ကလေးမြို့နယ်တောင်ပိုင်းက စစ်ကောင်စီစခန်း ၄ ခုကို CDF-KKG ပူးပေါင်းတပ်တွေ သိမ်းယူ
- BVJ
- Feb 17
- 1 min read
BVJ/ထက်အောင် _ ဖေဖော်ဝါရီ ၁၇ ၊ ၂၀၂၅
စစ်ကိုင်းတိုင်း ကလေးမြို့နယ်တောင်ပိုင်းမှာရှိတဲ့ စစ်ကောင်စီတပ်နဲ့ ပျူစောထီးတွေ အထိုင်ချတပ်စွဲထားတဲ့ စခန်း ၄ ခုနဲ့ ကာကင်းစခန်းတွေကို Chinland Defense Force - Kalay Kabaw Gangaw (CDF KKG) နဲ့ ပူးပေါင်းတပ်တွေက သိမ်းယူနိုင်တယ်လို့ ဒီနေ့ ဖေဖော်ဝါရီ ၁၇ ရက်မှာ CDF – KKG သတင်းပြန်ကြားရေးတာဝန်ခံက ပြောပါတယ်။
ကလေးမြို့နယ်တောင်ပိုင်း ကလေး-ဂန့်ဂေါလမ်းမပေါ်မှာရှိတဲ့ ကမ်းပါးနီ (ကဘနီ) တပ်စန်းနဲ့ ကာကင်းစခန်းတွေကို CDF-KKG ပူးပေါင်းတပ်တွေက ဖေဖော်ဝါရီ ၁၂ ရက်နေ့ ညပိုင်းကတည်း သိမ်းယူထားနိုင်ခဲ့တာဖြစ်ပြီး တစ်ပတ်အတွင်း မှန်တောရွာ၊ အောင်သာယာရွာနဲ့ ယင်းရွာနှစ်ခုကြားက စစ်ကောင်စီတပ်စခန်းကိုလည်း ဒေသတော်လှန်ရေးတပ်ဖွဲ့က ဆက်လက်သိမ်းယူနိုင်ခဲ့တာ ဖြစ်ပါတယ်။
“ကျွန်တော်တို့ ဒီကမ်းပါးနီ (ကဘနီ) စခန်းကို သိမ်းနိုင်ခဲ့တယ်။ အဓိကကတော့ ကဘနီစခန်းနဲ့ ကာကင်းစခန်းတွေကို ကျွန်တော်တို့ အကုန်လုံး ထိန်းချုပ်နိုင်ခဲ့တဲ့အနေအထားပေါ့။ ဖမ်းမိတာကတော့ လောလောဆယ် ၁ ယောက်တော့ မိထားပါတယ်။ မှန်တောရွာ၊ အောင်သာယာရွာရယ်၊ ပြီးတော့ မှန်တောနဲ့ အောင်သာယာရွာကြားမှာ စခန်းငယ်လေးတစ်ခုရယ်ပေါ့။ အကုန်လုံးကိုတော့ စခန်း ၄ ခုလို့ ပြောလို့ရတယ်” လို့ CDF-KKG သတင်းပြန်ကြားရေးတာဝန်ခံတစ်ဦးက Burma VJ ကို အတည်ပြု ဖြေကြားထားပါတယ်။
CDF-KKG နဲ့ ဒေသကာကွယ်ရေးပူးပေါင်းတပ်တွေ စတင်ထိုးစစ်ဆင်ခဲ့တဲ့ ဖေဖော်ဝါရီ ၁၁ ရက်စပြီး စစ်ကောင်စီက ပေါင် ၅၀၀ ဗုံးကြဲချမှုနဲ့ Y-12 လေယာဉ်အသုံးပြုကာ ဗုံးကြဲတိုက်ခိုက်မှုတွေ အပြင်းအထန်လုပ်ဆောင်ခဲ့သလို အရပ်သားပြည်သူတွေကို ပစ်မှတ်ထား ဗုံးကြဲတိုက်ခိုက်မှုတွေ လုပ်ဆောင်ခဲ့တယ်လို့ သိရပါတယ်။
ဒီနေ့ ဖေဖော်ဝါရီ ၁၇ ရက်အထိ မြေပြင်တိုက်ပွဲ ပြင်းထန်နေပြီး စစ်ကောင်စီဘက်က ထိခိုက်သေဆုံးမှုများတယ်လို့လည်း သိရပါတယ်။ အရပ်သားပြည်သူတွေကို ပစ်မှတ်ထားပြီး စစ်ကောင်စီက ဗုံးကြဲတိုက်ခိုက်နေတာကြောင့် ကလေးတောင်ပိုင်းက ဒေသခံနေအိမ်တွေ ထိခိုက်ပျက်စီးခဲ့ပြီး ဒေသခံပြည်သူ အများအပြား နေရပ်စွန့်ခွာ စစ်ဘေးရှောင်နေရတယ်လို့လည်း သိရပါတယ်။
Comments