“ဓာတ်ပုံတပုံကပြောတဲ့ ၅၀၅(က) ဇာတ်လမ်းတခု”

BVJ/နိုဝင်ဘာ ၂၈၊ ၂၀၂၅

၅၀၅(က)ပုဒ်မနဲ့ထောင်ချခံရပြီး ရန်ကုန်၊အင်းစိန်ထောင်က ဒီနေ့ပြန်လွတ်လာသူတွေရဲ့ပုံတွေထဲမှာ လူစိတ်ဝင်အစားဆုံးနဲ့ကြည့်မြင်ရသူတိုင်း စိတ်ထိခိုက်ခံစားခဲ့ရတဲ့ဓာတ်ပုံတစ်ပုံကတော့ သားအမိနှစ်ယောက်ပြန်ဆုံတွေ့တဲ့မှတ်တမ်းဓာတ်ပုံတပုံပဲ ဖြစ်ပါတယ်။

ထောင်ကလွတ်လာတဲ့သားဖြစ်သူကို အပြင်မှာကျန်ခဲ့တဲ့ ကျန်းမာရေးမကောင်းတဲ့မိခင်ကလာကြိုတာလို့ လူအများကထင်ခဲ့ကြပေမယ့် တကယ်တမ်းနောက်ကြောင်းအသေအချာလိုက်ကြည့်လိုက်တဲ့အခါမှာတော့ သားအမိနှစ်ယောက်လုံးဟာ အင်းစိန်ထောင်ကနေအတူတူပြန်လွတ်လာကြတယ်ဆိုတာကို Burma VJ ကစုံစမ်းသိရှိပါတယ်။

ဓာတ်ပုံထဲမှာပါတဲ့သားဖြစ်သူကိုဟန်ထွန်းဟာ အင်းစိန်ထောင်မကြီး အမျိုးသားဆောင် ၄ဆောင်ကနေပြန်လွတ်လာတာဖြစ်ပြီး အမေဖြစ်သူဒေါ်သန်းသန်းဝင်း ကတော့ အမျိုးသမီးထောင်ကျဆောင် အမှတ်(၃)၊ အခန်း(၁)ကနေပြန်လွတ်လာတာဖြစ်တယ်လို့ ထောင်ထဲမှာဒေါ်သန်းသန်းဝင်းနဲ့အတူတခန်းထဲအတူနေဖူးတဲ့ အမည်မဖော်လိုတဲ့နိုင်ငံရေးအကျဥ်းသူတစ်ဦးက အတည်ပြုပြောပါတယ်။

ဒေါ်သန်းသန်းဝင်းဟာ ပါးစောင်ကင်ဆာဝေဒနာခံစားနေရသူဖြစ်ပြီး အစာကောင်းကောင်းမစားနိုင်တဲ့အတွက် အစာပိုက်တပ်ထားရသူလည်းဖြစ်ပါတယ်။အာဏာသိမ်းစစ်အုပ်စုလက်ပါးစေတွေက ဒေါ်သန်းသန်းဝင်းတို့သားအမိကို မြောက်ဥက္ကလာက သူတို့ဖွင့်ထားတဲ့လဖက်ရည်ဆိုင်ထဲဝင်ဖမ်းပြီး ၅၀၅(က)ပုဒ်မနဲ့ ဖမ်းဆီးထောင်ချခဲ့တာပါ။

"ဧည့်စာရင်းလာစစ်ချိန်မှာ စစ်တဲ့သူမူးနေလို့ပြောမိတာကို မချေမငံပြန်ပြောတယ်ဆိုပြီး တမိသားစုလုံးကိုဖမ်းသွားတာဖြစ်ကြောင်းနဲ့ လူမှုကွန်ရက်မှာ shareထားတာတွေနဲ့အမှုဆင် ထောင်ချလိုက်တာ"ဖြစ်ကြောင်းကို ဒေါ်သန်းသန်းဝင်းတို့နဲ့ရင်းနှီးသူတစ်ဦးက ထုတ်ဖော်ရေးသားထားတာကိုလည်း တွေ့ရပါတယ်။

ဒီ​နေ့​ထောင်က​နေလွတ်ကြ​​တော့ သားဖြစ်သူကအပြင်ကိုအရင်​ရောက်လာပြီး အ​မေ​အပြင်ထွက်အလာကို စောင့်​နေရပါတယ်။ သူတို့သားအမိ အင်းစိန်ထောင်မှာရှိနေတုန်းက အတွင်းထောင်ဝင်စာတွေ့ခွင့်ရတယ်လို့သိရပါ တယ်။ ဒါပေမယ့် ဘာပဲဖြစ်ဖြစ်အပြင်မှာပြန်ဆုံခွင့်ရတဲ့ရက်ဟာ မျှော်လင့်ထားတာထက်စောပြီးရောက်လာတော့ သားအမိတွေဝမ်းသာကြမှာသေချာပါတယ်။

ဒေါ်သန်းသန်းဝင်းတို့သားအမိလိုဇာတ်လမ်းမျိုးတွေ အာဏာသိမ်းစစ်အုပ်စုလက်အောက်မှာ ဘယ်လောက်တောင်ရှိနေမလဲဆိုတာကလည်း ကျွန်တော်တို့ မသိနိုင်ပါဘူး။ နိုင်ငံရေးအကျဥ်းသားကူညီစောင့်ရှောက်ရေးအသင်းက ပြုစုထားတဲ့စာရင်းအရ ၂၀၂၁ခုနှစ် အာဏာသိမ်းပြီးနောက်ပိုင်းကနေ ဒီနေ့ ၂၀၂၅ခုနှစ် နိုဝင်၂၇ရက်နေ့အထိကို ဖမ်းဆီးခံခဲ့ရတဲ့နိုင်ငံ‌ရေးအကျဥ်းသား ၃၀၀၃၉ ယောက်ရှိခဲ့ပြီး လက်ရှိအချိန်အထိကို ၂၂၇၀ယောက်ဟာ ဖမ်းဆီးထိန်းသိမ်းအကျဥ်းကျခံနေရဆဲဖြစ်ပါတယ်။