ဒေါ်စောမြရာဇာလင်းနဲ့ နော်ကပေါ်ထူးတို့ကို စစ်ကောင်စီက အမျိုးသမီးစွမ်းဆောင်မှုဆိုင်ရာ ဂုဏ်ထူးဆောင်ဘွဲ့ ပေး

BVJ/ယူဂရင်း_ ဇူလိုင် ၃၊ ၂၀၂၅

KNU/KNLA-PC ဒုတိယဥက္ကဋ္ဌ နောကပေါ်ထူး (CINCDS)

ရခိုင်ပြည်၊ လွတ်မြောက်ရေးတပ်မတော်-ALPဥက္ကဋ္ဌ ဒေါ်စောမြရာဇာလင်းနဲ့ ကရင်အမျိုးသား အစည်းအရုံး၊ ကရင်အမျိုးသားလွတ်မြောက်ရေးတပ်မတော် (ငြိမ်းချမ်းရေးကောင်စီ) KNU/KNLA-PC ဒုတိယဥက္ကဋ္ဌ နော်ကပေါ်ထူး တို့ကို စစ်ကောင်စီက အမျိုးသမီးစွမ်းဆောင်မှုဆိုင်ရာ ဂုဏ်ထူးဆောင်ဘွဲ့ ဝဏ္ဏကျော်ထင်ဘွဲ့ ချီးမြှင့်လိုက်ကြောင်းကြေညာပါတယ်။

ဒီနေ့ ဇူလိုင် ၃ ရက်မှာကျရောက်တဲ့ မြန်မာအမျိုးသမီးများနေ့ကို ဂုဏ်ပြုတဲ့အနေနဲ့ သက်ဆိုင်ရာ နယ်ပယ်အလိုက် ထူးချွန်ပြောင်မြောက်စွာကြိုးပမ်းဆောင်ရွက်ခဲ့တဲ့ အမျိုးသမီး(၁၅၀)ကျော်ကို စစ်ကောင်စီက ဂုဏ်ထူးဆောင်ဘွဲ့ တံဆိပ်တွေ ချီးမြှင့်ခဲ့တာဖြစ်ပြီး အဲ့ဒီထဲမှာ ဝဏ္ဏကျော်ထင်ဘွဲ့ ရသူ အမျိုးသမီးသုံးဦးပါဝင်ပါတယ်။

ဝဏ္ဏကျော်ထင်ဘွဲ့ ချီးမြှင့်လိုက်သူ အမျိုးသမီးသုံးဦးထဲမှာ ဒေါ်စောမြရာဇာလင်း၊ နော်ကပေါ်ထူးတို့နဲ့အတူ ပညာရေးဝန်ကြီးဌာန ပါမောက္ခ/ဌာနမှူး(ငြိမ်း) ဒေါက်တာဒေါ်ပိုလည်းပါဝင်ပါတယ်။

ဒေါ်စောမြရာဇာလင်း၊ နော်ကပေါ်ထူးတို့ဦးဆောင်တဲ့ ALPနဲ့ KNU/KNLA-PC တို့ဟာ ငြိမ်းချမ်းရေးအတွက်ဆိုကာ အာဏာသိမ်းစစ်ကောင်စီနဲ့ ပူးပေါင်းဆောင်ရွက်နေကြသူတွေဖြစ်ပြီး အခုလအတွင်းနေပြည်တော်မှကျင်းပခဲ့တဲ့ စစ်ကောင်စီရဲ့ ငြိမ်းချမ်းရေးဖိုရမ် ၂၀၂၅ကိုလည်း တက်ရောက်ခဲ့ပါသေးတယ်။

ALPဥက္ကဋ္ဌ ဒေါ်စောမြရာဇာလင်း (ဓါတ်ပုံ-ALP)