ဗဟိုအခြေပြု ဖက်ဒရယ်စနစ်ကိုလက်မခံကြောင်း တိုင်းရင်းသားတော်လှန်ရေး ကိုးဖွဲ့ ကြေညာ

BVJ/မိုနာ_ ဖေဖော်ဝါရီ ၁၂၊ ၂၀၂၅

ဗဟိုချုပ်ကိုင်မှုစနစ်ကို အသစ်တဖန်ပြန်လည်အားကောင်းစေမယ့် ဗဟိုအခြေပြုဖက်ဒရယ်စနစ် (Holding Togther)ကိုလက်ခံကျင့်သုံးသွားမှာမဟုတ်ဘဲ “ပြည်နယ်အားကောင်းရေးကနေ ပြည်ထောင်စု အားကောင်းရေး" (Bottom-up Federalism Approach) အခြေခံ ချည်းကပ်မှုနဲ့သာ တိုင်းပြည် ပြန်လည်တည်ဆောက်သွားနိုင်ရေးကြိုးပမ်းသွားမယ်လို့ စစ်အာဏာရှင်ကို တော်လှန်တိုက်ခိုက်နေတဲ့ တိုင်းရင်းသားတော်လှန်ရေး အဖွဲ့အစည်း (၉)ဖွဲ့ကပူးပေါင်းပြီး ဒီနေ့ ဖေဖော်ဝါရီ ၁၂ ရက်မှာ ထုတ်ပြန်ကြေညာပါတယ်။

ဖက်ဒရယ်ဒီမိုကရေစီပြည်ထောင်စု တည်ဆောက်ရေးကို တော်လှန်ရေးကာလ/ကြားကာလက စတင်ပြီး အနာဂတ်ဖက်ဒရယ် ဒီမိုကရေစီပြည်ထောင်စုတည်ဆောက်မှုကိုလက်တွေ့ဖော်ဆောင်ပြီး အသွင်ကူးပြောင်းရေးကာလအတွက် ဖွဲ့စည်းပုံအခြေခံဥပဒေကဲ့သို့ သက်ရောက်မှုရှိတဲ့ အုပ်ချုပ်ရေးစာတမ်း(Governing Document) အဖြစ် ကျင့်သုံးဆောင်ရွက်သွားဖို့ ဖက်ဒရယ်အသွင်ကူးပြောင်းရေးအစီအမံဆိုင်ရာ အခြေခံဥပဒေကို စတင်ပြင်ဆင်ရေးဆွဲနေပြီလို့လည်း အသိပေးထားပါတယ်။

ဒါကြောင့်စစ်အာဏာရှင်ချုပ်ငြိမ်းရေးအတွက် အတူတကွ တော်လှန်တိုက်ပွဲဝင်နေကြတဲ့ တိုင်းရင်းသားတော်လှန်ရေးအဖွဲ့အစည်းတွေအနေနဲ့ တော်လှန်ရေးကာလ/ကြားကာလက စတင်ပြီး အနာဂတ်ဖက်ဒရယ် ဒီမိုကရေစီပြည်ထောင်စု တည်ဆောက်ရေးမှာ ဗဟိုချုပ်ကိုင်မှု စနစ် (Centralization)အသစ်တဖန်ပြန်လည်အားကောင်းစေမယ့် ဗဟိုအခြေပြု ဖက်ဒရယ်စနစ် (Holding Together) ကို လက်ခံကျင့်သုံးသွားမှာ မဟုတ်ဘူးလို့ပူးတွဲ ကြေညာတာပါ။

အခုပူးတွဲကြေညာချက်ကို ကရင်နီအမျိုးသားတိုးတက်ရေးပါတီ (KNPP)၊ ကရင်အမျိုးသားအ

စည်းအရုံး (KNU)၊ချင်းအမျိုးသားတပ်ဦး (CNF)၊ မွန်ပြည်သစ်ပါတီ (စစ်အာဏာရှင်ဆန့်ကျင်ရေး) (NMSP-AD)၊ကရင်နီပြည်နယ်အတိုင်ပင်ခံကောင်စီ (KSCC)၊ ပအိုဝ်းအမျိုးသားဖက်ဒရယ်ကောင်စီ (PNFC)၊မွန်ပြည်နယ်ဖက်ဒရယ်ကောင်စီ(MSFC)၊တအာင်းနိုင်ငံရေးအတိုင်ပင်ခံကော်မတီ (TPCC)၊ အမျိုးသမီးများအဖွဲ့ချုပ်(မြန်မာနိုင်ငံ) – WLB တို့က ထုတ်ပြန်တာပါ။

ဒီနေ့ကျရောက်တဲ့ ၇၈ နှစ်မြောက် ပင်လုံစာချုပ်ချုပ်ဆိုတဲ့အခမ်းအနားကို ပေးပို့တဲ့ တအာင်းအမျိုးသားလွတ်မြောက်ရေးတပ်မတော် (TNLA)ရဲ့ သဝဏ်လွှာမှာလည်း မြန်မာနိုင်ငံက နိုင်ငံရေးပါတီတွေနဲ့ နိုင်ငံရေး၊ တော်လှန်ရေးခေါင်းဆောင်တွေဟာ နိုင်ငံရေးယဉ်ကျေးမှုနိမ့်ကျတာကြောင့် ဒီနေ့အထိပြည်ထောင်စုမတည်ဆောက်နိုင်တာ ဖြစ်ကြောင်းပြောထားပါတယ်။

မြန်မာပြည်မှာရှိတဲ့ နိုင်ငံသားတိုင်း၊ လူမျိုးတိုင်း လွတ်မြောက်ချိန်တန်ပြီဖြစ်ကြောင်းနဲ့ ပင်လုံစာချုပ်မှာ ချုပ်ဆိုတဲ့ နိုင်ငံရေးအနှစ်သာရတွေကို တော်လှန်ရေးအင်အားစုတွေ ပြည့်ပြည့်ဝဝ ကြိုးပမ်းအကောင်အထည်ဖော်သင့်ပြီလို့လည်း TNLAက တိုက်တွန်းထားပါသေးတယ်။