FATF အမည်ပျက်စာရင်းထဲကနေ မြန်မာနိုင်ငံ ကို ဖယ်ရှားဖို့ စစ်ကောင်စီ ရဲ့ ကြိုးပမ်းမှု မအောင်မြင်ခဲ့

BVJ/အိုင်းရစ် _ ဖေဖော်ဝါရီ ၂၂ ၊ ၂၀၂၅

စစ်ကောင်စီလက်အောက်ခံ ဗဟိုဘဏ်ဥက္ကဌ ဒေါ်သန်းသန်းဆွေ

၂၀၂၁ စစ်တပ်အာဏာသိမ်းပြီးနောက်ပိုင်း နိုင်ငံတကာငွေကြေးခဝါချမှုစောင့်ကြည့်ရေးအဖွဲ့ (FATF) က မြန်မာနိုင်ငံကို အမည်ပျက်စာရင်း (Black List) ကြေညာထားခံရမှုကနေ ဖယ်ရှားနိုင်ဖို့ စစ်ကောင်စီက ပြင်ဆင်လုပ်ဆောင်နေပေမဲ့ အောင်မြင်မှုမရရှိဘဲ အမည်ပျက်စာရင်းမှာ ဆက်လက်ထားရှိကြောင်း FATF က ထုတ်ပြန်လာပါတယ်။

ပြင်သစ်နိုင်ငံ ပါရီမြို့မှာ ဖေဖော်ဝါရီ ၁၇ ရက်ကနေ ၂၁ ရက်နေ့အထိ ကျင်းပခဲ့တဲ့ FTAF အစည်းအဝေးကို စစ်ကောင်စီလက်အောက်ခံ ဗဟိုဘဏ်ဥက္ကဌ ဒေါ်သန်းသန်းဆွေနဲ့အဖွဲ့က တက်ရောက်ခဲ့ပြီး သတ်မှတ်ကာလအတွင်း ပြင်ဆင်ဆောင်ရွက်မှုအခြေအနေတွေကို တင်ပြခဲ့တယ်လို့ စစ်ကောင်စီလက်အောက်ခံ သတင်းစာမှာ ဖော်ပြထားပါတယ်။

စစ်တပ်အာဏာမသိမ်းမီ ဒေါ်အောင်ဆန်းစုကြည် အစိုးရလက်ထက်က မြန်မာနိုင်ငံကို ငွေကြေးခဝါချမှု၊ အကြမ်းဖက်တိုက်ဖျက်ရေးတို့နဲ့ပတ်သက်ပြီး FATF က အကြံပြုထောက်ပြခဲ့မှုတွေ လုပ်ဆောင်ခဲ့ပြီးနောက် တိုးတက်မှုစောင့်ကြည့်စာရင်း (Gray List) ထဲ ထည့်သွင်းခဲ့ပြီး စစ်တပ်အာဏာသိမ်းပြီးနောက်ပိုင်း ၂၀၂၂ အောက်တိုဘာလမှာ အမည်ပျက်စာရင်း ထည့်သွင်းခဲ့တာလည်း ဖြစ်ပါတယ်။

ငွေကြေးခဝါချမှု တိုက်ဖျက်ရေးဥပဒေကို ပြင်ဆင်နိုင်ဖို့ ဆောင်ရွက်နေကြောင်းနဲ့ AML/CFT ဆိုင်ရာ အမျိုးသားအဆင့် မဟာဗျူဟာ (၂၀၂၄-၂၀၂၈) ကိုလည်း ရေးဆွဲနေတယ်လို့ ဗဟိုဘဏ်ဥက္ကဌ ဒေါ်သန်းသန်းဆွေက FATF အစည်းအဝေးမှာ တင်ပြထားကြောင်း စစ်ကောင်စီ သတင်းစာတွေမှာ ဖော်ပြထားပါတယ်။ ဒါ့အပြင် ၂၀၂၅-၂၀၂၆ ဘဏ္ဍာနှစ်အတွင်း FATF က အကြံပြုချက်တွေကို အကောင်အထည်ဖော် လိုက်နာဆောင်ရွက်နိုင်ဖို့ ဆက်လက်လုပ်ဆောင်နေတယ်လို့ ဆိုပါတယ်။

၂၀၂၅ ဇွန်လအထိ တိုးတက်မှုတစုံတရာမရှိပါက ထပ်တိုးအရေးယူမှုတွေကို ဆက်လက်လုပ်ဆောင်သွားမယ်လို့ FATF ရဲ့ ထုတ်ပြန်ချက်မှာ ဖော်ပြထားပြီး လက်ရှိကာလအထိ မြန်မာနိုင်ငံ အမည်ပျက်စာရင်းထဲ ဆက်လက်ထည့်သွင်းထားမှာဖြစ်တယ်လို့ ဖော်ပြထားပါတယ်။ FATF ရဲ့ အမည်ပျက်စာရင်းများထဲတွင် မြန်မာနိုင်ငံနဲ့အတူ အီရန်၊ မြောက်ကိုရီးယားတို့လည်း ပါဝင်နေတာ ဖြစ်ပါတယ်။