မြန်မာစာပေပညာရှင် မောင်ခင်မင်(ဓနုဖြူ) ရုတ်တရက်ကွယ်လွန်

BVJ/မိုနာ_ ဇန်နဝါရီ ၂၈၊ ၂၀၂၅

မြန်မာစာပေလောကမှာ ထင်ရှားကျော်ကြားတဲ့ အငြိမ်းစား မြန်မာစာပါမောက္ခ ဆရာကြီး ဒေါက်တာခင်အေး (မောင်ခင်မင်-ဓနုဖြူ) မနေ့က ညပိုင်းမှာရုတ်တရက် ကွယ်လွန်သွားခဲ့တယ်လို့ သမီးဖြစ်သူက အသိပေးထားပါတယ်။

ဇန်နဝါရီ ၂၇ ရက်နေ့ ည ၁၂ နာရီခွဲမှာ မောင်ခင်မင် (ဓနုဖြူ) ရုတ်တရက်ကွယ်လွန်သွားတာဖြစ်တယ်လို့ သမီးဖြစ်သူ မသူသူနွယ်အေးက လူမှုကွန်ရက် စာမျက်နှာကနေအသိပေးထားတာပါ။

မြန်မာစာရွှေတောင်ကြီး၊ မြန်မာစာဖခင်ကြီး ဒေါက်တာခင်အေး၊ မောင်ခင်မင်-ဓနုဖြူကွယ်လွန်သွားတဲ့အပေါ် အထူးကြေကွဲဝမ်းနည်းရကြောင်းကို မြန်မာစာပေအသိုင်းအဝိုင်းကလည်း ရေးသားထားကြပါတယ်။

အမည်ရင်းကဦးခင်အေးဖြစ်တဲ့ ဆရာကြီး မောင်ခင်မင်(ဓနုဖြူ)ဟာ ကွယ်လွန်ချိန်မှာ အက်(၈၄)နှစ်ရှိပြီး ဧရာဝတီတိုင်း ဓနုဖြူမြို့နယ်ဇာတိဖြစ်ပါတယ်။

မြန်မာစာပေလောကမှာ ထင်ရှားသူတစ်ဦးဖြစ်တဲ့ ဆရာကြီးဟာ နိုင်ငံ့ဝန်ထမ်းအဖြစ်ကနေအငြိမ်းစားယူခဲ့ပြီး ရန်ကုန်တက္ကသိုလ်ကနေ ဆရာကြီး မောင်ခင်မင် (ဓနုဖြူ) ကို ဂုဏ်ထူးဆောင် စာပေပါရဂူဘွဲ့ ချီးမြှင့်ခဲ့ပါတယ်။

မြန်မာစာပေနဲ့ပတ်သက်တဲ့ စာအုပ်ပေါင်း သုံးဆယ်နီးပါးကို မောင်ခင်မင် (ဓနုဖြူ) အမည်နဲ့ ရေးသားခဲ့ပါတယ်။