စစ်ရှောင် မိန်းကလေးငယ်သုံးဦးကို သတ်ဖြတ်သူကို KIAသေဒဏ်ပေး
- BVJ
- Apr 18
- 1 min read
BVJ/အိုင်းရစ် _ ဧပြီ ၉ ၊ ၂၀၂၅
ကချင်ပြည်နယ် လိုင်ဇာမြို့နယ် ဂျေယန်စစ်ဘေးရှောင်စခန်းက ကလေးငယ် မိန်းကလေး သုံးဦးကို ပြန်ပေးဆွဲသတ်ဖြတ်ခဲ့တဲ့ တရားခံ ဦးအုန်းဆောင်ဒွဲအောင်ကို သေဒဏ်ချမှတ်လိုက်တယ်လို့ ကချင်လွတ်လပ်ရေးတပ်မတော် (KIO/KIA) သတင်းပြန်ကြားရေးဌာန The Kachin Net က မနေ့ ဧပြီ ၈ ရက် ညပိုင်းမှာ ထုတ်ပြန်ပါတယ်။
KIA ဌာနချုပ်တည်ရှိရာ လိုင်ဇာမြို့နယ် ဂျေယန်စစ်ဘေးရှောင်စခန်းက အသက် ၁၀ နှစ်အရွယ် မိန်းကလေး နှစ်ဦးနဲ့ ၁၁ နှစ်အရွယ် မိန်းကလေးတစ်ဦးတို့ ဖေဖော်ဝါရီ ၂၂ ရက်မှာ မုန်ဆိုင်ယန်ရွာက ဆရာမဖြစ်သူနေအိမ်ကို သွားရောက်ချိန် လမ်းမှာပျောက်ဆုံးခဲ့ပြီးနောက် ငါးရက်အကြာမှာ သေဆုံးလျက်ပြန်တွေ့ခဲ့ရတာပါ။
ကလေးတွေကို ပြန်ပေးဆွဲသတ်ဖြတ်ခဲ့တဲ့ တရားခံ ဦးအုန်းအောင်ဒွဲအောင်ကို KIO/KIA က အထူးတရားရုံးဖွဲ့စည်းကာ စစ်ဆေးမှုတွေလုပ်ဆောင်ခဲ့ပြီးနောက် ရာဇသတ်ကြီးပုဒ်မ ၃၀၂- ၁(ခ)၊ ၂၀၁၊ ၃၆၄၊ ၃၇၅၊ ၃၇၇၊ ၃၈၆ စတဲ့ ပုဒ်မ ၆ ခုနဲ့ တရားစွဲဆိုခဲ့တာဖြစ်ပြီး ပုဒ်မ ၃၆၄ အရ ထောင်ဒဏ် ၁၀ နှစ်၊ ပုဒ်မ ၃၇၆ အရ အလုပ်ကြမ်းနဲ့ထောင်ဒဏ် နှစ် ၂၀၊ ပုဒ်မ ၃၀၁ (၁ -ခ) အရ မသေမချင်း သေဒဏ်အမိန့်ချမှတ်ခဲ့တာလည်း ဖြစ်ပါတယ်။
အဲ့ဒီဖြစ်စဉ်အခြေအနေနဲ့ပတ်သက်ပြီး KIA သတင်းပြန်ကြားရေးတာဝန်ခံ ဗိုလ်မှူးကြီး နော်ဘူကို Burma VJ က ဆက်သွယ်မေးမြန်းထားဆဲ ဖြစ်ပါတယ်။
ပြန်ပေးဆွဲသတ်ဖြတ်မှုကိုခံခဲ့ရတဲ့ မိန်းကလေးငယ်သုံးဦးဟာ ဂျေယန်းစစ်ဘေးရှောင်စခန်းမှာ နေထိုင်ပြီး မူလတန်းတက်ရောက်နေသူတွေလည်း ဖြစ်ပါတယ်။ အသတ်ခံရပြီး သေဆုံးခဲ့သူတွေရဲ့အလောင်းတွေကို KIO/KIA ရဲဌာနနဲ့ ဆရာဝန်တွေရဲ့ စစ်ဆေးချက်အရ ကလေးငယ်တွေရဲ့ ခန္ဓာကိုယ်မှာ ရိုက်နှက်ဒဏ်ရာတွေနဲ့ လိင်ပိုင်းဆိုင်ရာ အဓမ္မပြုကျင့်ခံထားရတဲ့ အထောက်အထားတွေကို စစ်ဆေးတွေ့ရှိခဲ့တယ်လို့ တာဝန်ရှိသူတွေက ပြောထားကြောင်း The Kachin Net မှာ ဖော်ပြထားပါတယ်။
ဦးအုန်းဆောင်ဒွဲအောင်ဟာ အရင်ကလည်း KIA တပ်မတော်ထဲမှာ စစ်စည်းကမ်းဖောက်ဖျက်မှုနဲ့ အရေးယူထုတ်ပယ်ခံခဲ့ရပြီး ကာလရှည်ထောင်ဒဏ်ချမှတ်ခံခဲ့ရဖူးတယ်လို့လည်း သိရပါတယ်။
Comments