နျူကလီးယားစက်ရုံတည်ဆောက်မယ့် စစ်ကောင်စီကို ဒေသတွင်းနိုင်ငံတွေက အလေးထားတုံ့ပြန်ဖို့ NUG တိုက်တွန်း

BVJ/မိုနာ_ မေ ၁၃၊ ၂၀၂၅

ရုရှားအစိုးရပိုင် Rosatom က တည်ဆောက်ထားတဲ့ ဘယ်လာရုစ်နိုင်ငံက နျူကလီးယားစွမ်းအင်သုံး ဓာတ်အားပေးစက်ရုံ (ဓာတ်ပုံ - EPA)

စစ်ကောင်စီအနေနဲ့ နျူကလီးယားစွမ်းအင်သုံး ဓာတ်အားပေးစက်ရုံတည်ဆောက်မှာက မြန်မာနိုင်ငံနဲ့ ပြည်သူလူထုသာမကဘဲ ဒေသတွင်းနိုင်ငံတွေနဲ့ပြည်သူတွေရဲ့ လုံခြုံရေးနဲ့တည်ငြိမ်အေးချမ်းရေးကိုပါ ထိပါးလာနိုင်တာကြောင့် ဒေသတွင်းနိုင်ငံတွေအနေနဲ့ မြန်မာပြည်သူ၊တော်လှန်ရေးအင်အားစုတွေနဲ့အတူ ရပ်တည်ပြီး အထူးအလေးထား တုံ့ပြန်ဆောင်ရွက်ကြဖို့ဆိုပြီး အမျိုးသားညီညွတ်ရေးအစိုးရ-NUG ဝန်ကြီးချုပ်ရုံး ပြောရေးဆိုခွင့်ရှိသူ ဦးနေဘုန်းလတ်က ပြောပါတယ်။

“စစ်ခေါင်းဆောင် မင်းအောင်လှိုင်နဲ့အပေါင်းပါတစုဟာ သူတို့ရဲ့အာဏာတည်မြဲရေးတခုထဲကိုသာ ရှေးရှုပြီး ပြည်သူတွေရဲ့အခွန်ဘဏ္ဍာတွေကို ထင်သလိုအသုံးပြုနေသလို အချို့သောနိုင်ငံတွေနဲ့ နျူကလီးယားစွမ်းအင်သုံး ဓာတ်အားပေးစက်ရုံတည်ဆောက်ခြင်းစတဲ့ လုပ်ငန်းစာချုပ်တွေချုပ်ဆိုပြီး တိုင်းပြည်ကိုလည်း အမျှော်အမြင်ကင်းမဲ့စွာ အသုံးချလျက်ရှိနေပါတယ်”လို့ ဒီနေ့ မေ ၁၃ရက်မှာ “ပြည်သူလူထုနှင့်နိုင်ငံတကာသို့သတင်းစကားပြောကြားခြင်း" အစီအစဉ်မှာ ဦးနေဘုန်းလတ်က ပြောတာပါ။

စစ်ကောင်စီဟာ ရုရှားနည်းပညာနဲ့ ၁၁၀ မက်ဂါဝပ် အနုမြူဓာတ်အားပေးစက်ရုံကို တည်ဆောက်မယ်ဆိုတဲ့အကြောင်းကို စစ်ကောင်စီဝါဒဖြန့်သတင်းစာတွေကနေ မတ်လ ၇ ရက်နေ့က ဖော်ပြခဲ့ပါတယ်။

၂ဝ၂၂၊ ဇူလိုင်လအတွင်း ရုရှားနိုင်ငံကို စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင် သွားရောက်ခဲ့

အာဏာသိမ်းစစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင်ဟာ အခုနှစ် မတ်လအတွင်းမှာ ရုရှားနိုင်ငံကို သွားရောက်ခဲ့ချိန်က ရုရှားသမ္မတ ဗလာဒီမာပူတင်နဲ့တွေ့ဆုံပြီး နှစ်ဖက် ပူးပေါင်းဆောင်ရွက်ရေး သဘောတူညီမှုတချို့ကို လက်မှတ်ရေးထိုးခဲ့ပါတယ်။ အဲ့ဒီသဘောတူညီချက်တွေထဲမှာ ဓာတ်အား ၁၁၀ မဂ္ဂါဝပ် ထုတ်လုပ်နိုင်မယ့်အသေးစား နျူကလီးယားဓာတ်အားပေး စက်ရုံတစ်ခုကို မြန်မာနိုင်ငံမှာတည်ဆောက်ပေးဖို့ ဆိုတဲ့ အချက်လည်းပါဝင်ပါတယ်။

စစ်ကောင်စီရဲ့ နျူကလီးယားဓာတ်အားပေး စက်ရုံတည်ဆောက်မယ့်အပေါ် မှာ ထိုင်း-မြန်မာ နယ်စပ်တလျှောက် နေထိုင်နေကြတဲ့ပြည်သူတွေရဲ့ လုံခြုံရေး၊ အန္တရာယ်ကင်းရှင်းမှုနဲ့ကောင်းမွန်တဲ့ ဘဝနေထိုင်မှုတွေအတွက် အလွန်စိုးရိမ်ပူပန်မိကြာင်းကို ကရင်အမျိုးသားအစည်းအရုံး-KNU ကလည်း အခုလ ၉ရက်မှာ ထုတ်ပြန်ထားပါသေးတယ်။