ဒေါ်အောင်ဆန်းစုကြည်နဲ့နိုင်ငံရေးအကျဥ်းသားအားလုံး အမြန်ဆုံးလွှတ်ပေးရေးဖိအားပေးဖို့ အာဆီယံကို APHRတောင်းဆို
- BVJ
- 1 day ago
- 1 min read
မိုနာ/BVJ_ဇူလိုင် ၂၁၊ ၂၀၂၆
နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် သက်ရှိထင်ရှားရှိကြောင်းသက်သေပြရေး အာဏာသိမ်းစစ်အစိုးရကိုဖိအားပေးဖို့ အာဆီယံအလှည့်ကျဥက္ကဋ္ဌ ဖိလစ်ပိုင်နဲ့ တီမော သမ္မတတို့ကို လူအခွင့်အရေးဆိုင်ရာအာဆီယံလွှတ်တော်အမတ်များအဖွဲ့ (APHR)က မနေ့က ဇူလိုင် ၂၀ရက် ရက်စွဲနဲ့စာပို့တောင်းဆိုလိုက်ပါတယ်။
ဖိလစ်ပိုင်နိုင်ငံ၊မနီလာမြို့မှာကျင်းပနေတဲ့ ၅၉ ကြိမ်မြောက် အာဆီယံနိုင်ငံခြားရေးဝန်ကြီးများအစည်းအဝေး (AMM)ကို နိုင်ငံခြားရေးဝန်ကြီးတွေစုဝေးရောက်ရှိနေချိန်မှာ အခုလိုစာပေးပို့တောင်းဆိုလိုက်တာဖြစ်ပါတယ်။
APHRရဲ့ပေးပို့စာထဲမှာ ဒေါ်အောင်ဆန်းစုကြည်နဲ့အတူ မြန်မာနိုင်ငံရေးအကျဉ်းသားအားလုံးကိုချက်ခြင်းနဲ့ခြွင်းချက်မရှိလွှတ်ပေးရေးကို အာဆီယံအနေနဲ့ အာဏာသိမ်းစစ်အစိုးရကို ဖိအားပေးဖို့တောင်းဆိုထားပြီး အာဆီယံအလှည့်ကျဥက္ကဋ္ဌ ဖိလစ်ပိုင်သမ္မတ ဖာဒီနန် မားကို့စ် ဂျူနီယာက အာဏာသိမ်းစစ်အုပ်စုနဲ့ထိတွေ့ဆက်ဆံရာမှာ ဒေါ်အောင်ဆန်းစုကြည်မိသားစုဝင်၊ ရှေ့နေတွေ၊ ဆေးဘက်ဆိုင်ရာပညာရှင်တွေနဲ့ လွတ်လွတ်လပ်လပ်တွေ့ဆုံခွင့်ကိုမဖြစ်မနေလုပ်ရမယ့်လုပ်ဆောင်ချက်အဖြစ် သတ်မှတ်ပေးဖို့ကိုလည်းတောင်းဆိုဖို့ တိုက်တွန်းထားပါတယ်။
ဒါ့အပြင် အာဏာသိမ်းစစ်ခေါင်းဆောင်မင်းအောင်လှိုင်ကို အာဆီယံကအရေးယူဖို့အတွက် တီမောသမ္မတအနေနဲ့ဖိအားပေးပြောဆိုမှုတွေပြုလုပ်ပေးဖို့ APHRကတိုက်တွန်းထားပါတယ်။
APHRရဲ့စာထဲမှာ ဒေါ်အောင်ဆန်းစုကြည် သက်ရှိထင်ရှားရှိကြောင်းနဲ့ဘေးကင်းကြောင်းအတည်ပြုနိုင်တဲ့အထောက်အထားရရှိရေးက အရေးကြီးကြောင်းကိုလည်းပြောထားပါတယ်။
Comments