လွိုင်ကော်အရှေ့ခြမ်း စစ်ဘေးရှောင်စခန်း ဗုံးကြဲတိုက်ခိုက်ခံရပြီး အမျိုးသမီးတစ်ဦး သေဆုံး
- Zayar Oo
- Jan 1
- 1 min read
BVJ/အိုင်းရစ် _ ဒီဇင်ဘာ ၃၁ ၊ ၂၀၂၄
ကရင်နီပြည်နယ် လွိုင်ကော်မြို့ အရှေ့ခြမ်းမှာရှိတဲ့ စစ်ဘေးရှောင်စခန်းကို စစ်ကောင်စီ လေကြောင်းက ဗုံးကြဲတိုက်ခိုက်ခဲ့တာကြောင့် အမျိုးသမီးတစ်ဦး သေဆုံးကာ ကလေးတစ်ဦးအပါအဝင် ဒေသခံပြည်သူ ၃ ဦး ပြင်းထန်ဒဏ်ရာရရှိခဲ့ပါတယ်။
ဒီနေ့ ဒီဇင်ဘာ ၃၁ ရက် ညနေပိုင်း ၄ နာရီဝန်းကျင်မှာ လွိုင်ကော်မြို့ အရှေ့ခြမ်း စစ်ဘေးရှောင်စခန်း (ဒေသအခေါ် ဆင်စခန်း) ကို စစ်ကောင်စီက လေကြောင်းဗုံးကြဲတိုက်ခိုက်မှု ၂ ကြိမ် လုပ်ဆောင်ခဲ့တာလည်း ဖြစ်တယ်လို့ ကရင်နီအမျိုးသားများကာကွယ်ရေးတပ်ဖွဲ့ (KNDF) ပြောရေးဆိုခွင့်ရှိသူ သာအယ်စိုးက ပြောပါတယ်။
"ဒီညနေ ၄ နာရီဝန်းကျင်မှာ လွိုင်ကော်အရှေ့ခြမ်းက စစ်ဘေးရှောင်စခန်းကို စစ်ကောင်စီက လေကြောင်းဗုံးကြဲတိုက်ခိုက်ခဲ့တာ၊ အမျိုးသမီးတစ်ဦး ပွဲချင်းပြီး သေတယ်။ ၈ နှစ်အရွယ် ကလေးတစ်ဦး ဗိုက်မှာ ဒဏ်ရာရပြီး အူထွက်သွားတယ်။ အမျိုးသားတစ်ဦးက ခြေထောက်ပြတ်တယ်။ ကျောင်းသူတစ်ဦးက ဦးခေါင်းထိမှန် ဒဏ်ရာရတယ်"လို့ သာအယ်စိုးက ပြောပါတယ်။
ပြီးခဲ့တဲ့ ဒီဇင်ဘာ ၂၇ ရက်ကလည်း ကရင်နီပြည်နယ်နဲ့ ရှမ်းပြည်နယ်တောင်ပိုင်းအစပ် ဖယ်ခုံမြို့နယ် ပီကင်းကျေးရွာကို စစ်ကောင်စီလေကြောင်းက ဗုံးကြဲတိုက်ခိုက်မှု လုပ်ဆောင်ခဲ့တာကြောင့် ဒေသခံနေအိမ်အချို့ ထိခိုက်ပျက်စီးကာ အပြစ်မဲ့ပြည်သူ ၂ ဦး ထိခိုက်ဒဏ်ရာရရှိခဲ့ပါသေးတယ်။
အခုလ ဒီဇင်ဘာ ၂၅ ရက် (ခရစ္စမတ်နေ့) ကလည်း မိုးဗြဲမြို့ပေါ် သစ်ယာကုန်းရပ်ကွက်နဲ့ ပေါ်ဦးရပ်ကွက်တွေကို အမှတ် ၄၂၂ ခြေမြန်တပ်ရင်းစခန်းက စစ်ကောင်စီတပ်ဖွဲ့ဝင်တွေက လေကြောင်းကနေ ဒရုန်းနဲ့ Drop Bomb ကြဲချတိုက်ခိုက်ခဲ့တာကြောင့် ဒေသခံပြည်သူနေအိမ် ၅၀ ဝန်းကျင် ထိခိုက်ပျက်စီးခဲ့ပါတယ်။
Comments