ABSDF ခေါင်းဆောင်တွေနဲ့ NUG MOD ဝန်ကြီး ဦးရည်မွန် တွေ့ဆုံပြီး စစ်ဘက်ဆိုင်ရာကိစ္စများ ဆွေးနွေး

BVJ/အိုင်းရစ် _ ဖေဖော်ဝါရီ ၂၁ ၊ ၂၀၂၅

Photo: ABSDSF

အမျိုးသားညီညွတ်ရေးအစိုးရ (NUG) ကာကွယ်ရေးဝန်ကြီး ဦးရည်မွန်နဲ့ မြန်မာနိုင်ငံလုံးဆိုင်ရာကျောင်းသားများ ဒီမိုကရက်တစ်တပ်ဦး (ABSDF) ခေါင်းဆောင်တို့ တွေ့ဆုံခဲ့ပြီး လက်ရှိကာလ နိုင်ငံရေးနဲ့ စစ်ရေးအခြေအနေတွေကို ဆွေးနွေးခဲ့တယ်လို့ သိရပါတယ်။

ABSDF ဥက္ကဋ္ဌ ရဲဘော်သံခဲ၊ ဒုတိယ ဥက္ကဋ္ဌ ရဲဘော် လဆိုင်းနဲ့ ဗဟိုစစ်ကော်မရှင် အတွင်းရေးမှူး ရဲဘော် လှဌေးတို့ ABSDF စစ်ကြောင်း ၁ ၊ စစ်ကြောင်း ၂ နဲ့ စစ်ကြောင်း ၃ အခြေစိုက်ဒေသတွေကိုသွားရောက်ချိန် NUG ကာကွယ်ရေးဝန်ကြီး ဦးရည်မွန်နဲ့ တွေ့ဆုံခဲ့တာလည်း ဖြစ်ပါတယ်။

“လတ်တလော စစ်ဆင်ရေးတွေ နိုင်ငံရေးဆိုင်ရာ လုပ်ငန်းတွေ ဆွေးနွေးခဲ့ကြတာပါ။ ဥက္ကဌနဲ့အတူ စစ်ကြောင်းမှူးတွေလည်း ပါပါတယ်” လို့ NUG ကာကွယ်ရေးဝန်ကြီးနဲ့ တွေ့ဆုံခဲ့မှုနဲ့ပတ်သက်ပြီး ABSDF ပြောရေးဆိုခွင့်ရှိသူ ရဲဘော်ကျော်ကျော်လင်းကလည်း Burma VJ ကို ပြောပါတယ်။

ABSDF (ကျောင်းသားတပ်မတော်) အမှတ် ၁ စစ်ကြောင်းနဲ့ အမှတ် ၂ စစ်ကြောင်းတို့ဟာ မြောက်ပိုင်းဒေသ ကချင်ပြည်နယ်အတွင်းမှာရှိပြီး အမှတ် ၃ စစ်ကြောင်းဟာ မကွေးတိုင်း ဂန့်ဂေါမြို့နယ်နဲ့ စစ်ကိုင်းတိုင်း ကောလင်း၊ ပင်လည်ဘူးမြို့နယ်တို့မှာ ရှိနေတာလည်း ဖြစ်ပါတယ်။

ပြီးခဲ့တဲ့ ၂၀၂၄ ခုနှစ်က စက်တင်ဘာ ၁၂ ရက်ကလည်း စစ်အာဏာရှင်စနစ် ပပျောက်ရေးနဲ့ အနာဂတ် ဖက်ဒရယ် ဒီမိုကရက်တစ် ပြည်ထောင်စုပေါ်ထွန်း ရေးလုပ်ငန်းတွေမှာ အတူတကွ လက်တွဲတိုက်ပွဲဝင် ပူးပေါင်းဆောင်ရွက်ရေးတို့အတွက် NUG နဲ့ ABSDF နှစ်ဖက်အဖွဲ့အစည်းကြား နားလည်မှုစာချွန်လွှာ ချုပ်ဆိုခဲ့ကြပါသေးတယ်။