၅၀၅(က)ပုဒ်မနဲ့ထောင်ချခံရပြီး ပြန်လွတ်မြောက်လာတဲ့သူတွေထဲ သူတို့လေးဦးပါဝင်လာ

အေတီ/BVJ_နိုဝင်ဘာ ၂၇၊ ၂၀၂၅

၂၀၂၅ခုနှစ်၊ဇန်နဝါလ ၃၁ရက်နေ့က ၅၀၅ က ပုဒ်မနဲ့ထောင်၃နှစ်ချခံခဲ့ရတဲ့ ကိုဇော်လင်းထွဋ် (ခ)ဖိုးသား၊ ကိုအောင်မင်းခိုင်(ခ)မဲကြီး ၊မမြမဉ္ဇူနဲ့ မနှင်းအိခိုင်တို့ လေးဦးဟာ ဒီနေ့ပြန်လွတ်မြောက်လာတဲ့သူတွေထဲ ပါဝင်လာပြီလို့သိရပါတယ်။

ကိုဇော်လင်းထွဋ်(ခ)ဖိုးသား၊မမြမဉ္ဇူနဲ့မနှင်းအိခိုင်တို့သုံးဦးဟာ ရန်ကုန်၊ အင်းစိန်ထောင်ကလွတ်မြောက်လာသူ ၁၉၂ ဦးထဲမှာပါဝင်ပြီး ကိုအောင်မင်းနိုင်(ခ)မဲကြီးကတော့ ဟင်္သာတထောင်ကလွတ်မြောက်လာတာလို့ တကသကျောင်းသားများအင်အားစုနဲ့နီးစပ်သူတစ်ဦးက Burma VJကိုအတည်ပြုပါတယ်။

တကသကျောင်းသားဟောင်းများအင်အားစု တွဲဖက်တည်ထောင်သူ အလွတ်တမ်း ဓါတ်ပုံသတင်းထောက် ကိုဇော်လင်းထွဋ် (ခ) ဖိုးသားအပါအဝင် သူတို့လေးဦးကို အာဏာသိမ်းစစ်ကောင်စီက ၂၀၂၄ခုနှစ်၊ စက်တင်ဘာ၁၉ ရက်နေ့က ဖမ်းဆီးခဲ့တာဖြစ်ပါတယ်။

၂၀၂၅ခုနှစ် ဇန်နဝါလ ၃၁ရက်နေ့က ၅၀၅က ပုဒ်မနဲ့ထောင်၃နှစ်ချခံခဲ့ရပြီး အင်းစိန်ထောင်ကဒီနေ့ပြန်လွတ်လာတဲ့ ကိုဖိုးသား

အာဏာသိမ်းစစ်အုပ်စုဟာ ရာဇသတ်ကြီးပုဒ်မ ၅၀၅-ကနဲ့ဖမ်းဆီးထိန်းသိမ်းထားသူ ၃,၀၈၅ဦးကို လွတ်ငြိမ်းခွင့်နဲ့ပြစ်ဒဏ်လျှော့ပေါ့ပေးမယ်ဆိုကာ အဲ့ဒီထဲက ၇၂၄ ဦးကို‌တော့ ခံဝန်နဲ့လွှတ်ပေးပြီး၊ ကျန်တဲ့ ၂,၃၆၁ဦးကိုတော့ ပြစ်ဒဏ်လျှော့ပေါ့ပေးမယ်လို့ မနေ့ကကြေညာခဲ့ပါတယ်။

အဲ့ဒီ ၂၃၆၁ဦးဟာ ပုဒ်မတခုထက်မက စွဲချက်နဲ့ထောင်ချခံထားရတဲ့သူတွေဖြစ်တဲ့အတွက် ၅၀၅(က)ပုဒ်မကို ပလပ်တယ်ဆိုရင်တောင် ကျန်တဲ့အခြားပုဒ်မတွေပြစ်ဒဏ်ဆက်လက်ကျခံရဦးမှာဖြစ်တယ်လို့ နိုင်ငံရေးအကျဉ်းသားများကူညီစောင့်ရှောက်ရေးအသင်း-အေအေပီပီရဲ့အတွင်းရေးမှူး ဦးတိတ်နိုင်က ပြောပါတယ်။

အာဏာသိမ်းစစ်အုပ်စုကြေညာချက်အရ အဲ့ဒီ၂၃၆၁ ဦးထဲက တစ်ဦးမှပြန်လွတ်မှာမဟုတ်ပါဘူး။ ပုဒ်မ ၅၀၅ (က) စွဲချက်တခုထဲနဲ့ထောင်ချထားတဲ့ ၇၂၄ ဦးကိုပဲ လွှတ်ပေးမှာဖြစ်ပါတယ်။ အေအေပီပီရဲ့မှတ်တမ်းအရ ပုဒ်မ ၅၀၅(က) နဲ့ အတူ အခြားပုဒ်မများနဲ့စွဲချက်တင်ဖမ်းဆီးခံထားရတာ ၅၂၆၈ ဦးရှိနေတယ်လို့ သိရပါတယ်။