ကိုယ်ပိုင်ကတိကဝတ်တွေကို အာဆီယံကိုယ်တိုင်ပြန်လည်ချိုးဖောက်နေဟု JFMထောက်ပြ

မိုနာ/BVJ_ဇူလိုင် ၁၅၊ ၂၀၂၆

၂၀၂၆၊ဇူလိုင် ၁၂ ရက်နေ့က ထိုင်းနိုင်ငံ၊ဘန်ကောက်မြို့မှာ အာဆီယံနိုင်ငံခြားရေးဝန်ကြီးတွေနဲ့ စစ်အစိုးရနိုင်ငံခြားရေးဝန်ကြီး ဦးတင်မောင်ဆွေတို့အလွတ်သဘောတွေ့ဆုံဆွေးနွေးနေပုံ။

အာဆီယံက မြန်မာ့အရေးနဲ့ပတ်သက်ပြီး ဘုံသဘောတူညီချက်ငါးရပ်ကိုချမှတ်ခဲ့တာ ငါးနှစ်ကျော်ကြာမြင့်လာပေမယ့် အာဆီယံဟာကိုယ်ပိုင်ကတိကဝတ်တွေကို ကိုယ်တိုင်ပြန်လည်ချိုးဖောက်နေပြီး မြန်မာစစ်အုပ်စုကကျူးလွန်နေတဲ့ နိုင်ငံတကာရာဇဝတ်မှုတွေမှာလည်း ကြံရာပါပတ်သက်မှုတွေရှိနေတယ်လို့ Justice For Myanmar (JFM)က ဒီနေ့ ဇူလိုင် ၁၅ရက်မှာ ထောက်ပြပြောဆိုလိုက်ပါတယ်။

စစ်အုပ်စုနိုင်ငံခြားရေးဝန်ကြီး ဦးတင်မောင်ဆွေနဲ့ အာဆီယံအဖွဲ့ဝင်နိုင်ငံခြားရေးဝန်ကြီးတွေ ထိုင်းနိုင်ငံ၊ဘန်ကောက်မြို့မှာ ပြီးခဲ့တဲ့ရက်ပိုင်းကအလွတ်သဘောတွေ့ဆုံအပြီးမှာ JFMကအခုလိုထုတ်ပြန်လာတာပါ။

အဲ့ဒီအလွတ်သဘောတွေ့ဆုံမှုဟာ စစ်အုပ်စုအနေနဲ့ နိုင်ငံတကာရာဇဝတ်မှုတွေကို အပြစ်ပေးအရေးယူခံရမှုလွတ်ကင်းစွာနဲ့ဆက်လက်ကျူးလွန်နိုင်စေဖို့ ရဲဆေးတင်အားပေးရာရောက်နေတယ်လို့ JFMကဖော်ပြပါတယ်။

အာဆီယံဥက္ကဌ မြန်မာနိုင်ငံဆိုင်ရာအထူးကိုယ်စားလှယ်၊ ဖိလစ်ပိုင်နိုင်ငံခြားရေးဝန်ကြီး မစ္စလာဇာရိုနဲ့ စစ်အုပ်စုနိုင်ငံခြားရေးဝန်ကြီး ဦးတင်မောင်ဆွေ။

"မြန်မာစစ်အုပ်စုသည် ၎င်းတို့၏နိုင်ငံတကာရာဇဝတ်မှုများအတွက် တာဝန်ခံရမည့် ရာဇဝတ်ကောင်များသာဖြစ်ပြီး၊ အာဆီယံနိုင်ငံခြားရေးဝန်ကြီးများနှင့်အတူ နေရာတနေရာပေး၍ ချီးမြှောက်ခံရမည့်သူများမဟုတ်ပေ"လို့ JFMကပြောထားပါတယ်။

စစ်ခေါင်းဆောင် မင်းအောင်လှိုင်ဟာ အာဆီယံဘုံသဘောထားငါးရပ်ကို လုံးဝမထီမဲ့မြင်ပြုပြီး မြန်မာပြည်သူတွေအပေါ် တိုက်ခိုက်မှုတွေတိုးမြှင့်လုပ်ဆောင်ခဲ့ကြောင်းနဲ့ အဲ့ဒီအကြမ်းဖက်မှုတွေကို အာဆီယံအဖွဲ့ဝင်နိုင်ငံတွေဖြစ်တဲ့ အထူးသဖြင့် ထိုင်း၊ ဗီယက်နမ်နဲ့ စင်ကာပူတို့ရှိကုမ္ပဏီတွေနဲ့ အဲ့ဒီနိုင်ငံအစိုးရတွေရဲ့ကြံရာပါပတ်သက်မှုနဲ့ကျူးလွန်နိုင်ခဲ့တာဖြစ်တယ်လို့ JFMကအချက်အလက်သက်သေတွေနဲ့အတူ ဖော်ပြလာတာဖြစ်ပါတယ်။

ဒါကြောင့် အာဆီယံအဖွဲ့ဝင်အစိုးရတွေအနေနဲ့ စစ်အုပ်စုကိုတရားဝင်မှုပေးအပ်ခြင်းကို ရပ်တန့်ဖို့၊ စစ်အုပ်စုရဲ့ ဘဏ္ဍာငွေ၊ စစ်လက်နက်၊ စစ်ရေးပစ္စည်း၊ နည်းပညာနဲ့လေယာဉ်ဆီရရှိမှုကို ချက်ချင်းဖြတ်တောက်ဖို့တို့ကို JFMကတောင်းဆိုထားပါတယ်။