CDF-အရှို တပ်ဦးချုပ်၊ ဒုတပ်ကြပ်နဲ့ရဲဘော်တစ်ဦးတို့ ကျဆုံး
- BVJ
- 1 minute ago
- 1 min read
မိုနာ/BVJ_ သြဂုတ် ၁၇၊ ၂၀၂၆
မကွေးတိုင်း၊ငဖဲမြို့နယ်အခြေစိုက် ချင်းတော်လှန်ရေးတပ်ဖွဲ့တခုဖြစ်တဲ့ ချင်းကာကွယ်ရေးတပ်-အရှို(CDF-အရှို)ရဲ့ တပ်ဦးချုပ် ဆလိုင်းရှိုးချင်း၊ ဒုတပ်ကြပ် ဆလိုင်းဖြိုးသီဟဇော်နဲ့ ရဲဘော် အောင်လင်းဇော်တို့ဟာ အခုလ သြဂုတ် ၁၄ရက်မှာ တာဝန်တွေထမ်းဆောင်ရင်းကျဆုံးခဲ့တယ်လို့ တပ်ဖွဲ့က ဒီနေ့ သြဂုတ် ၁၇ရက်မနက်မှာ ထုတ်ပြန်ပါတယ်။
အခုလိုဆုံးရှုံးမှုဟာ တပ်ဖွဲ့အတွက် အစားထိုးမရနိုင်တဲ့ဆုံးရှုံးမှုဖြစ်ပြီး တော်လှန်ရေးတာဝန်တွေကိုအသက်နဲ့ခန္ဓာစွန့်ပြီးတာဝန်ထမ်းဆောင်ခဲ့တဲ့အတွက် ချင်းကာကွယ်ရေးတပ်-အရှိုအနေနဲ့လည်း များစွာဂုဏ်ယူတယ်လို့လည်း အမိန့်ပြန်တမ်းမှာဖော်ပြပါတယ်။
တပ်ဖွဲ့ခေါင်းဆောင်နဲ့ရဲဘော်နှစ်ဦးကျဆုံးမှုနဲ့ပတ်သက်ပြီး တပ်ဖွဲ့ကလည်း Burma VJကိုအတည်ပြုပြောထားပါတယ်။
ချင်းကာကွယ်ရေးတပ်-အရှိုတပ်ဖွဲ့ခေါင်းဆောင် ဆလိုင်းရိုးချင်းနဲ့ရဲဘော် နှစ်ဦးဟာ မကွေးတိုင်း၊ ငဖဲမြို့အနီးရိက္ခာသွားယူချိန်မှာ စေတုတ္တရာဘက်ကထွက်လာတဲ့ စစ်အုပ်စုစစ်ကြောင်းနဲ့တွေ့ပြီး ပစ်ခတ်မှုဖြစ်ပြီးကျဆုံးခဲ့ရတာလို့ ဒေသတွင်းမီဒီယာတွေကဖော်ပြကြပါတယ်။
ပစ်ခတ်မှုအတွင်း အဖမ်းခံလိုက်ရတဲ့ရဲဘော်ရှိသလို ထွက်ပြေးလွတ်မြောက်လာတဲ့ရဲဘော်တွေလည်းရှိတယ်လို့ သိရပါတယ်။
ရခိုင်း-မကွေး-ချင်းအစပ်ဒေသဘက်မှာ အာရက္ခတပ်တော်-အေအေနဲ့ အာဏာသိမ်းစစ်တပ်တို့ တိုက်ပွဲတွေဖြစ်ပွားနေတာကြောင့် စစ်အုပ်စုဘက်ကစစ်ကြောင်းတွေတောက်လျောက်ထိုးနေတာဖြစ်ပါတယ်။
ချင်းကာကွယ်ရေးတပ်-အရှိုကလည်း ဒေသတွင်းတပ်ဖွဲ့တွေနဲ့ပူးပေါင်းပြီး စစ်အုပ်စုရဲ့စစ်ကြောင်း၊ ကာကွယ်ရေးပစ္စည်းစက်ရုံစတာတွေကို တိုက်ခိုက်နေတာဖြစ်ပါတယ်။
Comments