တအာင်းထိန်းချုပ်ဒေသတွေကို စစ်ကောင်စီ လေကြောင်းတိုက်ခိုက်မှုတွေ ဆက်လက်လုပ်ဆောင်နေ
- BVJ
- Apr 18
- 1 min read
BVJ/ဇော်_ဧပြီ ၆၊ ၂၀၂၅
အပစ်ရပ်ကြေညာပြီးနောက်ပိုင်းမှာလည်း ရှမ်းပြည်နယ်မြောက်ပိုင်း နောင်ချိုနဲ့ မန္တလေးတိုင်း မိုးကုတ်၊ သပိတ်ကျင်းတို့ကို စစ်ကောင်စီက လေကြောင်းတိုက်ခိုက်မှုတွေ ဆက်လက်လုပ်ဆောင်နေတယ်လို့ တအာင်းတပ်မတော် (TNLA) က ထုတ်ပြန်ထားပါတယ်။
ငလျင်ကယ်ဆယ်ရေးဆောင်ရွက်နိုင်ဖို့ စစ်ကောင်စီက ဧပြီ ၂ ရက်ကနေ ၂၂ ရက်နေ့အထိ (၂၁ ရက်ကြာ) တစ်နိုင်ငံလုံး အပစ်ရပ်မယ်လို့ ထုတ်ပြန်ခဲ့ပေမဲ့ ဧပြီ ၃ ရက်နေ့မှာ သပိတ်ကျင်းမြို့နယ် ၇ မိုင်နေရာကို ဂျက်ဖိုက်တာလေယာဉ်နဲ့ ၄ ကြိမ် ဗုံးကြဲတိုက်ခိုက်မှုတွေ လုပ်ဆောင်ခဲ့တယ်လို့လည်း သိရပါတယ်။
မနေ့ ဧပြီ ၅ ရက်လည်း တအာင်းထိန်းချုပ်ဒေသ နောင်ချိုမြို့နယ် နောင်လင်းရွာ၊ နမ့်ဆောင်ဟူးရွာနဲ့ မိုးကုတ်မြို့နယ် ပင့်ကူတောင်ဘက်ခြမ်းတွေကို စစ်ကောင်စီက ဂျက်ဖိုက်တာလေယာဉ်နဲ့ လေကြောင်းဗုံးကြဲတိုက်ခိုက်မှုတွေ လုပ်ဆောင်ခဲ့တယ်လို့ TNLA က ထုတ်ပြန်ထားပါတယ်။
နောင်ချိုမြို့နယ် ကျေးရွာတွေကို စစ်ကောင်စီ ဗုံးကြဲတိုက်ခိုက်မှုကြောင့် ဒေသခံပြည်သူနေအိမ် ၄ လုံး ထိခိုက်ပျက်စီးခဲ့တယ်လို့ သိရပြီး အရပ်သားပြည်သူ ထိခိုက်သေဆုံးမှုအခြေအနေကိုတော့ မသိရသေးပါဘူး။
အင်အားပြင်းငလျင်လှုပ်ခတ်ပြီးချိန် ကူညီကယ်ဆယ်ရေးနဲ့ ပြန်လည်ထူထောင်ရေးလုပ်ငန်းတွေ ဆောင်ရွက်နိုင်ဖို့အတွက် ခုခံကာကွယ်မှုကလွဲပြီး တစ်လကြာ အပစ်ရပ်စဲကြောင်း မြောက်ပိုင်းမဟာမိတ်ညီနောင် ၃ ဖွဲ့က ဧပြီ ၁ ရက်မှာ ထုတ်ပြန်ထားပါသေးတယ်။
မတ်လ ၂၈ ရက် ငလျင်လှုပ်ခတ်ပြီးချိန်ကစပြီး မနေ့ ဧပြီ ၅ ရက်နေ့အထိ နိုင်ငံတစ်ဝန်း စစ်ကောင်စီလေကြောင်းတိုက်ခိုက်မှု အကြိမ် ၉၀ ထက်မနည်းရှိခဲ့ပြီး ထိခိုက်သေဆုံးသူ ၅၀ ထက်မနည်းရှိခဲ့ပါတယ်။
Comments