ဗိုလ်နဂါးတပ်ဖွဲ့ကလက်နက်တွေလာအပ်ဖို့ ယင်းမာပင် ပကဖ ကြေညာ
- BVJ
- Feb 19
- 1 min read
မိုနာ/BVJ_ဖေဖော်ဝါရီ ၁၉၊ ၂၀၂၆
ဗမာအမျိုးသားတော်လှန်ရေးတပ်မတော်-BNRAအဖွဲ့ထုတ်ပေးထားတဲ့လက်နက်တွေကို ကိုင်ဆောင်ထားတဲ့ရဲဘော်တွေအနေနဲ့ စစ်ကိုင်းတိုင်း၊ ယင်းမာပင်ခရိုင်အတွင်းက ခရိုင်/မြို့နယ် ပကဖအဖွဲ့တွေဆီကိုချိတ်ဆက်ပြီး လက်နက်လာရောက်အပ်နှံကြဖို့ကို အခုနေ့လယ်မှာ ယင်းမာပင်ခရိုင်ပကဖက ကြေညာပါတယ်။
ရဲဘော်တွေအနေနဲ့ BNRAအဖွဲ့အစည်းကထုတ်ပေးထားတဲ့လက်နက်တွေနဲ့ ဆက်စပ်ပစ္စည်းတွေကို ရောင်းချ၊ပေါင်နှံ၊ဖျောက်ဖျက်၊ဖျက်ဆီးတာတွေမလုပ်ကြဖို့နဲ့ စစ်ဆေးပေါ်ပေါက်ခဲ့ရင်ပြင်းထန်စွာအရေးယူမယ်လို့လည်း ပကဖ ကြေညာချက်မှာဖော်ပြပါတယ်။
သက်ဆိုင်ရာ ရပ်ကျေး/တိုက်နယ် ပကဖ/ပအဖတွေအနေနဲ့လည်း မိမိနယ်မြေမှာအခြေချနေထိုင်တဲ့ BNRAရဲဘော်တွေရှိရင် သတင်းစကားပါးဖို့နဲ့ ခရိုင်တာဝန်ခံတွေနဲ့ချိတ်ဆက်ပေးဖို့ကိုလည်း ထုတ်ပြန်ထားပါတယ်။
BNRAခေါင်းဆောင် ဗိုလ်နဂါးအလင်းဝင်လာကြောင်း စစ်အုပ်စုကမနေ့ညက ကြေညာပြီးချိန်မှာ ယင်းမာပင် ပကဖက အခုလိုထုတ်ပြန်လာတာပါ။
ဒါ့အပြင် ဗိုလ်နဂါးအလင်းဝင်ပြီးနောက် သူ့တပ်ဖွဲ့ကခေါင်းဆောင်ပိုင်းတချို့လည်းပျောက်ဆုံးနေကြောင်းကို ယင်းမာပင်ခရိုင်တပ်ဖွဲ့တာဝန်ရှိသူတစ်ဦးက Burma VJကိုပြောပါတယ်။
စစ်အုပ်စုကကြေညာထားတဲ့ ဗိုလ်နဂါးအလင်းဝင်တဲ့သတင်းမှာတော့ ညနေ ၄း၅၀အချိန်ခန့်မှာ ဗိုလ်နဂါးနဲ့မိသားစုဝင်တွေဟာ လက်နက်မျိုးစုံ ၆လက်၊ ဆက်စပ်ပစ္စည်းတွေနဲ့အတူ ပုလဲမြို့နယ်အတွင်းက စစ်အုပ်စုတပ်စခန်းဆီကို ဆက်သွယ်သတင်းပို့ အလင်းဝင်လာကြတာလို့ဆိုထားပါတယ်။
NUGပြည်ထဲရေးက မနေ့ကည ဖေဖော်ဝါရီ ၁၈ရက်ညက ဗိုလ်နဂါးအမှုတွေနဲ့ပတ်သက်ပြီးထုတ်ပြန်တဲ့ အရေးပေါ်ထုတ်ပြန်ချက်ထဲမှာ ဗိုလ်နဂါးတပ်ဖွဲ့ဝင် ၁၅၀ခန့်ဟာ PDFနဲ့ပကဖတွေဆီကိုချိတ်ဆက် အဖမ်းခံခြင်း၊ပူးပေါင်းဆောင်ရွက်ခြင်းနဲ့လက်နက်အပ်နှံခြင်းတို့ကို ပြုလုပ်နေပြီလို့ဖော်ပြထားပါတယ်။
NUGထုတ်ပြန်ချက်ထဲမှာ ဗိုလ်နဂါးနဲ့သူ့တပ်ဖွဲ့ဝင်တွေကျူးလွန်မှုနဲ့ တိုင်တန်းချက်ဆိုတာတွေကိုဖော်ပြထားပြီး အဲ့ဒီထဲမှာ မိန်းကလေးငယ်နှစ်ဦးကိုသက်ငယ်မုဒိမ်းမှုကျူးလွန်ခြင်း၊ PDFတွေကိုသေနတ်နဲ့ပစ်သတ်မှု၊ NUGဂိတ်စခန်းကိုစီးနင်းမှု၊ ပကဖရဲဘော် (၁၀)ယောက်ကိုကိုယ်ထိလက်ရောက်ကျူးလွန်မှု၊ ဥယျာဉ်နယ်မြေမှာ ဆင်မပိုးအိစံကိုသတ်ဖြတ်ခုတ်ထစ်မီးရှို့မှု၊ မုဒိမ်းကျင့်ဖို့ကြံစည်တယ်စွပ်စွဲပြီး လူသတ်၊အလောင်းဖျောက်တဲ့အမှု စတာတွေပါဝင်ပါတယ်။
Comments