နေအိမ်ကိုလက်နက်ကြီးကျပြီး ကျောင်းသူညီအမနှစ်ဦး သေဆုံး

မိုနာ/BVJ_နိုဝင်ဘာ ၃၊ ၂၀၂၅

၂၀၂၅၊အောက်တိုဘာ ၆ရက်ညက ချောင်းဦးမြို့နယ်၊ ဘုံတိုရွာဗုံးကြဲခံရမှုကြောင့် သေဆုံးသွားသူများအတွက် စျာပနပြုလုပ်နေပုံ။

စစ်ကိုင်းတိုင်း၊ ချောင်းဦးမြို့နယ်ထဲက ငါးလုံးတင်ကျေးရွာကို မနေ့ကမနက်ပိုင်းမှာလက်နက်ကြီးကျပြီး ညီအမနှစ်ဦး သေဆုံးခဲ့တယ်လို့သိရပါတယ်။

မနေ့က နိုဝင်ဘာ ၂ရက်နေ့မနက်ကိုးနာရီကျော်မှာ စစ်အုပ်စုဘက်ကပစ်လွှတ်လိုက်တဲ့ လက်နက်ကြီးဟာ ညီအမသုံးဦးရှိနေတဲ့အိမ်ကို ထိမှန်သေဆုံးသွားတာဖြစ်တယ်လို့ ဒေသခံက Burma VJကိုပြောပါတယ်။

"မြို့ပေါ်အုပ်ချုပ်ရေးမှူးရုံးမှာ အထိုင်စွဲထားတဲ့တပ်ကပစ်တာ။ လေးလုံးပစ်တာမှာကျပြီး အဲ့ဒီညီအမတွေသုံးယောက်ထဲက နှစ်ယောက်သေတာ။ တစ်ယောက်ကလည်း ဒဏ်ရာပြင်းတယ်"

သေဆုံးသွားသူတွေဟာ ၁၆နှစ်နဲ့ ၂၂နှစ် အရွယ်ရှိညီအမတွေဖြစ်ကြပြီး G-10နဲ့G-7ကျောင်းသူတွေဖြစ်တယ်လို့သိရပါတယ်။

ထိခိုက်ဒဏ်ရာရသူဟာလည်း ၁၃နှစ်အရွယ်မိန်းကလေးဖြစ်ပြီး လက်နက်ကြီးကြောင့် နေအိမ်လေးလုံးပျက်ဆီးသွားတယ်လို့ ဒေသခံကပြောပါတယ်။

ပြီးခဲ့တဲ့လ သီတင်းကျွတ်လပြည့်နေ့ညမှာ ချောင်းဦးမြို့နယ်၊ ဘုံတိုရွာကဆီမီးသပိတ်ကို စစ်အုပ်စုကလေကြောင်းဗုံးကြဲခဲ့တာကြောင့် အယောက်၂၀ ကျော်သေဆုံးခဲ့ပြီး ထိခိုက်ဒဏ်ရာရခဲ့သူလည်း ၆၀‌ကျော်ရှိခဲ့ပါတယ်။ ဒါကြောင့် အခုလက်နက်ကြီး လေးလုံးပစ်ခတ်ခံမှုကြောင့်လည်း ဒေသခံတွေစိုးရိမ်ထိတ်လန့်နေကြပြီး နေအိမ်ကနေတိမ်းရှောင်နေကြတာတွေလည်းရှိတယ်လို့ သိရပါတယ်။