ကျောင်းပိတ်သိမ်းလိုက်တဲ့ဒေါနလမ်းကျောင်းက ကျောင်းသား/ကျောင်းသူတွေပညာဆက်လက်သင်ကြားနိုင်ခွင့် တောင်းဆို

မိုနာ/BVJ_ဇွန် ၁၆၊ ၂၀၂၆

ဒေါနလမ်းကျောင်းကို ၂၀၂၆၊မေလကမြင်တွေ့ရပုံ။

မြန်မာ-ထိုင်းနယ်စပ် ဖုတ်ဖရမြို့အတွင်းမှာရှိတဲ့ ဒေါနလမ်းGEDကျောင်းက ကျောင်းအုပ်ဆရာဖြစ်သူဟာ လိင်ပိုင်းဆိုင်ရာကျူးလွန်မှုနဲ့ဖမ်းဆီးခံထားရပြီးနောက်မှာ ‌ဒေါနလမ်းကျောင်းအုပ်ချုပ်ရေးကောင်စီကနေ ကျောင်းကိုပိတ်သိမ်းလိုက်တာကြောင့် ပညာဆက်လက်သင်ကြားခွင့်ရရေးအတွက် ကျောင်းသား/ကျောင်းသူတွေက ဒီနေ့ ဇွန် ၁၆ရက်မှာ အသနားခံစာတင်‌တောင်းဆိုလာကြပါတယ်။

Dawna Land College (အသက်မွေးဝမ်းကြောင်း ပညာရပ်သင်တန်းကျောင်း)က ‌ကျောင်းအုပ်တာဝန်ယူထားသူအမျိုးသားဟာ ကျောင်းသားနဲ့ကျောင်းဆရာ စုစုပေါင်း ၅ ဦးနဲ့အထက်ကို လိင်ပိုင်းဆိုင်ရာကျူးလွန်မှုပြုလုပ်တယ်လို့တိုင်ကြားမှုဖြစ်ပေါ်လာပြီးနောက်ပိုင်းမှာ အခု ဇွန် ၁၂ရက်ကစပြီး ကျောင်းကောင်စီကနေကျောင်းကိုပိတ်သိမ်းလိုက်တာဖြစ်ပါတယ်။

ကျောင်းပိတ်သိမ်းလိုက်တာကြောင့် ကျောင်းအိပ်၊ကျောင်းစား အဆောင်နေကျောင်းသား/ကျောင်းသူတွေဟာ နေရပ်ပြန်သွားကြရပြီးအခက်အခဲတွေကြုံတွေ့နေရတယ်လို့ ဒေါနလမ်းGEDကျောင်းမှာတက်‌ရောက်နေတဲ့ ကျောင်းသား/ကျောင်းသူတွေက ဒီနေ့မှာအသိပေးထုတ်ပြန်လာပါတယ်။

ကျောင်းပိတ်သိမ်းလိုက်တဲ့အကြောင်းရင်းဟာ GEDပရိုဂရမ်ကိုလုပ်တာ ကျောင်းအုပ်ရဲ့အစီအစဉ်သာဖြစ်တာကြောင့် ကျောင်းကော်မတီတွေအနေနဲ့မသိကြောင်း၊ အခုကိစ္စဖြစ်ပေါ်ပြီးနောက်ပိုင်းမှာ ရန်ပုံငွေအခက်အခဲရှိကြောင်း၊ သင်ကြားရေးဆရာ/ဆရာမတွေအတွက် လစာပေးဖို့မရှိကြောင်းတွေကို ကော်မတီဘက်ကကျောင်းသားတွေနဲ့အစည်းအဝေးပြုလုပ်ပြောခဲ့တယ်လို့ သိရပါတယ်။

ဒေါနလမ်း‌GEDကျောင်း လက်ရှိပိတ်သိမ်းလိုက်တဲ့အခြေအနေနဲ့ပတ်သက်ပြီး ကျောင်းမှာတက်နေတဲ့ကျောင်းသူတစ်ဦးဖြစ်တဲ့ Ariesက ကျောင်းသား/‌ကျောင်းသူတွေရင်ဆိုင်နေရတဲ့လက်ရှိအခြေအနေကိုအခုလိုပြောပါတယ်။

"ပြန်သွားတဲ့သူတွေက နယ်စပ် လိုင်းမကောင်းတဲ့နေရာမှာရောက်နေတာကြောင့် Online class ဂျွိုင်းတာမှာပြသနာဖြစ်နေပါတယ်။ ကျောင်းသားကျောင်းသူတွေအနေနဲ့ online class ဂျွိုင်းဖို့အတွက် နေထိုင်စရာအဆောင်နဲ့ စားစရိတ် internetစားရိတ်လိုအပ်နေပါတယ် GED ပြီးတဲ့အထိ"လို့ Burma VJကိုပြောပါတယ်။

ဒေါနလမ်းGEDကျောင်းမှာတက်ရောက်နေသူတွေဟာ စစ်ဘေး‌ရှောင်ဒေသက ကလေးတွေနဲ့ စစ်တပ်အာဏာသိမ်းပြီး ဖမ်းဆီးထောင်ချခံရသူတွေထဲကလွတ်မြောက်လာတဲ့ နိုင်ငံရေးအကျဉ်းသားဟောင်းလူငယ်တွေလည်းပါဝင်တယ်လို့ သိရပါတယ်။

ဒေါနလမ်းGEDကျောင်း ကျောင်းသား/ကျောင်းသူအိပ်ဆောင်တခုကိုတွေ့ရပုံ။

ဒေါနလမ်းကျောင်းဟာ ရွှေဝါရောင်ဆရာတော် အရှင်ထာဝရ(နော်ဝေ)ဦးဆောင်တဲ့ အရှင်ထာဝရဖောင်ဒေးရှင်းက မတည် တည်ထောင်ထားတဲ့ကျောင်းဖြစ်ပါတယ်။ ကျောင်းကို အသက်မွေးဝမ်းကြောင်းနဲ့ ပညာရပ်ပိုင်းဆိုင်ရာသင်တန်းတွေပို့ချသင်ကြားပေးဖို့အတွက်ရည်ရွယ်ထားပြီး GEDကိုတော့ အခုနှစ် မေလနောက်ဆုံးပတ်မှာစဖွင့်ခဲ့တယ်လို့သိရပါတယ်။

လက်ရှိမှာ ကျောင်းကဖွံ့ဖြိုးတည်ဆောက်ဆဲအဆင့်မှာသာရှိသေးပြီး ကျောင်းအုပ်ချုပ်ရေးပိုင်းဆိုင်ရာဖွဲ့စည်းပုံပြင်ဆင်ရေးဆွဲနေကြောင်းနဲ့ သက်ဆိုင်ရာတာဝန်ရှိသူတွေကအတည်ပြုလက်မှတ်ရေးထိုးခြင်းမရှိသေးဘဲ အခုလိုဖြစ်စဉ်တွေဖြစ်ပွားလာတာလို့ ကျောင်းအုပ်ရေးကောင်စီရဲ့ မနေ့က ဇွန် ၁၅ရက်ထုတ်ပြန်ချက်မှာဖော်ပြပါတယ်။

ဒါ့အပြင် ကျောင်းအနေနဲ့လည်း အခုကိစ္စဖြစ်ပေါ်ပြီးနောက်ပိုင်းမှာ အုပ်ချုပ်ရေးပိုင်းဆိုင်ရာအခက်အခဲနဲ့ ရန်ပုံငွေကန့်သတ်ချက်ဖြစ်သွားတာကြောင့် ကျောင်းကိုပိတ်သိမ်းထားပြီး ကျောင်းသား/ကျောင်းသူတွေ ပညာဆက်လက်သင်နိုင်ရေးအတွက် တခြားကျောင်းတွေမှာပြောင်းရွှေ့တက်နိုင်ရေးညှိနှိုင်းပေးခြင်း၊ လိုအပ်တဲ့ထောက်ပံ့မှုနဲ့အဆောင်ခ ကူညီထောက်ပံ့နိုင်ရေးတို့ကို ကျောင်းသားမိဘတွေနဲ့ ဇွန်လ ၁၂ရက်မှာအရေးပေါ်အွန်လိုင်းအစည်းအဝေးပြုလုပ်ပြီး ဆွေးနွေးခဲ့ကြတယ်လို့ ကျောင်းကောင်စီကထုတ်ပြန်ခဲ့ပေမယ့် ကျောင်းသား/ကျောင်းသူတွေကရဲ့ ဒီနေ့ထုတ်ပြန်ချက်နဲ့ကွဲလွဲနေတာကိုတွေ့ရပါတယ်။

ကျောင်းသား/ကျောင်းသူတွေရဲ့ထုတ်ပြန်ချက်ထဲမှာတော့ ကျောင်းကိုဆက်ဖွင့်ဖို့ပြောခဲ့ကြပေမယ့် ကျောင်းကောင်စီဘက်ကကျောင်းကိုဖျက်သိမ်းဖို့သာ အကြိမ်ကြိမ်ပြောခဲ့ခြင်း၊ ကိုယ့်အစီအစဉ်နဲ့ကိုယ်ပြန်ခဲ့ရခြင်း၊ စစ်ဘေးရှောင်နယ်မြေက ကျောင်းသား/ကျောင်းသူတွေကိုလုံခြုံမှုအပြည့်အဝမပေးခဲ့ခြင်း၊ ပြန်သွားသူတွေဟာလည်း အွန်လိုင်းအတန်းကိုတက်ဖို့ အင်တာနက်ပြဿနာရှိခြင်း၊ နေရပ်ပြန်မရောက်သေးဘဲလမ်းခရီးတဝက်မှာသာရှိသေးခြင်းစတဲ့ အခက်အခဲတွေကြုံတွေ့နေရတယ်လို့ဖော်ပြပါတယ်။

"စကစရဲ့ကျွန်ပညာရေးကိုဆန့်ကျင်ပြီး ကိုယ့်လမ်းကိုယ်ဖောက်ပြီးအရဲစွန့်လာကြရတဲ့ကျောင်းသား/ကျောင်းသူတွေအပေါ် ယခုလိုပညာရေး၊နေရေး၊စားရေးတခုမှမစီစဉ်ပေးနိုင်ခြင်းအပေါ် များစွာဝမ်းနည်းမိပါတယ်"လို့ ကျောင်းသား/ကျောင်းသူတွေရဲ့ အသနားခံစာမှာဖော်ပြထားပါတယ်။

လိင်ပိုင်းဆိုင်ရာကျူးလွန်နှောက်ယှက်မှုနဲ့တိုင်ကြားခံရသူ ကျောင်းအုပ်ဆရာရေးဆွဲခဲ့တဲ့ သစ်ရွက်ပန်းချီပုံများ။

အသက်မပြည့်သေးသူတစ်ဦးအပါအဝင် အမျိုးသား ငါးဦးထက်မနည်းကို လိင်ပိုင်းဆိုင်ရာကျူးလွန်နှောက်ယှက်မှုနဲ့တိုင်ကြားထားလို့ ဖမ်းဆီးခံထားရတဲ့ကျောင်းအုပ်ဆရာဟာ ၂၀၂၁ခုနှစ်နောက်ပိုင်းမှာ ကရင်ပြည်နယ်မှာ PDFတစ်ဦးအဖြစ်တာဝန်ထမ်းဆောင်ခဲ့ဖူးသူဖြစ်ပြီး သစ်ရွက်ပန်းချီပုံဆွဲသူအဖြစ် နာမည်ကြီးသူတစ်ဦးလည်းဖြစ်ပါတယ်။

လက်ရှိမှာသူ့ကို ကရင်အမျိုးသားအစည်းအရုံး-KNUကဖမ်းဆီးထိန်းသိမ်းထားပြီး ထိုင်းဥပဒေနဲ့အရေးယူနိုင်ရေးအတွက် နစ်နာသူတွေဘက်ကလိုက်ပါကူညီပေးနေသူတွေက ‌ဆောင်ရွက်နေပါတယ်။

ဒေါနလမ်းGEDကျောင်းသား/ကျောင်းသူတွေရဲ့တောင်းဆိုချက်ထဲမှာတော့ အခုဖမ်းဆီးခံထားရတဲ့ကျောင်းအုပ်ကို တော်လှန်ရေးထဲထပ်ပြီးခြေမချစေဖို့၊ထပ်ဆင့်လိမ်ညာလှည့်ဖျားပြီး လိင်ပိုင်းဆိုင်ရာအမြတ်ထုတ်မှု၊ကျူးလွန်မှုတွေကို ထပ်မလုပ်စေဖို့ဝိုင်းဝန်းကူညီပေးကြစေလိုကြောင်းနဲ့ ဒေါနလမ်းတည်ထောင်တဲ့ ကျောင်းကောင်စီအနေနဲ့လည်း ကျောင်းသား/ကျောင်းသူတွေပညာရေးအတွက် အပြည့်အဝတာဝန်ဆက်ယူပေးစေချင်တယ်လို့ ဖော်ပြထားပါတယ်။