အင်ဖန်တီနိုရဲ့ အနာဂတ်နဲ့ UEFAက သပိတ်မှောက်ဖို့ ပြင်ဆင်နေမှု
- BVJ
- Jul 31
- 2 min read
အီးကေ
ဇူလိုင်လ ၃၀ ရက်၊ ကြာသပတေးနေ့ ညနေ ၄ နာရီမှာပဲ ဘောလုံးလောကတစ်ခုလုံး တုန်လှုပ် သွားစေတဲ့ သတင်းတစ်ခု ရောက်လာခဲ့ပါတယ်။ အဲဒါကတော့ FIFAဖီဖာ ဥက္ကဋ္ဌ အင်ဖန်တီနိုက သူ့ရဲ့ ရန်ပုံငွေရှာတဲ့ စီမံချက်ကို ဆက်ပြီး အကောင်အထည်ဖော်မယ်ဆိုရင်၊ "UEFA နဲ့ သူ့လက်အောက်ခံ အဖွဲ့ဝင်နိုင်ငံတွေဟာ ဖီဖာ ပြိုင်ပွဲတွေမှာ ပါဝင်ယှဉ်ပြိုင်တော့မှာ မဟုတ်ဘူးလို့ ဥရောပ ဘောလုံး အဖွဲ့ချုပ် (UEFA) က ပြတ်ပြတ်သားသား ကြေညာလိုက်တာပဲ ဖြစ်ပါတယ်။
ဒါဟာ FIFA ဥက္ကဋ္ဌ ဂျီယန်နီ အင်ဖန်တီနိုရဲ့ စီမံချက်ကို ဥရောပဘက်က ဆန့်ကျင်လိုက်တဲ့ အပြင်း ထန်ဆုံး ခြေလှမ်းပါ။ အင်ဖန်တီနိုက ဘာလုပ်ဖို့ ကြံစည်နေတာလဲဆိုရင် ကမ္ဘာ့ဖလား အပါအဝင် FIFA ပြိုင်ပွဲတွေကို ကိုင်တွယ်ဖို့ သီးသန့်ကုမ္ပဏီခွဲတစ်ခု ထူထောင်ပြီး၊ အဲဒီကုမ္ပဏီရဲ့ ရှယ်ယာ ၂၀ ရာခိုင်နှုန်းကို ပုဂ္ဂလိက ရင်းနှီးမြှုပ်နှံသူတွေဆီ (ဒီထဲမှာ အမေရိကန်သမ္မတ ဒေါ်နယ်ထရမ့်ရဲ့ သမက်ဖြစ်သူ ဂျိုရှုဝါ ကုရှနာလည်း ပါပါတယ်) ရောင်းချဖို့ ကြိုးစားနေတာပါ။ ဒါကို UEFA က "ဘောလုံးကို ရောင်းစားတာ" လို့ သတ်မှတ်ပြီး ပြင်းပြင်းထန်ထန် ကန့်ကွက်လိုက်တာ ဖြစ်ပါတယ်။
ကန့်ကွက်မှုတွေ ဘာကြောင့် ကျယ်ပြန့်လာတာလဲ
အခုဆိုရင် UEFA အဖွဲ့ဝင် ၅၅ နိုင်ငံက ဒီအစီအစဉ်ကို ဆက်လုပ်ရင် ကမ္ဘာ့ဖလားကို သပိတ်မှောက်မယ်လို့ မဲခွဲဆုံးဖြတ်ထားကြပါပြီ။ ဒါတင်မကသေးပါဘူး၊ ဒီနှစ် ကမ္ဘာ့ဖလားကို အိမ်ရှင်အဖြစ် ကျင်းပခဲ့တဲ့ မြောက်နဲ့ ဗဟိုအမေရိက (Concacaf) အဖွဲ့ချုပ်ကလည်း သူတို့အဖွဲ့ဝင် ၄၁ နိုင်ငံလုံးက အင်ဖန်တီနိုရဲ့ အဆိုပြုချက်ကို ပယ်ချလိုက်ပြီလို့ ကြေညာလိုက်ပါတယ်။
UEFA ရဲ့ သဘောထားကတော့ အရမ်းရှင်းပါတယ်။ "ကမ္ဘာ့ဖလားဆိုတာ ရင်းနှီးမြှုပ်နှံမှု ကုန်ပစ္စည်း မဟုတ်ပါဘူး။ ဒါဟာ မျိုးဆက်ပေါင်းများစွာက တည်ဆောက်လာတဲ့ ဘောလုံးလောကရဲ့ အမွေအနှစ်ပါ။ ဘယ်အစိတ်အပိုင်းကိုမှ ပုဂ္ဂလိက ရင်းနှီးမြှုပ်နှံသူတွေဆီ လက်လွှဲပေးလို့ မရဘူး။ ကမ္ဘာ့ဖလားဟာ ရောင်းဖို့ မဟုတ်ဘူး" လို့ ပြတ်ပြတ်သားသား ပြောထားပါတယ်။
ဘာတွေ ဆက်ဖြစ်လာမလဲ
အခြေအနေက ဘယ်လို အဆုံးသတ်မလဲဆိုတာ ဘယ်သူမှ မပြောနိုင်သေးပါဘူး။ စက်တင်ဘာ ၅ ရက်မှာ စတင်မယ့် U20 အမျိုးသမီး ကမ္ဘာ့ဖလားပြိုင်ပွဲမှာတောင် ဥရောပနိုင်ငံတွေ ပါဝင်နိုင်ပါ့မလားဆိုတာ မေးခွန်းထုတ်စရာ ဖြစ်နေပါပြီ။
FIFA အနေနဲ့ အင်ဖန်တီနိုရဲ့ အစီအစဉ် အောင်မြင်ဖို့အတွက် အဖွဲ့ဝင် ၂၁၁ နိုင်ငံထဲက ၁၀၆ နိုင်ငံရဲ့ ထောက်ခံမဲ လိုအပ်ပါတယ်။ အင်ဖန်တီနိုကတော့ "ငါ့အဆိုပြုချက်ကို ထောက်ခံရင် ဒေါ်လာ သန်း ၄၀ ပေးမယ်" ဆိုပြီး ငွေကြေးနဲ့ သွေးဆောင်ထားပါတယ်။ ဒါပေမဲ့ UEFA နဲ့ Concacaf တို့ ပေါင်း လိုက်ရင် ၉၆ နိုင်ငံ ရှိနေပြီဆိုတော့ အင်ဖန်တီနိုအတွက် အတော်လေးကို ကျပ်တည်းနေပါတယ်။
အင်ဖန်တီနို ရာထူးမှာ ဆက်ရှိနိုင်ပါ့မလား
အခုအချိန်မှာ အင်ဖန်တီနိုရဲ့ အနာဂတ်က အတော်လေး မရေမရာ ဖြစ်နေပါတယ်။ အဓိက အငြင်းပွားနေတာက သူ့ ရဲ့ လုပ်ပိုင်ခွင့်ကို အလွန်အကျွံ သုံးတာနဲ့ တိုင်ပင်ဆွေးနွေးမှု မရှိတာပါပဲ။
လာမယ့် မတ်လမှာ သူက စတုတ္ထအကြိမ်မြောက် သက်တမ်းအတွက် ဝင်ပြိုင်ဖို့ ရှိနေပေမဲ့၊ အခုလို အဖြစ်အပျက် တွေကြောင့် သူ့ကို ဆန့်ကျင်မယ့်သူ ရှာဖို့တောင် ပြောဆိုသံတွေ ထွက်လာနေပါပြီ။ PSG ဥက္ကဋ္ဌ နဆာ အယ်လ်ခလိုင်ဖီရဲ့ နာမည် ထွက်လာပေမဲ့ သူကိုယ်တိုင်ကတော့ ဒီရာထူးကို မလိုချင်ဘူးလို့ ဆိုပါတယ်။
အရင် FA ဥက္ကဋ္ဌဟောင်း ဒေးဗစ် ဘန်စတိန်း ပြောသလိုပါပဲ - "သာမန်အဖွဲ့အစည်းဆိုရင်တော့ ဒီလိုအမှားမျိုး ကျူးလွန်ရင် ထွက်ပေးရမှာပေါ့။ ဒါပေမဲ့ FIFA ဆိုတာ ပုံမှန်အဖွဲ့အစည်း မဟုတ်ဘူး။ နိုင်ငံအသင်းတွေရဲ့ ထောက်ခံမှု ရနေသရွေ့ သူ ဆက်ရှိနေဦးမှာပဲ" တဲ့။
ဘာပဲဖြစ်ဖြစ်၊ ဘောလုံးလောကမှာ ပြုပြင်ပြောင်းလဲမှုသစ်တွေ လိုအပ်နေပြီဆိုတာကတော့ အသေအချာပါပဲ။ ဒီပွဲက ဘယ်သူအနိုင်ရသွားမလဲဆိုတာ စောင့်ကြည့်ရဦးမှာပါ။
Comments