီး မို့မို့မြင့်ကြိုင်ဖြစ်ပါတယ်။ 

ဦးမြင့်ကြိုင်ဟာ ၂၀၂၁အာဏာမသိမ်းခင်က ဒုဝန်ကြီးတာဝန်ယူခဲ့ပေမဲ့ အာဏာသိမ်းပြီးနောက်ပိုင်း ဝန်ကြီးအဖြစ် ရာထူးတိုးမြှင့် ခန့်အပ်ခံခဲ့ရပါတယ်။ ဦးမြင့်ကြိုင်ရာထူးတိုးတာဟာ ဗိုလ်မှူးကျော်ဇော်ရဲနဲ့ မင်းအောင်လှိုင်တို့ ဆက်နွယ်မှုကြောင့်လို့ ပြောကြပါတယ်။ 

PHD နဲ့ D.SCဘွဲ့ ရလာပုံ

ဒေါ်ကြူကြူလှကျေးဇူးနဲ့ ကျော်ဇောရဲဟာ ကျောင်းမှာပေါက်ရောက်မှုတွေရှိလာပြီး နောက်ပိုင်းမှာ ခြယ်လှယ်မှုတွေ စလုပ်လာပါတယ်။ 

MIETကျောင်းမှာ Ph.Dနဲ့ D.Sc တက်တဲ့ကျောင်းသားတွေဟာ Articlesတွေရေးရပြီး အဲ့ဒီလိုရေးတဲ့အခါတိုင်းမှာလည်း ကျော်ဇောရဲရဲ့နာမည်ကိုရေးသူနေရာမှာ ထည့်ပေးရလေ့ရှိခဲ့ပါတယ်။

“အဲ့ဒီကျောင်းမှာ သူကျောင်းတက်နေတုန်း Ph.D တက်ခဲ့တဲ့ ကျောင်းသားတိုင်းမေးကြည့်လို့ရတယ် ဟုတ်သလား၊ မဟုတ်သလားဆိုတာ။ ရုရှားမှာ ကိုယ်သင်တဲ့ဘာသာရပ် ကိုယ်အထူးပြုတဲ့ ဘာသာရပ်တွေကို နံပါတ်တွေနဲ့ သတ်မှတ်ထားတယ်။ ဥပမာ ၀၁.၀၄.၀၆ ဆိုပြီးပဲပြောကြတယ်။ ကျနော် ဘယ်ဘာသာရပ် အထူးပြုပါဆိုပြီး မပြောကြဘူး။ ကိုယ့် Articles မှာလည်း ထည့်ချင်ရင် နံပါတ်တူတဲ့ ကျောင်းသားအမည်ကိုပဲထည့်ရတာ။ 

“အဲ့ဒါကိုသူက တူတူ,မတူတူ အကုန်ထည့်တာ။ ပြီးရင် D.Sc ဘွဲ့တုန်းက Articles ဘယ်နှစ်စောင် ထွက်ခဲ့တာကွ ဆိုပြီးပြောတာ။ မသိတဲ့သူတွေဆိုအဲ့လိုပြောတာ ကျနော်တို့ရှေ့ဆိုမပြောရဲဘူး။ သူဘယ်လိုလုပ်လဲဆိုတာ သိနေတဲ့သူဆို ဘာမှကိုမပြောရဲတာ”

ပါရဂူဘွဲ့ယူဖို့ကြိုးစားနေတဲ့ ကာလတွေမှာလည်း တခြားကျောင်းသားတွေအနေနဲ့ စာတမ်းဖတ်ချင်ရင် အနီးအနား နိုင်ငံတွေကိုသာခွင့်ပြုခဲ့ပေမယ့် ကျော်ဇောရဲကတော့ ကြိုက်တဲ့နိုင်ငံကို နိုင်ငံတော်စားရိတ်နဲ့ သွားခွင့်ရတယ်ခဲ့တယ်လို့ သိရပါတယ်။

ဒေါ်ကြူကြူလှနဲ့ ဆိုရှယ်မီဒီယာ ဆက်ဆံရေး

ဗိုလ်မှူးကျော်ဇောရဲဟာ သူ့ရဲ့လူမှုကွန်ရက်စာမျက်နှာမှာ နေ့တနေ့ရဲ့အစ ဘာအကြောင်းအရာ (ပိုစ့်)မှ မတင်ရသေးခင်မှာ တပ်ချုပ်ကတော် ဒေါ်ကြူကြူလှနဲ့ပတ်သက်တဲ့ ပိုစ့်ကို အရင်ဦးဆုံးတင်လေ့ ရှိတတ်ပါတယ်။

“ဖေ့ဘွတ်ခ်မှာ မနက်မိုးမလင်းမှာ မင်္ဂလာပါအမေဆိုပြီး တနေ့တပုဒ်တင်တယ်။ ဘွားတော်က အောက်မှာ မင်္ဂလာပါသားရေလို့ ပြန်ပြောပြီးမှ ကျန်တဲ့ဝင်ပြောချင်တဲ့သူတွေ ဝင်ပြောလို့ရတယ်။ ဘွားတော်မပြောရသေးခင်မှာ သွားမန့်ရင် ဘယ်သူပဲဖြစ်ဖြစ် ကြီးကြီးငယ်ငယ် ဖုန်းဆက်ပြီးဆဲတာ” လို့ ရုရှားပြန်စစ်တပ်အရာရှိအပြောအရ သိရပါတယ်။

ရုရှားကပြန်လာပြီး နောက်ပိုင်း

ရုရှားမှာကျောင်းတက်ပြီးပြန်လာတဲ့ နောက်ပိုင်း မြန်မာနိုင်ငံကိုပြန်ရောက်တဲ့အချိန်မှာလည်း ကျော်ဇောရဲဟာ တပ်မတော်သိပ္ပံနှင့် နည်းပညာသုတေသနဌာန(သသန)ကိုရောက်ပြီး ဒိတ်ဒိတ်ကြဲ စာရင်းဝင်ခဲ့ပါတယ်။

တပ်ချုပ်မင်းအောင်လှိုင် ပြင်ဦးလွင်ကိုလာတဲ့အချိန် သူတို့တပ်ကိုလာစေချင်ရင် တပ်မှူးတွေက ကျော်ဇောရဲကို ကပ်ရပါတယ်။ 

“အဲ့ဒီကတည်းက တပ်မတော်အသုံးနှုန်းနဲ့ပြောရရင် ဒိတ်ဒိတ်ကြဲပေါ့ဗျာ။ အဲ့ဒီတုန်းက သသနပြင်ဦးလွင် တပ်မှူး ဗိုလ်ချုပ်ကံမြင့်သန်းတို့, စတသ ကျောင်းအုပ်ကြီးတို့ဆိုရင် သူ့ကိုဗိုလ်မှူးလို့တောင်မခေါ်ဘူး။သား,သားနဲ့။ မအလ ပြင်ဦးလွင်သင်္ကြန်လာရင် တပ်မှူးတွေက သူတို့တပ်တွေကို လာစေချင်တယ်။ လာမှလည်း သူတို့လုပ်ကွက်ပြပြီးနောက် တဆင့်မှန်းလို့ရတယ်။ မအလပြင်ဦးလွင်လာရင် တပ်နယ်မှူး ကအစ သူ့ကိုဂါရတယ် အရင်ဆုံး။ ပြီးရင် သူက တပ်မှူးတွေဆီတိုက်ရိုက် ဖုန်းခေါ်ပြောတာ ဘယ်နေ့, ဘယ်ချိန်လာမယ် ပြင်ထားပါဆိုတာကို”

ဗိုလ်ချုပ်မှူးကြီးမင်းအောင်လှိုင်တို့ လာတယ်ဆိုရင်လည်း ကျော်ဇောရဲကိုယ်တိုင် ဒူးနှစ်ဖက်ထောက် စားပွဲထိုးလေ့ရှိတယ်လို့ ရုရှားပြန်ဗိုလ်မှူးက ဆက်ဖြည့်ပြောပါတယ်။

“သူကိုယ်တိုင် ဒူးနှစ်ဖက်စလုံးထောက်ပြီးစားပွဲထိုးတာ။ အဲ့ဒါမို့ သူ့အကြောင်းဆိုရင် တော်တော်များများ က ဟင်,ကုန်တာ အိုဗာလွန်းလို့။ ဘွားတော်ပိုင်တော့ မအလလည်း အေးဆေးပဲသူက”

အဲ့ဒီနောက် ဗိုလ်မှူးကျော်ဇောရဲဟာ ရုရှားနဲ့ပတ်သက်တဲ့နည်းပညာအကြံပေးဆိုတဲ့ ခေါင်းစဉ်နဲ့ တပ်ချုပ်ရုံးမှာ တာဝန်ထမ်းဆောင်ခဲ့ရပါတယ်။

လက်ရှိဘာတွေလုပ်နေလဲ

တပ်ချုပ်ရုံးရောက်သွားပြီးနောက်မှာ ရုရှားနဲ့ဆက်သွယ်ပြီး Satellite ချိတ်ဆက်လုပ်ကိုင်ဖို့ သီးခြားဌာန တစ်ခု ဦးဆောင်ဖွင့်ခွင့်ရခဲ့တာကြောင့် အဲ့ဒီဌာနအတွက် သသနတပ်က သူ့စိတ်ကြိုက်လူတွေကို ရွေးချယ်ကာ တပ်ချုပ်အမိန့်နဲ့ဆိုပြီး ခေါ်ဆောင်ခဲ့တယ်လို့ သိရပါတယ်။

“ခေါ်သွားတဲ့သူတွေအားလုံးက သူ့စကားနားထောင်တဲ့ လူကြီးသားသမီးတွေချည်းပဲ” စစ်ခေါင်းဆောင်မင်းအောင်လှိုင်ဆီ ပြောချင်တဲ့စကားတွေကိုလည်း သူကနေ တဆင့်သာပြောခွင့် ရကြပြီး D.SC တက်ပြီးတဲ့သူတိုင်း ရတဲ့အခွင့်အရေးတိုင်းကလည်း ကျော်ဇောရဲကြောင့် ရခဲ့ကြတဲ့အထိ ပေါက်ရောက်ခဲ့တယ်လို့ ဆိုပါတယ်။

“လေယာဉ်ပေါ်တက်တာနဲ့ရာထူး တဆင့်မြင့်တို့၊ ပြန်လာတာနဲ့ ဘယ်ရာထူးပဲဖြစ်နေနေ ကားတစ်စီး ပေးတာတို့၊ နောက် လွတ်လပ်ရေးနေ့တို့မှာ ဆုချီးမြှင့်တာဆိုတာတွေက သူ့ကြောင့်ရတာတွေ ကျန်တဲ့သူတွေက။ ဘယ်သူက တကယ်တော်လို့ အဲ့လိုဘွဲ့မျိုးရတယ်ဆိုတာ အချင်းချင်းတွေက သိပြီးသားတွေ သူ့ကိုတော့ သိရဲ့သားနဲ့ မပြောရဲကြတာ”

စစ်ကောင်စီတပ်ဟာ ရုရှားနဲ့ဘီလာရုစ်နိုင်ငံတွေကနေ အဆင့်မြင့်ဒရုန်းတွေဖြစ်တဲ့ UAVဒရုန်း ၁၅စင်းနဲ့ Drone Guardတွေကိုဝယ်ယူခဲ့ပြီး အဲ့ဒီဒရုန်းတပ်တွေ ကွပ်ကဲမှုကို ဗိုလ်ချုပ်မှူးကြီး မင်းအောင်လှိုင်ရဲ့ အနည်းငယ်သောလူယုံတွေထဲကတစ်ဦးဖြစ်တဲ့ ရုရှားပြန် ဗိုလ်မှူးကျော်ဇောရဲက လုပ်ဆောင်တယ်လို့ မဇ္ဈိမသတင်းဌာနက စုံစမ်းဖော်ထုတ်ရေးသားထားပါတယ်။

အဲ့ဒီဝယ်ယူထားတဲ့ UAV ဒရုန်းတွေဟာ ဒရုန်းတားလှိုင်းဖြတ်စက် ဂျန်မာတွေကို ကျော်ဖြတ်နိုင်သလို ဒေါင်လိုက် အတက်အဆင်းလုပ်နိုင်ကာ ပုံသေတောင်ပံ fixed wingsတွေဖြစ်ကြောင်းနဲ့ Drone Guardဆိုတာကတော့ တန်ပြန်ဒရုန်းစနစ်ဖြစ်ပြီး ဒရုန်းတွေရဲ့ ဆက်သွယ်ရေးဒေတာလင့်ခ်ကို ထောက်လှမ်းခြင်း၊ အမျိုးအစားခွဲခြင်း၊ ခြေရာခံခြင်းတွေကိုလုပ်နိုင်တယ်လို့ မဇ္ဈိမရဲ့ အခုလ ၆ရက်နေ့က ဖော်ပြတဲ့သတင်းအရ သိရပါတယ်။

ဒါတွေကို စီမံသူဟာ မင်းအောင်လှိုင်တို့လင်မယားအိမ်နဲ့ရုံးကို ဝင်ထွက်ခွင့်ရသူ၊ အရပ်ဝတ်နဲ့သာ နေလေ့ရှိသူ၊ စစ်ကောင်စီအတွက် ဒီဇယ်အပါအဝင် လောင်စာဆီတွေကို စင်္ကာပူ၊ထိုင်းတို့ကနေတဆင့် မှောင်ခိုတင်သွင်းမှုကွန်ရက်မှာလည်း အခရာကျသူ၊ အင်းတိုင်ရှိ တပ်မ (၁၁)အခြေစိုက် စစ်ကောင်စီ တပ်ရဲ့ သတင်းတု၊ သတင်းမှားထုတ်လုပ် ဝါဒဖြန့်ချိရေးအဖွဲ့ကိုလည်း ဦးဆောင်သူ၊ စစ်ကောင်စီရဲ့ လူဝင်မှုကြီးကြပ်ရေးနဲ့ပြည်သူ့အင်အားဝန်ကြီး ဦးမြင့်ကြိုင်ရဲ့ သားမက်ဖြစ်သူ ဗိုလ်မှူးကျော်ဇော်ရဲဆိုသူ လုပ်ကိုင်တာဖြစ်တယ်လို့ သိရပါတယ်။

ဗိုလ်မှူးရာထူးအဆင့်ပဲရှိတဲ့ ကျော်ဇောရဲတစ်ယောက် ဂေါက်ကွင်းမှာတောင် ထင်ရာဆိုင်းနေတာကို အထက်ပါရုရှားပြန်စစ်တပ်အရာရှိက ထပ်ဖြည့်ပြောပါတယ်။ 

“ဗိုလ်မှူးအဆင့်နဲ့ ပြင်ဦးလွင် ချယ်ရီလွင်ဂေါက်ကွင်းမှာ XXIO golf set ဘရမ်းကိုင်ပီးရိုက်တာလေ။ ဘိုးတော်ပေးထားတာဆိုပြီး။ ကျန်တဲ့သူဆို အဲ့ဒီအဆင့်လောက်နဲ့ ပါးတောင်ရိုက်ခံရဦးမှာ။ စစ်တပ်ထဲ ရာထူးအငယ်နဲ့လုပ်ချင်တာလုပ်လို့ရတာ လူကြီးသားမဟုတ်ဘဲလုပ်လို့ရတာ သူပဲရှိတယ်ဗျ”

တကယ်တော့ ကျော်ဇောရဲဟာ အကပ်ကောင်းလို့သာ တပ်ချုပ်နားကပ်ခွင့်ရခဲ့တာဖြစ်ပြီးစစ်တက္ကသိုလ် အပတ်စဥ်၄၇ကနေ သူကျောင်းဆင်းတော့ ကျောင်းဆင်းအဆင့် ကောင်းတဲ့အထဲမှာတောင်မပါဝင်ခဲ့ဘဲ နောက်ပိုင်း အဖွဲ့ထဲမှာပဲပါဝင်ခဲ့တယ်လို့ ရုရှားပြန်တပ်အရာရှိ အပြောအရသိရပါတယ်။