သီပေါမှာ SSPPနဲ့ MNDAA တပ်တွေကြား တင်းမာမှုဖြစ်နေပြီး MNDAA ဘက်က တပ်အင်အားဖြည့်တင်းမှုတွေပြုလုပ်နေ
- BVJ
- Apr 30
- 1 min read
BVJ/Moore _ ဧပြီ ၃၀ ၊ ၂၀၂၅
ရှမ်းပြည်နယ်မြောက်ပိုင်း သီပေါမြို့နယ်မှာ ကိုးကန့်တပ်မတော် (MNDAA) နဲ့ ရှမ်းပြည်တပ်မတော် (SSPP/SSA) တို့ တင်းမာမှုဖြစ်ပွားနေပြီး ထိတွေ့ပစ်ခတ်မှုတွေရှိခဲ့တယ်လို့ SSPP/SSA က ဒီနေ့ ဧပြီ ၃၀ ရက်မှာ သတင်းထုတ်ပြန်လာပါတယ်။
အခု ဧပြီလနောက်ဆုံးပတ်မှာ သီပေါမြို့နယ် တင်းဟိုင်းရွာ၊ ဟူးမီရွာနဲ့ နမ့်မရွာတို့မှာ နယ်မြေအငြင်းပွားမှုဖြစ်ပွားခဲ့တာကြောင့် နှစ်ဖက်တင်းမာမှုဖြစ်ပွားခဲ့ပြီး ထိခိုက်သေဆုံးမှုတွေလည်းရှိခဲ့တယ်လို့ SSPP က ဖော်ပြထားပါတယ်။
MNDAA တပ်ဖွဲ့ဝင်တွေ SSPP အုပ်ချုပ်ရေးနယ်မြေအတွင်း ကြိုတင်အကြောင်းကြားတာမျိုးမရှိဘဲ ဝင်ရောက်ဖြတ်သန်းလာခဲ့တာကြောင့် SSPP အောက်ခြေတပ်သားတွေနဲ့ ဧပြီ ၂၈ ၊ ၂၉ ရက်မှာ ထိတွေ့တိုက်ပွဲဖြစ်ပွားခဲ့ပြီး နှစ်ဖက်တပ်ဖွဲ့တွေ ထိုးကြိတ်ဖမ်းဆီးမှုတွေ ဖြစ်ပွားခဲ့တယ်လို့ ဆိုပါတယ်။
အခုဖြစ်စဉ်နဲ့ပတ်သက်ပြီး ကိုးကန့်တပ်မတော် (MNDAA) က တစုံတရာထုတ်ပြန်တာမျိုးမရှိသေးပေမဲ့ နှစ်ဖက်စစ်ရေးထိတွေ့မှု၊ စစ်ရေးတင်းမာမှုတွေနဲ့ပတ်သက်ပြီး နှစ်ဖက်ပါတီ ဗဟိုအဆင့် တွေ့ဆုံဖြေရှင်းသွားမယ်လို့လည်း SSPP/SSA သတင်းနှင့် ပြန်ကြားရေးက ထုတ်ပြန်ထားပါတယ်။
လက်ရှိမှာ SSPP/SSA တပ်စခန်းတွေရှိတဲ့ နားနန်းကျေးရွာ၊ နားတော်ကျေးရွာ၊ ခိုနန်းဖ၊ တင်းဟိုင်းကျေးရွာ၊ ဆင်ကျော့ ၊ နားတောင့်၊ နားမခေါ်၊ ဖာစေ (သီပေါ) စတဲ့ နေရာတွေအနီးမှာ MNDAA က တပ်အင်အားဖြည့်တင်းမှုတွေ လုပ်ဆောင်နေတယ်လို့ SSPP သတင်းပြန်ကြားရေးက ဖော်ပြထားပါတယ်။
ပြီးခဲ့တဲ့ ၂၀၂၄ ဧပြီ ၂၆ ရက်ကလည်း သိန္နီမြို့နယ် နန့်စလပ်ဒေသမှာ SSPP/SSA နဲ့ MNDAA တို့ ထိတွေ့တိုက်ပွဲဖြစ်ပွားခဲ့ပြီး ထိခိုက်ဒဏ်ရာရရှိသူတွေရှိခဲ့သလို နှစ်ဖက်အပြန်အလှန်ဖမ်းဆီးမှုတွေလည်း ရှိခဲ့ပါသေးတယ်။
MNDAA နဲ့ SSPP/SSA တို့ဟာ “ဝ” တပ်ဖွဲ့ ဦးဆောင်တဲ့ ပြည်ထောင်စုနိုင်ငံရေး ဆွေးနွေးညှိနှိုင်းရေးကော်မတီ (FPNCC) အဖွဲ့ဝင်တွေဖြစ်ကြပြီး နှစ်ဖက်အဖွဲ့အကြား နယ်မြေအငြင်းပွားမှုနဲ့ပတ်သက်ပြီး မကြာခဏ တင်းမာမှုတွေ ဖြစ်ပွားနေတာလည်း ဖြစ်ပါတယ်။
Comments